އެމްއެމްޕީއާރުސީ ގެ ޚިޔާނާތުގެ މައްސަލަ އަވަހަށް ބަލައި، އެފައިސާ ދައުލަތަށް އަވަހަށް ހޯދުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން ހުށަހަޅައިފިއެވެ.

އެ ކޮމިޓީން މިގޮތަށް ހުށަހަޅާފައި ވަނީ، ކޯވިޑް-19 އާ ގުޅިގެން ސަރުކާރުން ކުރަމުން އަންނަ ކަންކަމާމެދު ރައްޔިތުންގެ މަޖިލީހުން ދެކޭގޮތް ކަނޑައެޅުމަށް ކުރިއަށް ގެންދާ މަސައްކަތްތަކުގެ ތެރެއިން އެކޮމިޓީގެ މެންޑޭޓްގެ ތެރޭގައި ހިމެނޭ ކަންކަމާ ގުޅުންހުރި ފަރާތްތަކުން ޢަމަލު ކުރަންޖެހޭ ގޮތާ ގުޅޭގޮތުން މަޖިލީހުގެ ތަޅުމަށް ފޮނުވި ރިޕޯޓްގައެވެ.

އެގޮތުން ދަޢުލަތަށް ހިޔާނާތްތެރި ވުމުގެ ސަބަބުން ދައުލަތުން ގެއްލިފައިވާ ފައިސާތައް ހޯދުމަށް ރައީސުލް ޖުމްހޫރިއްޔާ އިބްރާހީމް މުހައްމަދު ޞާލިޙް އުފައްދަވާފައިވާ އެސެޓް ރިކަވަރީ ކޮމިޝަނުން ބަލަމުން އަންނަ ދައުލަތުން ވައްކަންކޮށްފައިވާ މައްސަލަތަކާއި، ހިޔާނާތުުގެ ބޮޑެތި މައްސަލަތައް އަވަހަށް ބަލައި، އެފައިސާތައް ދައުލަތަށް އަވަހަށް ހޯދުމަށް ވަނީ ހުށައަޅާފައެވެ.

އެ ރިޕޯޓުގައި ވަނީ، މި ވަގުތަކީ ޤައުމުގެ ސަލާމަތީ ކަންކަމަށް ފާރަވެރިވެ ތިބެން ޖެހޭ ވަގުތެއްކަމަށް ވީހިނދު، އެސެޓް ރިކަވަރީން ބަލަމުން އަންނަ، ދައުލަތުން ވައްކަންކޮށްފައިވާ މައްސަލަތަކާއި އަދި، އެމްއެމްޕީއާރުސީގެ ހިޔާނާތް ފަދަ ބޮޑެތި މައްސަލަތައް އަވަހަށް ބަލައި، އެފައިސާ ދައުލަތަށް އަވަހަށް ހޯދަންޖެހޭ ކަމަށެވެ.

އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާންކޮށްފައިވާ މިދަނޑިވަޅުގައިވެސް، އެސެޓް ރިކަވަރީ ކޮމިޝަންގެ އިތުރުން، މަރާލާފައިވާ މީހުންނާއި، ގެއްލިފައިވާ މީހުންގެ މައްސަލަތައް ތަހްގީގުކުރާ ކޮމިޝަނާއި، އަދި ދައުލަތުގެ އެކިއެކި އިދާރާތަކުން ކުރިއަށްގެންދާ ބޮޑެތި މައްސަލަތައް، އެޗްޕީއޭ އިން ކަނޑައަޅާފައިވާ ހާއްސަ އުސޫލުތަކާ އެއްގޮތްވާ ގޮތުގެމަތިން މެދުކެނޑުމެއްނެތި ކުރިއަށް ގެންދެވޭނެ އިންތިޒާމުތައް ހަމަޖެއްސުމަށް ވެސް ކޮމިޓީ ރިޕޯޓްގައި ހުށައަޅާފައިވެއެވެ.

މީގެ އިތުރުން މިހާލަތުގައި، ސަރުކާރުންނާއި ވަކިން ހާއްސަކޮށް ސަލާމަތީ ހިދުމަތްތަކުން އަޅަން ޖެހޭ ފިޔަވަޅުތައް ލަސް ނުކޮށް އެޅުމަށް ކޮމިޓީ ރިޕޯޓުގައި ވަނީ ލަފާދީފައެވެ.