ވ. އަތޮޅުގައި ގެއްލުނު އިޓަލީގެ ފަތުރުވެރިން ހޯދުމުގެ އޮޕަރޭޝަނުގައި އުޅެނިކޮށް ނިޔާވި ސިފައިންގެ ޑައިވަރު، މުހައްމަދު މަހުދީގެ މަރުގެ ސެޓްފިކެޓުގައިވާ މައުލޫމާތު އިސްލާހުކޮށްދިނުމަށް ކަމާބެހޭ އިދާރާތަކުން އިންކާރު ކުރާތީ، އޭނާގެ އާއިލާއިން ނުރުހުން ފާޅުކޮށްފިއެވެ.

މިދިޔަ މޭ މަހު މަހުދީ ނިޔާވީ، ކަނޑުއަޑިން މީހުން ހޯދުމުގެ ތެރޭގައި ޑީކޮމްޕްރެޝަން ސިކްނަސް (ޑީކޯ) ވެގެން އޭޑީކޭ ހޮސްޕިޓަލުގައި ފަރުވާދެމުން ދަނިކޮށެވެ. ނަމަވެސް، ހޮސްޕިޓަލުން ދޫކޮށްފައިވާ މަރުގެ ސެޓްފިކެޓުގައި އޭނާ "މަރުވި" ކަމަށް ބަޔާންކުރުމުގެ ބަދަލުގައި "ސަލާމަތްކުރެވުނު" (ރެސްކިއުޑް) ކަމަށް ލިޔެފައިވާތީ، އާއިލާއިން ވަނީ އެކަމާ ބޮޑު ކަންބޮޑުވުމެއް ފާޅުކޮށްފައެވެ.

މަހުދީގެ ކޮއްކޮ، ފާރިސް އިބްރާހިމް ސޯޝަލް މީޑިއާގައި ބުނި ގޮތުގައި، ސެޓްފިކެޓުގައިވާ މައުލޫމާތު ރަނގަޅު ކުރުމަށް އޭޑީކޭގައި އެދުމުން، އެތަނުން ބުނެފައިވަނީ ރަސްމީ އިދާރާއެއްގެ އެންގުމަކާ ނުލައި އެ ބަދަލު ނުގެނެވޭނެ ކަމަށެވެ. މީގެއިތުރުން، މި މައްސަލައިގައި ޑިފެންސް މިނިސްޓަރާ ބައްދަލުކުރުމުންވެސް، ސެޓްފިކެޓަށް އެއްވެސް ބަދަލެއް ނުގެނެވޭނެ ކަމަށް އަންގާފައިވާ ކަމަށް އާއިލާއިން ބުނެއެވެ.





އާއިލާއިން ބެލިބެލުމުންނާއި، މަހުދީގެ ގޯޕްރޯ ކެމެރާގެ ރެކޯޑިންތަކުގެ އިތުރުން، އެ ހާދިސާ ހިނގި ވަގުތު އޭނާއާއެކު ތިބި ޑައިވަރުންގެ ވާހަކަތަކަށް ބަލާއިރު، މަހުދީ ހޮހޮޅައެއްގެ ތެރޭގައި ތާށިވީ އޭނާ ބޭނުންކުރި ގައިޑްލައިން ކެނޑުމުގެ ސަބަބުން ކަމަށްވެސް ފާރިސް ބުނެފައިވެއެވެ. މަހުދީގެ ހަށިގަނޑު ކަނޑުއަޑިން ނެގީ މެރިން ފުލުހުންގެ ޑައިވަރުން ކަމަށްވާއިރު، ކަމާބެހޭ މުއައްސަސާތަކުން މި ހާދިސާގެ އަސްލު ފޮރުވަން މަސައްކަތްކުރާ ކަމަށް އާއިލާއިން ތުހުމަތުކުރެއެވެ.

މީގެއިތުރުން، މަހުދީގެ ފޯނު އަދިވެސް ފުލުހުންގެ ބެލުމުގެ ދަށުގައި އޮތުމަކީ އާއިލާއަށް ލިބޭ ބޮޑު ހިތްދަތިކަމެއްގެ ގޮތުގައި ފާހަގަކޮށްފައިވެއެވެ. ފުލުހުން މި ހާދިސާ ތަހުގީގު ކުރަމުންދިޔަ ނަމަވެސް، މިހާތަނަށް އެއްވެސް އިދާރާއަކުން ތަހުގީގުގެ އެއްވެސް ތަފްސީލެއް ހާމަކޮށްފައެއް ނުވެއެވެ.