ޣައްޒާގެ ޚާން ޔޫނިސްގެ އަލްމަވާސީ ސަރަޙައްދުގައި އިސްރާއީލުން ދިން ޑްރޯން ހަމަލާއެއްގައި، ކީރިތި ޤުރްއާން ހިތުދަސްކުރާ ފަރާތްތަކާ ބެހޭ ރިޕޯޓެއް ތައްޔާރުކުރުމުގެ މަސައްކަތުގައި އުޅުނު ފަލަސްޠީނުގެ ނޫސްވެރިޔާ އަދި އިމާމު މުޙައްމަދު އަބްދުލް ޢަޒީޒް އަލްނައްޖާރު ޝަހީދުވެއްޖެއެވެ.

އުމުރުން 38 އަހަރުގެ އަލްނައްޖާރަކީ ކީރިތި ޤުރްއާނާ ބެހޭ ރޭޑިއޯގެ ޕްރެޒެންޓަރެއްގެ އިތުރުން ޚާން ޔޫނިސްގެ މިސްކިތެއްގެ އިމާމެކެވެ.

އަލްނައްޖާރަކީ ޣައްޒާގެ އިރުމަތީ ޚުޒާޢާ ސަރަޙައްދުން ގެދޮރުގެއްލި، ރައްކާތެރިކަން ހޯދުމަށް މަވާސީ ސަރަޙައްދަށް ބަދަލުވެގެން އުޅުނު މީހެކެވެ. މި ހަނގުރާމައިގައި އޭނާގެ އަޚަކުވެސް ކުރިން ވަނީ އިސްރާއީލުގެ ހަމަލާތަކުގައި ޝަހީދުވެފައެވެ.

ނޫސްވެރިކަމުގެ މަސައްކަތުގައި މައިދާނަށް ނުކުމެ އުޅެނިކޮށް ދިން މި ހަމަލާއަށްފަހު، އޭނާގެ ހަށިގަނޑު ގެންގޮސްފައިވަނީ ޚާން ޔޫނިސްގެ ނާޞިރު މެޑިކަލް ކޮމްޕްލެކްސް އަށެވެ.

ޣައްޒާގެ ސަރުކާރުގެ މީޑިއާ އޮފީހުން މަޢުލޫމާތު ދޭ ގޮތުގައި، އިސްރާއީލުން ޣައްޒާއަށް ދެމުންދާ ހަމަލާތަކުގައި ޝަހީދުވާ ނޫސްވެރިންގެ އަދަދު ދަނީ ދުވަހުން ދުވަހަށް އިތުރުވަމުންނެވެ.

އަލްނައްޖާރު ޝަހީދުވުމާ ގުޅިގެން، މަސައްކަތުގެ މައިދާނުގައި ޚަބަރު ފެތުރުމުގެ މަސައްކަތުގައި އުޅެނިކޮށް އިސްރާއީލުގެ ހަމަލާތަކުގައި ޝަހީދުވި ނޫސްވެރިންގެ ދިގު ލިސްޓަށް އަނެއްކާވެސް އިތުރު ނަމެއް ވަނީ އިތުރުވެފައެވެ.