މާލޭ ނޯތު ހާބަރުގައި އަޅާފައި އޮތް ބޯޓެއްގެ ފަޅުވެރިންތަކެއް ހާލު ދެރަވެގެން ހޮސްޕިޓަލުގައި ފަރުވާދޭން ޖެހުނީ ޖެނެރޭޓަރުގެ ދުމުގެ އަސަރުކޮށްގެން ކަމަށް ފުލުހުން ބުނެފިއެވެ.

ހަބަރު ހުސްވެފައި ތިއްބާ މިއަދު ހެނދުނު ފެނުނީ އުތުރުގެ ރަށްރަށަށް ދަތުރުކުރާ ބޯޓެއް ކަމަށްވާ 'ޑީއެމްއެމްއޭ އެކްސްޕްރެސް 5' ނަމަކަށް ކިޔާ ބޯޓުގެ ފަސް ފަޅުވެރިއެކެވެ. އެއީ ދިވެހި ފިރިހެނަކާއި ހަތަރު ބިދޭސީ ފިރިހެނުންނެވެ. އެ މީހުންނަށް އައިޖީއެމްއެޗުގައި ދަނީ ފަރުވާދެމުންނެވެ.

މި ހާދިސާ ހިނގަން މެދުވެރިވި ގޮތާ ގުޅޭގޮތުން ފުލުހުން ބުނީ، މިހާތަނަށް ތަހުގީގަށް ލިބިފައިވާ މައުލޫމާތަށް ބަލާއިރު، ބޯޓުގެ ފަޅުވެރިންނަށް އަސަރުކުރީ ބަންދުކޮށްފައިވާ ތަނެއްގައި ޖެނެރޭޓަރެއް ހިންގާފައި ހުއްޓާ، އޭގެއިން ބޭރުވި ދުމުގެ އަސަރު އެތަނުގައި ނިދާފައި ތިބި މީހުންނަށް ކުރުމުގެ ސަބަބުން ކަމަށެވެ.

ފުލުހުން މައުލޫމާތު ދިން ގޮތުގައި، ހާލު ދެރަވެގެން އައިޖީއެމްއެޗް ހޮސްޕިޓަލުގައި ފަރުވާ ދެމުންދާ ފަސް މީހުންގެ ހާލަތު މިހާރު އަންނަނީ ރަނގަޅުވަމުންނެވެ.

މިފަދަ ނުރައްކާތެރި ހާދިސާތަކުން ރައްކާތެރިވުމަށްޓަކައި ފުލުހުން ވަނީ އާންމުންނަށް ހާއްސަ އިލްތިމާސެއް ކޮށްފައެވެ. އެގޮތުން، ނިދުމަށް ނުވަތަ އަރާމުކުރުމަށް ބޭނުންކުރާ ބަންދު ތަންތަނުގައި ޖެނެރޭޓަރު ފަދަ ވިހަ ގޭސް ބޭރުވާ ތަކެތި ބޭނުންނުކުރުމަށް ފުލުހުން ވަނީ އިރުޝާދު ދީފައެވެ. ޖެނެރޭޓަރުން ބޭރުވާ ދުމުގެ އަސަރު ކުރުމުން ހެއަށް ގޮތްވެ، ފުރާނައަށް ނުރައްކާވާ ހާލަތަކަށް ކަންކަން ދިއުމަކީ އެކަށީގެންވާ ކަމެއް ކަމަށްވެސް ފުލުހުން ފާހަގަކުރިއެވެ.

މީގެ އިތުރުން، ބޯޓުފަހަރުގައި ނިދުމަށް ބޭނުންކުރާ ކޮޓަރިތަކަކީ ވައި ދައުރުވާނެ ރަނގަޅު ނިޒާމެއް ގާއިމުކުރެވިފައިވާ ތަންތަންކަން ކަށަވަރުކުރުމަށާއި، އެފަދަ ތަންތަނަށް ދުމުގެ އަސަރުކުރާ ގޮތަށް އިންޖީނާއި ޖެނެރޭޓަރު ފަދަ ތަކެތި ބޭނުން ނުކުރުމަށް ފުލުހުން ވަނީ ހަނދާންކޮށްދީފައެވެ.