ކަނޑުމަގުން ރާއްޖެއަށް ސިއްރުން އެތެރެކުރަން އުޅުނު 8.5 މިލިއަނަށްވުރެ ގިނަ ސިނގިރޭޓު، މޯލްޑިވްސް ކަސްޓަމްސް ސަރވިސްއިން ހިންގި ޚާއްޞަ އޮޕަރޭޝަނެއްގައި އަތުލައިގެންފިއެވެ.

ކަސްޓަމްސްއިން ހާމަކުރި ގޮތުގައި، މި ތަކެތި އަތުލައިގެންފައިވަނީ ކަނޑުމަގުން ރާއްޖެ ގެނައި މުދާ ޝިޕްމެންޓެއްގައި ޤާނޫނާއި ޤަވާޢިދާ ޚިލާފު ތަކެތި ހުރެދާނެ ކަމަށް ޝައްކުކުރެވިގެން ހިންގި ޚާއްޞަ އޮޕަރޭޝަނެއްގައެވެ. މި އޮޕަރޭޝަން ހިންގާފައިވަނީ ސެޕްޓެމްބަރު މަހުގެ 27 ވަނަ ދުވަހު މާލޭ ކޮމާޝަލް ހާބަރުގައެވެ.

ކަސްޓަމްސްގެ އޮފިޝަލުން އެ ޝިޕްމެންޓް ބަލައިފާސްކުރިއިރު، އެއީ "ޖެނެރަލް ކާގޯ" ގެ ގޮތުގައި ޑިކްލެއަރ ކޮށްފައިވާ ޝިޕްމެންޓެކެވެ. ނަމަވެސް، ކޮންޓޭނަރު ފާސްކުރުމުގެ ތެރޭގައި އެހެން މުދަލުގެ ތެރޭގައި ސިއްރުކޮށް، ފޮރުވައިގެން އެތެރެކުރަން މަސައްކަތްކުރި ގިނަ އަދަދެއްގެ ސިނގިރޭޓު ވަނީ ފެނިފައެވެ.

މި އޮޕަރޭޝަނުގައި ޖުމްލަ 8،527،480 ސިނގިރޭޓް ސްޓިކްސް ފެނިފައިވާ ކަމަށާއި، އެ ތަކެތި މިހާރު ވަނީ ކަސްޓަމްސްގެ ބެލުމުގެ ދަށަށް ގެނެވިފައި ކަމަށް އެ އިދާރާއިން މަޢުލޫމާތު ދެއެވެ.

މި މައްސަލައާ ގުޅިގެން ކަސްޓަމްސްއިން ބުނީ، ޤަވާޢިދާ ޚިލާފަށް މި މުދާތައް އެތެރެކުރަން އުޅުނު ފަރާތްތައް ހޯދުމަށާއި، މިކަމުގައި ޝާމިލުވާ ފަރާތްތަކާމެދު ޤާނޫނީ ފިޔަވަޅު އެޅުމަށްޓަކައި މި މައްސަލަ އިތުރަށް ތަޙުޤީޤު ކުރަމުންދާ ކަމަށެވެ.

ރާއްޖެއަށް ވަގަށް މުދާ އެތެރެކުރުން ހުއްޓުވުމަށާއި، ޚާއްޞަކޮށް ޑިއުޓީ ބޮޑު މުދާ ޤަވާޢިދާ ޚިލާފަށް އެތެރެކުރުން ހުއްޓުވުމަށް ކަސްޓަމްސްއިން ދަނީ ބޯޑަރުގެ ސަލާމަތީ ކަންކަން ވަރުގަދަކޮށް، ޚާއްޞަ ފިޔަވަޅުތަކެއް އަޅަމުންނެވެ.