ފީފާ ވޯލްޑް ކަޕް ފައިނަލް މެޗު ބެލުމަށް ފުވައްމުލައް ސިޓީގައި ބޭއްވި ފޯރިގަދަ ހަރަކާތުގެ ތެރެއިން، ގުރުއަތުން ހޮވުނު ނަސީބުވެރިއަކަށް ކުރީގެ ނައިބު ރައީސް ފައިސަލް ނަސީމްގެ ފަރާތްޕުޅުން ޚާއްޞަ އުމްރާ ދަތުރެއް ހަދިޔާކޮށްފިއެވެ.

ފައިސަލް ފައުންޑޭޝަނުގެ އިސްނެގުމަކަށް، ފުވައްމުލަކުގެ ގިނަ އަދަދެއްގެ ރައްޔިތުންނާއެކު ބޭއްވި މި ފޯރިގަދަ ހަރަކާތުގައި، ގުރުއަތުން ހޮވުނު ނަސީބުވެރިއަކީ އެ ސިޓީއަށް ނިސްބަތްވާ އައިޝަތު ޝީރާޒް މުހައްމަދެވެ. މި ޚާއްޞަ އިނާމު ދިނުމަށް ހަމަޖެހިފައިވަނީ މެޗުގެ ފުރަތަމަ ހާފުން ފެށިގެން މެޗު ނިމެންދެން އެ ސަރަހައްދުގައި މަޑުކޮށް، ފޯރިއާއެކު މެޗު ބެލި ފަރާތްތަކުގެ މެދުގައި ނެގުނު ގުރުއަތަކުންނެވެ.

މި އިވެންޓް އެންމެ ފުރަތަމަ ބޭއްވުމަށް ރޭވީ ފުވައްމުލަކު ސްކޫލްގެ ހޯލުގައެވެ. ނަމަވެސް، ހަރަކާތް ބޭއްވުމުގެ އެންމެ ފަހު ވަގުތު ސަރުކާރުން އެ ހޯލު އަތުލާފައިވާތީ، މި ހަރަކާތް ފަހުން ބާއްވާފައިވަނީ ފުވައްމުލަކު މާދަޑު ސްޕޯޓްސް ޕާކުގައެވެ. ތަން ބަދަލުވި ނަމަވެސް، ރައްޔިތުންގެ ފަރާތުން މި ހަރަކާތަށް ބޮޑު ތަރުހީބެއް ލިބިގެންދިޔަކަން ފާހަގަކުރެވެއެވެ.

2026 ވަނަ އަހަރުގެ ފީފާ ވޯލްޑް ކަޕްގެ ފައިނަލް މެޗު، ފުވައްމުލަކު ސިޓީ ކައުންސިލްއާއި ގުޅިގެން ރައްޔިތުންނަށް ދެއްކުމުގެ އިންތިޒާމު މިފަހަރު ވެސް ހަމަޖެއްސުނީތީ އުފާ ކުރަން.

ފައިނަލް މެޗުގައި ގުރު އަތުން އެކި އެކި އިނާމުތައް ލިބުނު ފަރާތް ތަކާއި، އަދި އުމްރާަ ދަތުރު ލިބުނު… pic.twitter.com/aIq1yoTrD3

— Faisal Naseem (@FaisalNasym) July 20, 2026

މެޗުގެ ފޯރިގަދަ ވަގުތުތައް ކުރީގެ ނައިބު ރައީސް ފައިސަލް ނަސީމް ބައްލަވާލެއްވީ ފުވައްމުލަކު ސިޓީގެ ރައްޔިތުންނާއެކު އެއް ސަފެއްގައި ހުންނަވައިގެންނެވެ. އެމަނިކުފާނު ވަނީ ރައްޔިތުންނާ ބައްދަލުކުރައްވައި، މެޗުގެ އުފާވެރިކަމުގައި ބައިވެރިވެވަޑައިގެންފައެވެ.