އުމުރުން ދުވަސްވީ މީހުންނަކީ އާއިލާތަކާއި މުޖުތަމައުގެ ބިންގާ ކަމަށާއި، އެފަރާތްތަކަށް އަބުރުވެރި އަދި ރައްކާތެރި ދިރިއުޅުމެއް ކަށަވަރުކޮށްދިނުމަށް މުޅި މުޖުތަމައު އެކުގައި މަސައްކަތްކުރަންޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން، މެޑަމް ސާޖިދާ މުޙައްމަދު ވިދާޅުވެއްޖެއެވެ.

ބައިނަލްއަގުވާމީ ގޮތުން ފާހަގަކުރާ އުމުރުން ދުވަސްވީ މީހުންގެ ދުވަހުގެ މުނާސަބަތުގައި 'އެކްސް' ގައި ހިއްސާކުރެއްވި މެސެޖެއްގައި މެޑަމް ސާޖިދާ ވިދާޅުވީ، ދުވަސްވީ މީހުންނަކީ އަޅުގަނޑުމެންގެ ރިވެތި އާދަކާދަތައް ދަމަހައްޓަވައި، އެއް ޖީލުން އަނެއް ޖީލަށް މުހިންމު ތަޖުރިބާތަކާއި ހިކުމަތްތެރި ބަސްތައް ފޯރުކޮށްދެއްވާ މުހިންމު ބައެއް ކަމަށެވެ. އެހެންކަމުން، އެބޭފުޅުން މުޖުތަމައަށް ކޮށްދެއްވާ އަގުހުރި ޚިދުމަތްތައް އަބަދުވެސް ބަލައިގަންނަންޖެހޭ ކަމަށް އެކަމަނާ ފާހަގަކުރެއްވިއެވެ.

ރާއްޖޭގެ އާބާދީގައި ދުވަސްވީ މީހުންގެ ނިސްބަތް އިތުރުވަމުންދާކަން ފާހަގަކުރައްވަމުން އެކަމަނާ ވިދާޅުވީ، އިންސާނުން ދިރިއުޅޭ އުމުރު ދިގުވަމުންދާ މި ދަނޑިވަޅުގައި، ދިރިއުޅުމުގެ ކޮންމެ މަރުހަލާއެއްގައިވެސް އެކަކު އަނެކަކަށް އެހީތެރިކަމާއި އަޅާލުން ފޯރުކޮށްދޭނެ ގޮތްތަކާމެދު އަލުން ވިސްނަންޖެހިފައިވާ ކަމަށެވެ. އަދި އުމުރުން ދުވަސްވީ މީހުންނަށް މުޖުތަމައާ އޮންނަ ގުޅުން ބަދަހިކުރުމުގެ ފުރުސަތުތައް ފަހިކޮށްދީ، ދުޅަހެޔޮ، އުފާވެރި އަދި އަބުރުވެރި ދިރިއުޅުމެއް އުޅުމުގެ މަގު ތަނަވަސްކޮށްދިނުމަކީ މުހިންމު ކަމެއް ކަމުގައި ވިދާޅުވިއެވެ.

މީގެއިތުރުން، ދައުލަތުގެ ސިޔާސަތުތަކާ ގުޅޭގޮތުން ވާހަކަފުޅު ދައްކަވަމުން މެޑަމް ސާޖިދާ ވިދާޅުވީ، ސަރުކާރުގެ ސިޔާސަތުތަކަކީ ދުޅަހެޔޮ މުސްކުޅިވުމަކަށް އަމާޒުކުރެވިފައިވާ ސިޔާސަތުތަކަކަށް ވާންޖެހޭ ކަމަށެވެ. އެގޮތުން، ހަރުދަނާ ސިއްހީ ނިޒާމަކާއި، އިޖުތިމާއީ ރައްކާތެރިކަމާއި، އަދި އިގްތިސާދީ ފުރުސަތުތައް ހިމެނޭހެން ދާއިމީ ގޮތެއްގައި އިންވެސްޓްކުރެވޭނެ އިންތިޒާމުތައް ހަމަޖެހެންޖެހޭ ކަމަށް ބަޔާންކުރެއްވިއެވެ.

"ގައުމީ ތަރައްގީގެ މަގުގައި އުމުރުން ދުވަސްވީ މީހުންގެ ހިއްސާ އިތުރުކުރުމަކީ، އެންމެންގެ ބައިވެރިވުން ހިމެނޭ، އޯގާތެރި މުޖުތަމައެއް ބިނާކުރުމަށް ކޮންމެހެން މުހިންމު ކަމެކެވެ،" މެޑަމް ސާޖިދާ ވިދާޅުވިއެވެ.

އެކަމަނާގެ މެސެޖު ނިންމަވާލައްވަމުން ވަނީ، ސިއްހީ ގޮތުން ދުޅަހެޔޮ ދިރިއުޅުމެއްގައި ހޭދަކުރާ މުއްދަތު އިތުރުކޮށްދީ، މުސްކުޅިވުމުގައި އެކި މީހުންނަށް ކުރިމަތިވާ ތަފާތު ތަޖުރިބާތައް ދެނެގަނެ، ކޮންމެ މީހަކަށްމެ އަބުރުވެރިކަމާއި، މަގުސަދެއް އޮތް އަދި ރައްކާތެރި ދިރިއުޅުމެއް ކަށަވަރުކޮށްދިނުމަކީ އެންމެންގެ އަޒުމަކަށް ހެދުމަށް ގޮވާލައްވާފައެވެ.