ރަޝިޔާއިން ޔޫކްރެއިނަށް އަލުން ދޭންފެށި ވަރުގަދަ ހަމަލާތަކެއްގައި މަދުވެގެން 8 މީހުން މަރުވެ، އެތައް ބަޔަކު ޒަޚަމްވެއްޖެއެވެ.

ޑްރޯނާއި ވައިގެ މަގުން ވައްޓާލި ބޮންތައް ހިމެނޭ މި ހަމަލާތައް އަމާޒުވެފައިވަނީ މޮލްޑޯވާއާ ގުޅޭ ދެކުނު ބޯޑަރުން ފެށިގެން އިރުމަތީ ޑޮނެޓްސްކް ސަރަޙައްދާ ދެމެދުގެ އެކި ހިސާބުތަކަށެވެ.

ޔޫކްރެއިންގެ އޮޑެސާ ސަރަޙައްދުގައި އޮންނަ މޮލްޑޯވާ ބޯޑަރު ހުރަސްކުރާ ސްޓާރޯކޮޒާޗޭއަށް ރޭގަނޑުގެ ވަގުތެއްގައި ރަޝިޔާގެ ޑްރޯންތަކުން ދިން ހަމަލާތަކެއްގައި ދެ ޢާންމުން މަރުވެ، އިތުރު ތިން މީހުން ޒަޚަމްވި ކަމަށް އެ ސަރަޙައްދުގެ ގަވަރުނަރު އޮލޭ ކިޕަރ ވިދާޅުވިއެވެ.

މި ހަމަލާގެ ސަބަބުން އެތަނުގައި އަލިފާން ރޯވެ، ބޯޑަރު ހުރަސްކުރުމުގެ ޚިދުމަތްތަކަށް ވަގުތީ ގޮތުން ބުރޫއެރިއެވެ. ނަމަވެސް، ބުދަ ދުވަހުގެ މެންދުރުފަހު އަލުން ދަތުރުފަތުރުގެ ޚިދުމަތް ފެށިފައިވާ ކަމަށް ޔޫކްރެއިންގެ ކަސްޓަމްސް އިދާރާއިން ވަނީ ކަށަވަރުކޮށްދީފައެވެ.

މީގެ އިތުރުން، ދެކުނުގެ ޚާރްސަން ސިޓީއަށް ދިން ވަކިވަކި ޑްރޯން ހަމަލާތަކެއްގައި ދެ ޢާންމުން ވަނީ މަރުވެފައެވެ. އެ ސަރަޙައްދުގެ ޕްރޮސެކިއުޓަރުން ހާމަކުރި ގޮތުގައި މަރުވެފައިވަނީ ޢުމުރުން 73 އަހަރުގެ ފިރިހެނަކާއި 55 އަހަރުގެ އަންހެނެކެވެ. ކަމާބެހޭ އިދާރާތަކުން މިހާރު ވަނީ މި ހަމަލާތަކާ ގުޅިގެން ހަނގުރާމައިގެ ޖަރީމާތަކުގެ ތަޙުޤީޤެއް ފަށާފައެވެ. ޒަޕޮރީޜިއާ ސަރަޙައްދުގެ ކުޝުހުމް އަވަށަށް ރަޝިޔާއިން ދިން ދެ ޑްރޯން ހަމަލާއެއްގައި 34 އަހަރުގެ ފިރިހެނަކު މަރުވެ، 52 އަހަރުގެ އަންހެނަކު ޒަޚަމްވި ކަމަށް އެ ސަރަޙައްދުގެ އޮފިޝަލުން މަޢުލޫމާތު ދެއެވެ.

ބުދަ ދުވަހުގެ ފަތިހު ދެކުނުގެ މައިކޮލައިވް ސިޓީއަށް ދިން ނުރައްކާތެރި އެހެން ހަމަލާއެއްގައި އެކަކު މަރުވެ، ފަސް މީހުން ޒަޚަމްވިއެވެ. ޔޫކްރެއިންގެ އެމަޖެންސީ ޚިދުމަތްތަކުން ބުނި ގޮތުގައި މި ހަމަލާގެ ސަބަބުން ޢާންމުންގެ ގެދޮރާއި، ކެފޭތަކާއި، ފިހާރަތަކުގެ އިތުރުން ގުދަންތަކަށް ބޮޑެތި ގެއްލުންތަކެއް ލިބި، އެއް ތަނެއްގައި ބޮޑު އަލިފާނުގެ ހާދިސާއެއް ހިނގާފައިވެއެވެ.

އިރުމަތީ ޔޫކްރެއިންގެ ޑޮނެޓްސްކް ސަރަޙައްދުގެ ސްލޮވިއަންސްކް ސިޓީއަށް ވައިގެ މަގުން ވައްޓާލި ބޮމެއް އަރައި، އެކަކު މަރުވެ އިތުރު މީހަކު ޒަޚަމްވި ކަމަށް އެ ސަރަޙައްދުގެ އަސްކަރީ އިދާރާގެ ވެރިޔާ ވަޑިމް ފިލަޝްކިން ވިދާޅުވިއެވެ. މީގެ އިތުރުން ކްރަމަޓޯރސްކް ކައިރިއަށް ވައްޓާލި އިތުރު ފަސް ބޮމުގެ ސަބަބުން، ބިލެންކޭ އަވަށުން އަށް މީހަކު ޒަޚަމްވެ، މަދުވެގެން 27 ގެއަކަށް ވަނީ ގެއްލުން ލިބިފައެވެ.

ހަމައެއާއެކު، ކަޅު ކަނޑުގެ ސަރަޙައްދުން އޮޑެސާ ބަނދަރާ ދިމާއަށް އަސްކަރީ ސާމާނު އުފުލަމުންދިޔަ ކަމަށް ބުނާ ޔޫކްރެއިންގެ މުދާ އުފުލާ ބޯޓަކަށް ހަމަލާދީފައިވާނެ ކަމަށް ރަޝިޔާގެ ދިފާޢީ ވުޒާރާއިން ވަނީ ބުނެފައެވެ. އަދި ވެރިރަށް ކިއޭވްގައި ޑްރޯން އުފެއްދުމާ ގުޅުންހުރި ކަމަށް ތުހުމަތުކުރެވޭ ގުދަނަކަށް ވެސް ރަޝިޔާ ސިފައިން އަމާޒުކޮށްފައިވާ ކަމަށް އެ ޤައުމުގެ ދަޢުލަތުގެ މީޑިއާތަކުން ރިޕޯޓުކޮށްފައިވެއެވެ.

މި ފަހުގެ ހަމަލާތަކުން ދައްކުވައިދެނީ ހަނގުރާމައިގެ ނުރައްކާތެރިކަން އިތުރުވަމުންދާ މިންވަރާއި، ޔޫކްރެއިންގެ ޢާންމުން ދިރިއުޅޭ ސަރަޙައްދުތަކަށް ޑްރޯނާއި، މިސައިލް އަދި ވައިގެ ބޮމުގެ ހަމަލާތަކުގެ ނުރައްކާ އަދިވެސް އިންތިހާއަށް ބޮޑުވެފައިވާ ކަމެވެ.