2026 ވަނަ އަހަރުގެ މޫސުމީ މޮޑެލްތަކުން ދައްކާގޮތުގައި، ދުނިޔޭގެ ތާރީޚުގައިވެސް ރެކޯޑް ކުރެވޭނެ ފަދަ ނުރައްކާތެރި "އެލް ނީނޯ" އިވެންޓެއް މިހާރު ވަނީ ފެށިފައެވެ.

ޕެސިފިކް ކަނޑުގެ އީކުއޭޓަރާވީ ސަރަހައްދުގައި އާދަޔާޚިލާފަށް ކަނޑުގެ ލޮނުގަނޑު ހޫނުވަމުންދާ މި ދަނޑިވަޅުގައި، މިއީ ފަހުގެ ތާރީޚެއްގައި ފެންނާނެ އެންމެ ބާރުގަދަ އެލް ނީނޯއަށް ވުމުގެ ފުރުސަތު ބޮޑުކަމަށް ސައިންސްވެރިން އިންޒާރުދެއެވެ. މިކަމުގެ ސަބަބުން ދުނިޔޭގެ ވައިގެ ދައުރުވުމަށް ބޮޑެތި ބަދަލުތަކެއް އައިސް، އެތައް ހާސް މޭލެއް ދުރުގައިވާ ގައުމުތަކުގެ ވާރޭވެހުމުގެ ނިޒާމަށާއި މޫސުމަށް ބޮޑެތި ގަޑުބަދުތަކެއް އަންނާނެއެވެ.

މިހާރު އުފެދެމުންދާ މި ބާރުގަދަ އެލް ނީނޯއާ ގުޅިގެން ސައިންސްވެރިން ބިރުވެރި މިސާލެއް ޖައްސަވަނީ 1877 ވަނަ އަހަރު ކުރިމަތިވި ނުރައްކާތެރި އެލް ނީނޯއާއެވެ. އެ ފަހަރު މުޅި ދުނިޔޭގެ ދަނޑުވެރިކަން އިނދަޖެހި، ކުރިމަތިވި ބޮޑު ތަދުގެ ސަބަބުން އެތައް މިލިއަން ބަޔަކު މަރުވިއެވެ. މި ފަހަރުގެ "ސުޕަރ އެލް ނީނޯ" އަކީ ހަމައެކަނި ވަކި ސަރަހައްދަކަށް އަންނަ ބަދަލެއް ނޫން ކަމަށާއި، މިއީ މުޅި ދުނިޔޭގެ ކާބޯތަކެތީގެ ރައްކާތެރިކަމާއި ފެނުގެ ނިޒާމަށް ކުރިމަތިވާނެ ބޮޑު ގޮންޖެހުމެއް ކަމަށް މޫސުމީ މާހިރުން ފާހަގަކުރެއެވެ.

އެންމެ ބޮޑު ކަންބޮޑުވުމަކީ، އިންސާނުންގެ އަމަލުތަކުގެ ސަބަބުން ދުނިޔެ ހޫނުވަމުންދާ ދަނޑިވަޅެއްގައި މިފަދަ ބާރުގަދަ އެލް ނީނޯއެއް ކުރިމަތިވުމެވެ. މިހާރުވެސް ކަނޑުތަކުގެ ހޫނުމިން ހުރީ ރެކޯޑް މިންވަރަކަށް މަތީގައެވެ. އެހެންކަމުން، މި އިވެންޓުގެ ސަބަބުން ކުރިއަށް އޮތް ތަނުގައި އާދަޔާޚިލާފަށް ގަދަ ހޫނު ރާޅުތަކާއި، ނުރައްކާތެރި ހަނަފަސްކަމުގެ އިތުރުން ބޮޑެތި ފެންބޮޑުވުމުގެ ހާދިސާތައް ކުރިމަތިވުމުގެ ފުރުސަތު އޮތީ މީގެ ކުރިން ދުވަހަކުވެސް ތަޖުރިބާނުކުރާ މިންވަރަކަށެވެ.

މި ނުރައްކާތެރި މޫސުމީ ބަދަލުގެ ސަބަބުން މަސްވެރިކަން ދަށްވުމާއި، ފަރުތައް ހުދުވުމުގެ އިތުރުން ކަރަންޓުގެ ނިޒާމުތަކަށާއި ކާބޯތަކެތި ފޯރުކޮށްދޭ ސަޕްލައި ޗެއިންތަކަށް ބޮޑެތި ގެއްލުންތަކެއް ލިބިދާނެއެވެ.

މޫސުމީ ލަފާކުރުންތައް އަދިވެސް ބަދަލުވަމުންދިޔަ ނަމަވެސް، މިކަމުގެ ނުރައްކާ ބޮޑުކަން ޔަގީންވާތީ، ގައުމުތަކުގެ އުމްރާނީ ވަސީލަތްތަކާއި ސިއްހީ ނިޒާމުތައް މިފަދަ ކާރިސާއަކަށް ތައްޔާރުވުމަށް ކަމާބެހޭ ފަރާތްތަކުން ދަނީ އިލްތިމާސްކުރަމުންނެވެ.