ކޯވިޑް-19 ފެތުރުން ކޮންޓްރޯލް ކުރުމަށް އަޅަމުން އަންނަ ފިޔަވަޅުތަކަށް އެއްބާރުލުން ދެއްވުމަށް ދާޚިލީ ވަޒީރު އިމްރާން އަބްދުﷲ އެދިވަޑައިގެންފިއެވެ.

ކޯވިޑް-19 ރާއްޖޭގައި ފެތުރެން ފެށިފަހުން މިހާތަނަށްވެސް މިފަދަ އެއްވެސް އެއްޗެއް ވިދާޅުވެ ވަރަށް ހަނުހިމޭންކޮށް އުޅުއްވާކަން ފާހަގަ ވެފައިވާ، ޝައިޚް އިމްރާން މިއަދު ކުރެއްވި ޓުވީޓެއްގައި ވިދާޅުވީ، މި ހުތޫރަތްތެރި ވަގުތު ގިނަ ރައްޔިތުންގެ ކިޔަމަންތެރިކަން ވަރަށް ބޮޑަށް ފާހަގަކުރެވޭ ކަމަށެވެ. އަދި ކޯވިޑް-19 ގެ ނުރައްކާތެރިކަން ފުޅާވަމުންދާއިރު ބަލި ފެތުރުން ކޮންޓްރޯލް ކުރުމަށް އަޅަމުން އަންނަ ފިޔަވަޅުތަކަށް ކެތްތެރިކަމާއެކު އެއްބާރުލުން ދެއްވުމަށް ހުރިހާ ރައްޔިތުންގެ ކިބައިން އިމްރާން ވަނީ އެދިވަޑައިގެންފައެވެ.

ކޯވިޑް-19 ގެ ސަބަބުން ރާއްޖޭގައި އާއްމު ސިއްޙަތުގެ ކުއްލި ނުރައްކަލުގެ ޙާލަތު އިޢުލާން ކޮށްފައިވާއިރު، މާލެ ލޮކްޑައުންކޮށް ރާއްޖޭގެ އެއްރަށުން އަނެއް ރަށަށް އަރާފޭބުން އެޗްޕީއޭ އިން ވަނީ މަނާކޮށްފައެވެ.

ރާއްޖޭގައި ކޯވިޑް-19 އަށް ޕޮޒިޓިވްވި މީހުންގެ ޖުމްލަ 468 އަށް ވަނީ އަރާފައެވެ.

މާލޭގެ އިތުރުން ރާއްޖޭގެ ބައެއް ރަށްރަށުންވެސް މިހާރު ވަނީ ކޯވިޑް-19 ގެ ބަލިމީހުން ފެނިފައެވެ. އޭގެ ތެރޭގައި ހއ. ތަކަންދޫ އާއި، ށ. ނަރުދޫގެ އިތުރުން ށ. މިލަންދޫއާއި، ކ. ތުލުސްދޫ ހިމެނެއެވެ.