އިދިކޮޅު ކޯލިޝަނުން މިއަދު ކުރިއަށް ގެންދާ މުޒާހަރާގެ ތެރެއިން 31 މީހަކު ހައްޔަރު ކޮށްފި އެވެ.

ފުލުހުން ބުނީ މިއަދުގެ މުޒާހަރާގެ ތެރެއިން މިހާތަނަށް 31 މީހަކު ހައްޔަރުކޮށްފައިވާ ކަމަށެވެ. މިއަދު ކުރިއަށްދާ މުޒާހަރާއަކީ ޤާނޫނީ އިމުގެ ބޭރުން ކުރާ މުޒާހަރާއެއްކަމަށް ބުނެ މުޒާހަރާ ހުއްޓުވާނެ ކަމުގެ އިންޒާރު ފުލުހުންވަނީ ދީފައެވެ. އަދި ފުލުހުން ވަނީ ޕީޕީއެމްގެ އޮފީހަށް ދެވެން އޮތް ހުރިހާ މަގެއް މުޒާހަރާ ފެށުމުގެ ކުރިން ބަންދުކޮށްފައެވެ.

މިއަދުގެ މުޒާހަރާ އިރުއޮއްސި 6 ގެ ފަހުންވެސް ހުއްޓާނުލާ ކުރިއަށް ގެންދާނެ ކަމަށް ޕީޕީއެމްގެ ފަރެސްމާތޮޑާ ދާއިރާގެ މެމްބަރު ޙުސައިން މުޙައްމަދު ލަތީފް ވިދާޅުވުމާ ގުޅިގެން މުޒާހަރާ އަދިވެސް ދަނީ ކުރިއަށެވެ. އިދިކޮޅުން މުޒާހަރާ ކުރަމުން ދަނީ މާލޭގެ އެކި ސަރަޙައްދުތަކުގައި ގްރޫޕް ގްރޫޕަށް ވަކިވަކިންނެވެ.

އިދިކޮޅު ފަރާތްތަކުން މާލޭގައި މިއަދު މުޒާހަރާކުރަމުން ދާއިރު އެޗްޕީއޭއިން ވަނީ މަގުތަކަށް އެއްފަހަރާ 5 މީހުންނަށްވުރެ ގިނަ މީހުން އެއްވެ ނޫޅެވޭނެކަން އަންގާފައެވެ.