ރައީސް ނަޝީދަށް ދިން ޙަމަލާއަށް ފަންޑުކޮށްފައިވަނީ، ރައީސް ނަޝީދުގެ "އޮރިޔާމުން" ނޫން ކަމަށް އެމްޑީޕީގެ ކުރީގެ ރައީސް އިބްރާހިމް އިސްމާޢީލް (އިބްރާ) ވިދާޅުވެއްޖެއެވެ.

މިމަހުގެ 6 ވަނަ ދުވަހުގެރޭ ރައީސް ނަޝީދު އަވަހާރަކޮށްލުމަށް އައިއީޑީއެއް ގޮއްވާލައިގެން ދިން ޙަމަލާއަށް ފަންޑު ކުރި މީހުން ހޯދުން އަވަސް ކުރުމަށް ސޯޝަލްމީޑިއާގައި ގޮވާލާއަޑުތައް ގަދަވާން ފެށުމުން އެކަމަށް ރައްދުދެއްވަމުން އިބްރާ މިއަދު ވިދާޅުވީ ގައިމުވެސް އެކަމަށް ފަންޑުކުރީ ރައީސް ނަޝީދުގެ "އޮރިޔާމުން" ނޫން ކަމަށެވެ. އެކަމާ ގުޅިގެން ގިނަ ބަޔަކު އަންނަނީ މިއީ އިބްރާފަދަ ތަޢުލީމީ ދާއިރާގައި އިސްކޮށް މަސައްކަތް ކުރަށްވާ ބޭފުޅެއްގެ ބަސްމަގު މިދަނޑިވަޅުގައި ހުންނަންވާނެ ގޮތް ނޫން ކަމަށް ބުނަމުންނެވެ.

ރައީސް ނަޝީދު ގެންގުޅުއްވާ ޓްވިޓަރ އެކައުންޓެއް ކަމަށްބުނެ ގިނަ ބަޔަކު ޓްވިޓާގައި ފޮލޯކުރާ އެލެކްސް އަހުމަދުގެ ޓްވިޓަރ އެކައުންޓުން އިއްޔެ ވަނީ ރައީސް ނަޝީދަށް އަމާޒުކޮށް ގޮއްވާލި އައިއީޑީގައި ލިބުނު ޒަޚަމްތައް ފަސޭހަވަމުން އަންނަ ފޮޓޯއެއް ޢާއްމުކޮށްފައެވެ. އެލެކްސް ބުނެފައިވަނީ ވީގޮތް އަދިވެސް ބައެއް ފަރާތްތަކަށް މުޅިން ސާފު ނުވާތީ ފޮޓޯ ޙިއްސާކުރީކަމަށެވެ.

Gaimuves emanikufaanuge oriyaameh noon.

— Ibra - Unapologetically for Justice (@ibramandhu) May 22, 2021

މީގެ ކުރިން އިބްރާ ވިދާޅުވެފައި ވަނީ، ރައީސް ނަޝީދަށް ޙަމަލާ ދިނުމަކީ ހިތާމަވެރި ކަމެއް ކަމަށާއި، ނަމަވެސް އަނިޔާތައް ލިބުނުކަން ބަޔަކަށް ސާބިތުކޮށްދިނުމަށް ހަށިކޮޅުގެ ފޮޓޯތައް ސޯޝަލްމީޑިއާގައި ޙިއްސާކުރުމަކީ އައިބުކަމެއް ކަމަށެވެ. އަދި މަޖިލީހުގެ ރައީސް ފަދަ ބޭފުޅެއްގެ ބޭސްފަރުވާގެ ކަންތައްތައް ސިއްރެއްގެ ގޮތުގައި ހިފަހައްޓަން ޖެހޭ ކަމަށް އިބްރާ ވިދާޅުވިއެވެ.

މާލޭގެ ނީލޯފަރުމަގުގައި މިމަހުގެ 6 ވަނަ ދުވަހުގެރޭ 8:27 ހާއިރު ބާރުގަދަ އެއްޗެއް ގޮއްވާލައި ރައީސް ނަޝީދަށް ލިބިވަޑައިގެންނެވި އަނިޔާތަކަށް އޭޑީކޭގައި 16 ގަޑިއިރުގެ ސާޖަރީތަކެއް ހެއްދެވުމަށްފަހު، އިތުރު ފަރުވާހޯއްދެވުމަށް އެމަނިކުފާނު މިހާރު ވަޑައިގެންވީ ޖަރުމަނުވިލާތުގައެވެ. ޖަރުމަނު ހޮސްޕިޓަލުން އިތުރު ފަރުވާ ހޯއްދެވުމަށް ފަހު އިއްޔެ ހޮސްޕިޓަލުން ވަނީ ރައީސް ނަޝީދު ޑިސްޗާޖް ކޮށްފައެވެ.