ނ. ވެލިދޫގައި ތަރައްޤީކުރަމުން އަންނަ ޖޫނިއަރ ކޮލެޖުގެ ބޮޑުބައެއް ނިމި، މުޅި މަޝްރޫޢުގެ 70 އިންސައްތަ މަސައްކަތް މިހާރު ފުރިހަމަކުރެވިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.

މި މަޝްރޫޢުގެ އެންމެ ފަހުގެ މަޢުލޫމާތު ހިއްސާކުރަމުން އެމްޓީސީސީން ބުނީ، މިހާރު ކުރިއަށްދަނީ އިމާރާތުގެ ކަރަންޓު ވަޔަރިންގ ކުރުމުގެ މަސައްކަތްތަކާއި، ފެނާއި ނަރުދަމާގެ ނިޒާމު ޤާއިމުކުރުމުގެ މަސައްކަތްތައް ކަމަށެވެ. އަދި ތާވަލާ އެއްގޮތަށް މުޅި މަޝްރޫޢުގެ މަސައްކަތް ނިންމުމަށް ބާރަށް މަސައްކަތް ކުރަމުންދާ ކަމަށް ވެސް އެ ކުންފުނިން މަޢުލޫމާތު ދެއެވެ.

ވެލިދޫގައި ޒަމާނީ ފެންވަރަށް ބިނާކުރާ މި ޖޫނިއަރ ކޮލެޖަކީ 2023 ވަނަ އަހަރުގެ އޮގަސްޓް މަހުގެ 11 ވަނަ ދުވަހު 11.91 މިލިއަން ރުފިޔާއަށް އެމްޓީސީސީއާ ހަވާލުކުރެވިގެން ކުރިއަށްގެންދާ މަޝްރޫޢެކެވެ.

މި މަޝްރޫޢު ނިމިގެންދާއިރު، ދަރިވަރުންނަށް ފަސޭހަކަމާއެކު އުނގެނުމުގެ ފުރުޞަތު ފަހިކޮށްދިނުމުގެ ގޮތުން ސްމާޓް ކްލާސްރޫމްތަކާއި، ޒަމާނީ އައިސީޓީ ލެބޯޓްރީއެއްގެ އިތުރުން މުއްސަނދި ލައިބްރަރީއެއް ޤާއިމުކުރެވިގެންދާނެއެވެ. މީގެއިތުރުން، އަމަލީ ތަޖުރިބާ ހޯދައިދިނުމަށާއި ތަފާތު ދާއިރާތަކުން ވޮކޭޝަނަލް ތަމްރީނުތައް ދިނުމަށް ޚާއްޞަ މަލްޓިޕާޕަސް ވޯކްޝޮޕްތަކެއް ވެސް މި އިމާރާތުގައި ހުންނާނެއެވެ.

ޤައުމީ ފެންވަރުގައި ހުނަރުވެރި، ޤާބިލު ޒުވާނުން ބިނާކުރުމަކީ މި ސަރުކާރުން ޚާއްޞަ އިސްކަމެއް ދީގެން ކުރިއަށްގެންދާ ސިޔާސަތެކެވެ. މި ސިޔާސަތުގެ ދަށުން، ރާއްޖޭގެ އެކި ކަންކޮޅުތަކަށް އަމާޒުކޮށްގެން ހަ ސަރަހައްދެއްގައި ޓިވެޓް (ޓެކްނިކަލް އެންޑް ވޮކޭޝަނަލް އެޑިޔުކޭޝަން އެންޑް ޓްރެއިނިންގ) ސެންޓަރުތައް ތަރައްޤީކުރުމުގެ މަސައްކަތް އެޑިއުކޭޝަން މިނިސްޓްރީން ދަނީ ކުރަމުންނެވެ.

އެޑިއުކޭޝަން މިނިސްޓްރީން ފާހަގަކުރާ ގޮތުގައި، މިފަދަ މަރުކަޒުތައް ޤާއިމުކުރެވި، ޒުވާނުންނަށް ބޭނުންވާ ފަންނީ ތަޢުލީމާއި ތަމްރީނު ފޯރުކޮށްދިނުމަކީ ރާއްޖޭގެ ތަރައްޤީ އައު ހަރުފަތަކަށް ގެންގޮސްދީ، ޤައުމުގެ އިޤްތިޞާދަށް ދިރުން ގެނެސްދޭނެ މުހިންމު ފިޔަވަޅެކެވެ.