ރައީސް ޔާމީންގެ މުދާ ދަޢުލަތަށް ނެގުން، ރައީސް ނާސިރުގެ މުދާ ދަޢުލަތަށް ނެގުމާ ހަމަހަމަ ނުކުރެވޭނެ ކަމަށް ރައްޔިތުންގެ މަޖިލީހުގެ މާލޭ މެމްބަރުކަން ކުރެއްވި އިބްރާހިމް އިސްމާޢީލް (އިބްރާ) ވިދާޅުވެއްޖެއެވެ.

މަަނީ ލޯންޑަރިންގެ ކުށް ސާބިތުވެ މިހާރުވެސް 5 އަހަރަށް ޖަލަށް ހުކުމްކޮށްފައިވަާ ރައީސް އަބްދުﷲ ޔާމީން ގެ މައްޗަށް ރ. ފުއްގިރި ކުއްޔަށް ދޫކުރުމާ ގުޅޭގޮތުން އުފުލާފައިވާ މަނީ ލޯންޑްރިންއާއި ރިޝްވަތު ގަބޫލު ކުރުމުގެ ކުށުގެ ދަޢުވާގައި އެމަނިކުފާނުގެ މުދާ ދައުލަތަށް ނެގުމުގެ އަމުރަކަށް ދައުލަތުން ކުރިމިނަލް ކޯޓުގައި ވަނީ އެދިފައެވެ. އެކަމާ ގުޅިގެން ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް ޢުމަރު ވަނީ ރައީސް ނާސިރުގެ މުދާވެސް ސަރުކާރަށް ނެގިކަމަށް ވިދާޅުވެފައެވެ. ނަމަވެސް އެކަމުން ޤައުމަށް ލިބުނު ފައިދާއެއް އަދި ރައްޔިތުންނަށް ޙާސިލް ކުރެވުނު ކަމެއްވެސް ނެތްކަމަށް އާދަމް ޝަރީފް ވިދާޅުވިއެވެ. އަދި މިއީ ސަރުކާރު ބަލިކަށިވަމުންދާތީ ކުރިީގެ ރައީސް ނާސިރާއި މެދު ޢަމަލުކުރި ގޮތަށް ރައީސް ޔާމީން އާއި މެދު ވެސް ޢަމަލުކުރުމަށް ސަރުކާރުން ކުރާ ކަމެއް ކަމަށް އާދަމް ޝަރީފް ވިދާޅުވިއެވެ.

އާދަމް ޝަރީފްގެ ވާހަކަތަކަށް ރައްދު ދެއްވަމުން އެމްޑީޕީގެ ކުރީގެ ރައީސް އިބްރާހިމް އިސްމާޢީލް (އިބްރާ) ވިދާޅުވީ، ރައީސް ޔާމީންގެ މުދާ ދަޢުލަތަށް ނެގުން، ރައީސް ނާސިރުގެ މުދާ ދަޢުލަތަށް ނެގުމާ ހަމަހަމަ ނުކުރެވޭނެ ކަމަށެވެ. އެގޮތުން ރައީސް ނާސިރުގެ މުދާ ދަޢުލަތަށް ނެގީ ސަރުކާރުގެ ބޭނުމަށް އެ މުދާ ނަންގަވަން ބޭނުންވެގެން ކަމަށް އިބްރާ ވިދާޅުވިއެވެ. އިބްރާ ވިދާޅުވީ، ރައީސް ނާސިރުގެ މައްޗަށް ސާބިތުކުރެވުނު ކުށެއް ނެތްކަމަށާއި، ކުރެވުނު ތަޙުޤީޤުތަކުންވެސް ރައީސް ނާސިރުގެ މައްޗަށް ކުށެއް ސާބިތުވާ ވަރުވެ ހެއްކެއް ނުފެނުނު ކަމަށެވެ. ނަމަވެސް ރައީސް ޔާމީންގެ މައްޗަށް ކުށް ސާބިތުވީ ހުޅުވިފައިވާ ޝަރީޢަތެއްގައި ކަމަށް އިބްރާ ވިދާޅުވިއެވެ.

"އޭ ޝަރީފް. ކިޔޭ ނުކިޔޭ ނޭނގިހުރެ އަނގަ ނުހުޅުވައްޗޭ." ރައީސް ޔާމީންގެ މުދާ ދަޢުލަތަށް ނެގުން، ރައީސް ނާސިރުގެ މުދާ ދަޢުލަތަށް ނެގުމާ ހަމަހަމަ ކުރުމުން ކޯފާ އިސްކުރަށްވައި އާދަމް ޝަރީފަށް ނިސްބަތްކޮށުރަށް އިބްރާ ވިދާޅުވިއެވެ.

Bala @ibramandhu! evves kameh saabithu nuvaairu ves Nasir ge mudhaa nunagaatha? RY jalah laafaivanee MPS ah hushahelhu massala akah noon. Nuhaqqun, nubai shareeatheh kohfai! E shareeaiy aduehi, zaathee thaa'ssobeh neiy komme meehaku RY ge e shareeaiy kuree goaskan qabool kuraane!

— Adam Shareef Umar (@Adamshareefz) January 7, 2021

އިބްރާއަށް ރައްދު ދެއްވަމުން އާދަމް ޝަރީފް ވަނީ، އެއްވެސް ކުށެއް ސާބިތުނުވެ ރައީސް ނާސިރުގެ މުދާ ދަޢުލަތަށް ނުނަންގަވާތޯ ސުވާލު ކުރަށްވާފައެވެ. އަދި ރައީސް ޔާމީން ޖަލަށް ލާފައިވަނީ ފުލުހުންނަށް ހުށައެޅުނު މައްސަލާގައި ނޫންކަމަށް އާދަމް ޝަރީފް ވިދާޅުވެފައިވެއެވެ. އެއީ ނުޙައްޤު ނުބައި ޝަރީޢަތެއް ކަމަށާއި، ޒާތީ ތަޢައްސަބެއް ނެތް ކޮންމެ މީހަކު ރައީސް ޔާމީންގެ އެ ޝަރީޢަތް ކުރީ ގޯސްކޮށްކަން ޤަބޫލު ކުރާނެ ކަމަށް އާދަމް ޝަރީފް ވިދާޅުވިއެވެ.

އެކަމާ ގުޅިގެން އިބްރާ ވަނީ ރައީސް ނާސިރާއި، ރައީސް ޔާމީން އެއް ތިލަފަތަކުން ކިރަން އުޅުމަކީ އާދަމް ޝަރީފްގެ ހުރި ޖާހިލުކަމާއި ގޮތްނެތްކަން ކަމަށް ވިދާޅުވެފައެވެ. އަދި މަޖިލީހުގެ މެމްބަރަކަށް ހުރެ އެޒާތުގެ ވާހަކަ ދެއްކުމަކީ ހުތުރު ކަމެއް ކަމަށް އިބްރާ ވިދާޅުވިއެވެ. މީގެއިތުރުން ޝަރީފަކީ ޑިފެންސް މިނިސްޓަރަކަށް ހުރެގެން ސިފައިން ފޮނުވައިގެން މަޖިލީސް ބަންދު ކުރި މީހެއް ކަމަށާއި، ޤާނޫނު އަސާސީގެ ބާރު ކަނޑުވާލި މީހެއް ކަމަށް އިބްރާ ވިދާޅުވިއެވެ. އިބްރާ ވިދާޅުވީ، ރައީސް ނާސިރު ކުރެއްވި ވަރުގެ ވެރިކަމެއް މި ރާއްޖޭގެ ތާރީޚުންވެސް ފެންނަން ނެތް ކަމަށެވެ.

"ޤާނޫނު ހިންގުނު. ދަރަނިވެރިއެއް ނުވޭ. އިސްތިޤްލާލް ދެމެހެއްޓުނު. ވައްކަމެއް ނުކުރަށްވާ. ރައީސް ޔާމީން ގެންނެވި ތަރައްޤީއެއް ނުފެނޭ. ޖީލުތަކަށް ޤައުމު ދަރުވާލާފަ ކޮންކްރީޓް އެޅުން އެއީ ތަރައްޤީ؟ ރައީސް ނާސިރު ވެރިކަން ނިންމެވީ ރާއްޖެ ދަރަނިވެރި ނުކުރަށްވާ ރާއްޖޭގެ ކޮންމެ ބޮލަކަށް 20 ރުފިޔާގެ މަގުން ރައްޔިތުން ވިޔަފާރި ހިންގަން އަތޮޅު ކޮމިޓީތަކާ ޙަވާލު ކުރަށްވާފައި. ރައީސް ޔާމީން ވަޑައިގަތީ ރާއްޖެ ބިލިއަނުން ދަރުވާލާފައި އޭގެން ބޮޑު ބައެއް އަމިއްލަފުޅު ޖީބަށް ލައްވައިގެން." އިބްރާ ވިދާޅުވިއެވެ.

އިބްރާގެ ވާހަކަތަކަށް ރައްދު ދެއްވާ އާދަމް ޝަރީފް ވިދާޅުވީ، ރައީސް ޔާމީން ގެންނެވި ތަރައްޤީވެސް ފެންނާނެ ކަމަށާއި، އަދި އެ ތަރައްޤީ ރައީސް ނާސިރުގެ ތަރައްޤީއާއި އަޅާކިޔަން ބޭނުން ނުވާ ކަމަށެވެ. އަދި އިބްރާ ދައްކަވަނީ މައްސަލައާ ގުޅުންހުރި ވާހަކަތަކެއް ނޫންކަމަށް އާދަމް ޝަރީފް ވިދާޅުވިއެވެ.

"މިދައްކަނީ މީގެ 40 އަހަރު ކުރިން ކަންކުރިގޮތަށް މިހާރުވެސް ސަރުކާރުން ކަންކުރާ ވާހަކަ. ބަދަލު ހިފާ ވާހަކަ. އިންސާފުވެރި ޝަރީއަތަކުން ފައިސަލާ ނުކޮށް ބަދަލު ހިފާ ވާހަކަ. މަރުޙޫމް ނާސިރަށް އަޅުގަނޑުގެ ފުރިހަމަ ޤަދަރާއި އިޙްތިރާމް ކުރަން. އަޅާކިޔަނީކީވެސް ނޫން." އާދަމް ޝަރީފް ވިދާޅުވިއެވެ.

ޓޫރިޒަމް މިނިސްޓްރީއާއި އެމްއެމްޕީއާރްސީ މެދުވެރިކޮށް ރިސޯޓެއްގެ ގޮތުގައި ތަރައްގީ ކުރުމަށްޓަކައި ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެން ރައީސް ޔާމީންގެ މައްޗަށް އުފުލާފައިވާ މަނީ ލޯންޑްރިން އާއި ރިޝްވަތު ގަބޫލު ކުރުމުގެ ކުށުގެ ދައުވާގައި އިއްޔެ ބޭއްވި އިބްތިދާއީ އަޑުއެހުމުގައި ދަޢުލަތުން ބުނެފައިވަނީ، ރައީސް ޔާމީން ނުފޫޒު ބޭނުންކުރަށްވައިގެން މއ. ކުރިކީލަހިޔާ އަހުމަދު ކްރިކް ރިޒާ މެދުވެރިކޮށް ރިޝްވަތުގެ ގޮތުގައި 1،117،000 ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުންކުރަށްވައިގެން އެ ފައިސާ ލޯންޑާކުރުމަށްޓަކައި ފަށަލަކޮށްފައިވާ ކަމަށެވެ.

އަދި އެ ދައުވާއާ ގުޅިގެން ފުއްގިރި ކުއްޔަށް ދީގެން ރައީސް ޔާމީން ރިޝްވަތުގެ ގޮތުގައި ނެގި 1 މިލިއަން ޑޮލަރާއި އެމަނިކުފާނުގެ މިލްކިއްޔާތުގައި ހުރި އާމްދަނީ އާއި ނުބައްދަލު މުދާ ދައުލަތަށް ނެގުމުގެ އަމުރަކަށްވެސް ދަޢުލަތުން ވަނީ އެދިފައެވެ. އެ ދައުވާ ސާބިތުވެއްޖެނަމަ ރައީސް ޔާމީން އަށް ތިން އަހަރުގެ ޖަލު ހުކުމެއް އަންނާނެއެވެ.