އެސްޓީއޯގެ މުވައްޒަފަކު ކޯވިޑް-19 އަށް ޕޮޒިޓިވްވެފައިވާތީ އެ ކުންފުނީގެ ބައެއް ތަންތަން މިރޭ ޑިސް އިންފެކްޓް ކުރަން ނިންމައިފިއެވެ.

ނޭޝަނަލް އިމަރޖެންސީ އޮޕަރޭޝަންސް ސެންޓަރުން މިރޭ ބޭއްވި ނޫސްވެރިންގެ ބައްދަލުވުމުގައި ޓާސްކްފޯސްގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ އެސްޓީއޯއިން ޕޮޒިޓިވްވި މުވައްޒަފަކީ އެސްޓީއޯގެ ލޭބާ ކުއާޓާއެއްގައި ދިރިއުޅޭ މީހެއް ކަމަށެވެ.

"މިކަމާ ގުޅިގެން އެސްޓީއޯ ސުޕަމާކެޓް އަދި އެސްޓީއޯ ޓްރޭޑް ސެންޓަރު އަދި އަމީނީ މަގު، މާފަންނުގައި ހުންނަ އެސްޓީއޯގެ ލޭބާ ކުއާޓާ ވަނީ މޮނީޓަރިން ހާލަތަށް ގެނެވިފައި،" މަބްރޫކް ވިދާޅުވިއެވެ.

މަބްރޫކް ވިދާޅުވީ އެސްޓީއޯ ސުޕަމާކެޓާއި އެސްޓީއޯ ޓްރޭޑް ސެންޓަރުގެ ގުދަން ޑީކޮންޓެމިނޭޓް ކުރުމުގެ މަސައްކަތް ކުރިއަށްދާ ކަމަށެވެ.

އަދި މިރޭ ގާތްގަނޑަކަށް 11 ޖަހާއިރު ޑީކޮންޓެމިނޭޝަންގެ މަސައްކަތް ނިންމުމަށްފަހުގައި އެސްޓީއޯ ސުޕަމާކެޓާއި ގުދަން އާންމު ހާލަތަށް ގެނެވޭނެ ކަމަށް މަބްރޫކް ވިދާޅުވިއެވެ.

އެސްޓީއޯގެ މުވައްޒަފަކު ކޯވިޑް-19 އަށް ޕޮޒިޓިވްވުމާއެކު އެކުންފުނިން އޮންލައިންކޮށް ވިޔަފާރި ކުރެވޭ "އެސްޓީއޯ-އީސްޓޯ"ގެ ހިދުމަތް ވެސް މިއަދަށް ވަނީ މެދުކަނޑާލާފައެވެ. ނަމަވެސް މާދަމާ އީ-ސްޓޯގެ ހިދުމަތް އަލުން ފެށޭނެ ކަމަށް މަބްރޫކް ވިދާޅުވިއެވެ.