ރާއްޖޭގެ ކޮންމެ ރަށަކީ ވަކި ގައުމެއް ނޫން ކަމަށާއި ގެންގުޅެންޖެހޭނީ ސަރަހައްދީ ތަރައްގީގެ ވިސްނުން ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

މި އަހަރުގެ ޖުމްހޫރީ ދުވަސް ފާހަގަކުރުމަށް ރާއްޖޭގެ ދެކުނުގެ އަތޮޅުތަކުގެ ކައުންސިލްތައް ގުޅިގެން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ރާއްޖޭގެ ކޮންމެ ރަށަކީ ގައުމެއް ނޫން ކަމަށާއި ސަރަހައްދީ ތަރައްގީގެ ވިސްނުން ގެންގުޅެން ޖެހޭ ކަމަށެވެ.

ރައީސް ނަޝީދު ވިދާޅުވީ ރާއްޖެއަކީ ޖަޒީރާވަންތަ ގައުމެއް ކަމަށާއި ކޮންމެ ރަށެއްގެ ބޭރުގައި ބައިނަލްއަގްވާމީ ބަނދަރަކާއި، ބައިނަލް އަޤްވާމީ އެއާޕޯޓެއް އަޅަން ކޮންމެ ރައްޔިތަކު ވިސްނައިފިނަމަ ޖެހޭނީ ދެ މީދާ ފެހި ބުޅަލުގެ ހާލު ކަމަށާއި، އޭރުން އެކައްޗެއް ވެސް ހަމަޔަށް ރަނގަޅަށް ލިބިގެން ނުދާނެ ކަމަށެވެ.

ދެކުނުގެ ހަތަރު އަތޮޅުން މަޝްވަރާކުރުމަށްފަހު ތަރައްގީގެ އޮނިގަނޑެއް ރޭވެން ޖެހޭނެ ކަމަށާއި، ރައްޔިތުންގެ މަޖިލީހާއި ކައުންސިލްތަކުގައި ވެސް ތިއްބެވީ އެމްޑީޕީއަށް ނިސްބަތްވެވަޑައިގަންނަވާ މެމްބަރުން ކަމަށް ރައީސް ނަޝީދު ވިދާޅުވިއެވެ. އެހެންކަމުން ދެކުނުގެ ތަރައްޤީގެ ޕްލޭން އެބޭފުޅުންނަށް ރޭއްވެވޭނެ ކަމަށް ރައީސް ނަޝީދު ވިދާޅުވިއެވެ.

އަދި އަންނަ އަހަރުގެ މާޗް މަހު އޮންނަ ލޯކަލް ކައުންސިލްތަކުގެ އިންތިހާބާއެކު ކައުންސިލްތަކަށް ލިބެންޖެހޭ ގާނޫނީ ބާރުވެރިކަން ލިބިގެންދާނެ ކަމަށާއި، އެހެންކަމުން އެކަންކަމަށް ތައްޔާރަށް ތިއްބެވުމަށް ކައުންސިލްތަކުގެ ކިބައިން ރައީސް ނަޝީދު ވަނީ އެދިވަޑައިގެންފައެވެ.