ހުޅުމާލޭގައި ތަރައްގީކޮށްފައިވާ ފަހި ދިރިއުޅުން ކޯޕަރޭޝަން (އެފްޑީސީ) ގެ ސޯޝަލް ހައުސިން ޔުނިޓުތަކުގެ ޔުޓިލިޓީ ބެލްކަނިތަކަށް އުސޫލާ ޚިލާފަށް ބަދަލު ގެނެސްފައިވާނަމަ، އެކަންކަން އިސްލާހުކުރުމަށް އެ ކޯޕަރޭޝަނުން އެއް މަސް ދުވަހުގެ މުއްދަތެއް ދީފިއެވެ.

އެފްޑީސީން މިރޭ އާންމުކުރި އިއުލާނެއްގައި ބުނެފައިވަނީ، ފުލެޓުތަކުގެ ބެލްކަންޏަށް އެއްވެސް ބަދަލެއް ގެންނަންވާނީ އެ ކޯޕަރޭޝަނުން ކަނޑައަޅާފައިވާ މިންގަނޑުތަކާއި އުސޫލުތަކާ އެއްގޮތްވާ ގޮތުގެ މަތިން ކަމަށެވެ. އަދި ކުންފުނީގެ ރަސްމީ ވެބްސައިޓުގައި ޝާއިއުކޮށްފައިވާ ގައިޑްލައިނާ ޚިލާފަށް އެއްވެސް ބަދަލެއް ގެނައުމަކީ މަނާ ކަމެއް ކަމަށް ވެސް އެ ކޯޕަރޭޝަނުން ވަނީ ހަނދާންކޮށްދީފައެވެ.

އެ ކޯޕަރޭޝަނުން ހާމަކޮށްފައިވާ ގޮތުގައި، ފުލެޓުތަކުގެ ބެލްކަނިތަކާއި ކުޑަދޮރުތަކަށް ބަދަލު ގެނައުމަށް ހުއްދަ ދީފައިވަނީ ގްރިލް އެންޑް ނެޓް ފިކްސިން އަދި ސްލައިޑިން ލޫވާ ފިކްސިން މި ދެ ފަރުމާއަށެވެ.

އެހެންކަމުން، މި މިންގަނޑުތަކާ ޚިލާފަށް މިހާތަނަށް އެއްވެސް ބަދަލެއް ގެނެސްފައިވާ ފަރާތްތަކުން އަންނަ މަހުގެ 28 ވަނަ ދުވަހުގެ ނިޔަލަށް އެކަންކަން ރަނގަޅުކޮށް، އުސޫލަށް ފެއްތުމަށް އެފްޑީސީން ވަނީ އަންގާފައެވެ. އަދި މި ދީފައިވާ މުއްދަތުގެ ތެރޭގައި އިސްލާހު ނުކޮށްފިނަމަ، އެ ފަރާތްތަކާމެދު ފިޔަވަޅު އަޅައި ޖޫރިމަނާ ކުރާނެ ކަމުގެ އިންޒާރު ވެސް އެ ކޯޕަރޭޝަނުން ވަނީ ދީފައެވެ.

މި ފިޔަވަޅުތަކަކީ ޓަވަރުތަކުގައި ދިރިއުޅޭ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް އަޅަމުންދާ މުހިންމު ފިޔަވަޅުތަކެކެވެ. އެގޮތުން މި މަހުގެ ކުރީކޮޅު އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވަނީ "އަމާން އުދަރެސް" އަދި "އަމާން ދޯދި" ޓަވަރުތަކުގައި ދިރިއުޅޭ ކުޑަކުދިންނާއި ޚާއްސަ އެހީއަށް ބޭނުންވާ ފަރާތްތައް ފާހަގަކޮށް، އެ އެންމެންގެ ރައްކާތެރިކަން ކަށަވަރުކުރުމަށް އަޅަންޖެހޭ ފިޔަވަޅުތަކާ ގުޅޭގޮތުން މަޝްވަރާތައް ކުރިއަށްދާ ކަމަށް ވިދާޅުވެފައެވެ.