ރައީސުލްޖުމްހޫރިއްޔާ ތަސްދީގު ކުރެއްވި އެއްގަމު ދަތުރުފަތުރުގެ އާ ގާނޫނަށް މިއަދުން ފެށިގެން އަމަލުކުރަން ފަށައިފިއެވެ.

މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް މުހިންމު އިސްލާހުތަކެއް ހިމަނައިގެން އެކުލަވާލި މި ގާނޫނަށް އަމަލުކުރަން ފެށުމާއެކު، މީގެ ކުރިން ބޭނުންކުރަމުން އައި އެއްގަމު ދަތުރުފަތުރުގެ ގާނޫނު ވަނީ އުވިގެން ގޮސްފައެވެ.

އާ ގާނޫނުގެ ދަށުން މާލެ ސަރަހައްދުގެ ދަތުރުފަތުރާއި ޓްރެފިކް މައްސަލަތައް ހައްލުކުރުމަށް "ގްރޭޓާ މާލެ ޓްރާންސްޕޯޓް އެންޑް މޮބިލިޓީ އޮފީސް" ގެ ނަމުގައި ހާއްސަ އިދާރާއެއް އުފެދޭނެއެވެ.

މިނިސްޓްރީގެ ދަށުން ހިންގާ މި އޮފީހުން މުޅި މާލޭގެ ޓްރެފިކް މޮނިޓާކުރުމަށް ޒަމާނީ ޓްރެފިކް ސެންޓަރެއް ކުރިއަށް އޮތް ހަ މަސްދުވަހުގެ ތެރޭގައި ގާއިމުކުރާނެއެވެ. މީގެ އިތުރުން މާލެ ސަރަހައްދުގައި ދުއްވޭނެ އުޅަނދުފަހަރުގެ އެންމެ މަތީ އަދަދު (ކެޕިންގް) ކަނޑައެޅުމުގެ މަސްއޫލިއްޔަތުވެސް، ކަމާބެހޭ ދިރާސާތަކަށްފަހު ނޭޝަނަލް ރޯޑް ސޭފްޓީ ކައުންސިލްގެ ލަފާގެ މަތިން ކުރިއަށްގެންދާނީ މި އޮފީހުންނެވެ.

މާލެ ސަރަހައްދުގެ އެއްގަމު ދަތުރުފަތުރުގެ ނިޒާމު ރާވައި ހިންގުމަށްޓަކައި "ލޭންޑް ޓްރާންސްޕޯޓް މޮބިލިޓީ ފަންޑު" ގެ ނަމުގައި ހާއްސަ ފަންޑެއް ވަނީ އުފައްދައިފައެވެ.

މި ފަންޑަށް ޖަމާކުރެވޭނީ އުޅަނދުފަހަރު ރަޖިސްޓްރީކުރުމާއި، ލައިސަންސް ފީ، އަހަރީ ފީ، މަލްޓިޕަލް އޯނަޝިޕް ފީ، އަދި ގާނޫނާ ހިލާފުވެގެން ކުރެވޭ ޖޫރިމަނާގެ ފައިސާއެވެ. މިއާއެކު މީގެ ކުރިން މާލޭ ސިޓީ ކައުންސިލުގެ ބަޖެޓަށް ލިބެމުންދިޔަ ވެހިކަލްތަކުގެ އަހަރީ ފީ ދެން ޖަމާވާނީ މި ފަންޑަށެވެ.

ގަވާއިދާ ހިލާފުވާ ފަރާތްތަކަށް ބޮޑެތި ޖޫރިމަނާތަކެއް އާ ގާނޫނުގައި ވަނީ ކަނޑައަޅައިފައެވެ. އެގޮތުން ފަރުވާކުޑަކޮށް ނުވަތަ ނުރައްކާތެރިކޮށް އުޅަނދު ދުއްވައިފިނަމަ 25,000 ރުފިޔާއާއި 100,000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ. އަދި އެފަދަ އަމަލެއްގެ ސަބަބުން މީހަކަށް އަނިޔާވެއްޖެނަމަ 100,000 ރުފިޔާއާއި 500,000 ރުފިޔާއާ ދެމެދުގެ ޖޫރިމަނާއެއްގެ އިތުރުން ޖިނާއީ ދައުވާ އުފުލޭނެއެވެ.

މީގެއިތުރުން ކުޑަކުއްޖަކަށް ނުވަތަ ލައިސަންސް ނެތް މީހަކަށް އުޅަނދުގެ ކޮންޓްރޯލް ދިނުމަކީވެސް ބޮޑެތި ޖޫރިމަނާތަކާއި ލައިސަންސް ހިފެހެއްޓުންފަދަ އަދަބުތައް ލިބޭނެ ކުށެކެވެ.

ގަވާއިދާ ހިލާފަށް ޕާކުކުރުމުގެ ސަބަބުން އަރާ ޖޫރިމަނާ 5,000 ރުފިޔާއަށްވުރެ ބޮޑުވެއްޖެނަމަ، ފައިސާ ދައްކައި ހަލާސްކުރަންދެން ފުލުހުންނަށް އެ އުޅަނދެއްގައި ތަޅު (ބޫޓު) އެޅުވޭނެއެވެ.

ތަޅު އަޅުވާތާ 72 ގަޑިއިރުގެ ތެރޭގައި ފައިސާ ނުދައްކައިފިނަމަ އުޅަނދު ޓޯކުރެވޭނެއެވެ. އަދި ޓޯކުރާ އުޅަނދާ ހަވާލުނުވެ އެއް މަސް ދުވަސްވެއްޖެނަމަ، ގެޒެޓުގައި އިއުލާނުކުރުމަށްފަހު އިތުރު 30 ދުވަހުގެ މުއްދަތެއް ދެވޭނެއެވެ. އެ މުއްދަތުގައިވެސް ވެރިފަރާތުން އުޅަނދާ ހަވާލުނުވެއްޖެނަމަ، ނީލަން ކިޔައިގެން ވިއްކާލުން ނުވަތަ ނައްތާލުމުގެ ބާރު ފުލުހުންނަށް ލިބިގެންވެއެވެ.

އާ ގާނޫނުގެ ދަށުން މާލެ ސަރަހައްދުގައި ދުއްވޭނެ އުޅަނދުފަހަރުގެ އުމުރު ކަނޑައެޅުމަށް ހަމަޖެހިފައިވީ ނަމަވެސް، އެ މާއްދާއަށް އަމަލުކުރަން ފަށާނީ ގާނޫނަށް އަމަލުކުރަން ފެށޭތާ ތިން އަހަރު ދުވަސް ފަހުންނެވެ. މިކަމާ ގުޅޭގޮތުން ޓްރާންސްޕޯޓް މިނިސްޓަރު މުހައްމަދު ސައީދު ވިދާޅުވެފައިވަނީ، އުޅަނދުތައް މުސްކުޅިވުމުން އުކާލަން ނުޖެހޭނެ ކަމަށާއި، އެ ތަކެއްޗަށް އެކަށީގެންވާ އަގެއް ވެރިފަރާތަށް ލިބޭނެ އިންތިޒާމު ސަރުކާރުން ހަމަޖައްސަވައިދެއްވާނެ ކަމަށެވެ.