ސަރުކާރުން ތައާރަފުކުރުމަށް ނިންމާފައިވާ "މޯލްޑިވްސް ޕާލް ރެސިޑެންސީ" ވިސާ ޕްރޮގްރާމާ ގުޅޭ މައުލޫމާތު ސާފުކުރުމަށް އަދާލަތު ޕާޓީގެ އިސް ލީޑަރޝިޕްގެ ވަފުދެއް އިކޮނޮމިކް މިނިސްޓަރު މުހައްމަދު ސައީދާ ބައްދަލުކުރައްވައިފިއެވެ.

މި ބައްދަލުވުމާ ގުޅޭގޮތުން އަދާލަތު ޕާޓީން ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ، ޕާޓީގެ ރައީސް ޝައިޚް މުހައްމަދު ޝިފާން އާއި އިސް ލީޑަރުން މިނިސްޓަރު ސައީދާ ބައްދަލުކުރެއްވީ އެ ޕްރޮގްރާމާ ގުޅިގެން ސާފުކުރަން ބޭނުންވާ މުހިންމު ނުކާތަކާ މެދު މަޝްވަރާކުރުމަށް ކަމަށެވެ.

ނަމަވެސް، އެ ބައްދަލުވުމުގައި ދެކެވުނު ވާހަކަތަކުގެ ތަފްސީލެއް އެ ޕާޓީން ހާމަކޮށްފައެއް ނުވެއެވެ.

"މޯލްޑިވްސް ޕާލް ރެސިޑެންސީ" އަކީ ރާއްޖޭގެ އިގުތިސާދު ސިންދަފާތުކޮށް، ބޭރުގެ އިންވެސްޓަރުންގެ ޝައުގުވެރިކަން ހޯދުމަށް ސަރުކާރުން ތައާރަފުކޮށްފައިވާ "ރެސިޑެންސީ ބައި އިންވެސްޓްމަންޓް" ޕްރޮގްރާމެކެވެ.

ސަރުކާރުގެ މައިގަނޑު އަމާޒަކީ މި ޕްރޮގްރާމް މެދުވެރިކޮށް ރާއްޖެއަށް ބޭރު ފައިސާ ވަންނަ މިންވަރު އިތުރުކޮށް، ކުރިމަތިވެފައިވާ އިގުތިސާދީ ދަތިތަކަށް ހައްލެއް ހޯދުމެވެ.

މި ޕްރޮގްރާމްގެ ދަށުން، ކަނޑައެޅިފައިވާ ހާއްސަ ރިއަލް އެސްޓޭޓް މަޝްރޫއުތަކުން ޕްރޮޕަޓީ ގަންނަ ބޭރުގެ އިންވެސްޓަރުންނަށް ފަސް އަހަރާއި 10 އަހަރާ ދެމެދުގެ މުއްދަތަކަށް، އާކުރެވޭ ގޮތަށް ރާއްޖޭގައި ދިރިއުޅުމުގެ ހުއްދަ ނުވަތަ ރެސިޑެންސް ވިސާ ލިބިގެންދާނެއެވެ.

ނަމަވެސް، މި ޕްރޮގްރާމާ ގުޅޭ މައުލޫމާތު ހާމަކޮށްފައިވާ މިންވަރު މަދުވުމާއި، ރެސިޑެންސީ ލިބޭ ފަރާތްތަކަށް ލިބޭނެ އިނާޔަތްތަކާއި ޓެކްސް އިސްތިސްނާތަކާ މެދު އާންމުން ދަނީ ކަންބޮޑުވުން ފާޅުކުރަމުންނެވެ. އާންމުންގެ ކަންބޮޑުވުންތައް ހުރި ނަމަވެސް، ސަރުކާރުން ދަނީ މި ޕްރޮގްރާމްގެ މަސައްކަތްތައް ބާރުމޭގުގައި ކުރިއަށް ގެންދަމުންނެވެ.