އިއްޔެގެ ނިޔަލަށް މާލެ ސަރަަޙައްދުން 15947 މީހުން ފިތުރު ޒަކާތް ދައްކައިފިއެވެ.

އިސްލާމިކް މިނިސްޓްރީން ބުނީ، މިއަހަރުގެ ފިތުރު ޒަކާތް ދެއްކުމަށް ހަތަރު ގޮތެއް ހަމަޖައްސާފައިވާ ކަމަށެވެ. އެއީ ދިރާގު ޕޭ އެންޑް ލައިފްސްޓައިލް އެޕްލިކޭޝަން އަދި އެސްއެމްއެސް މެދުވެރިކޮށްނާއި އުރީދޫ އެމްފައިސާ އެޕްލިކޭޝަން އަދި އެސްއެމްއެސް މެދުވެރިކޮށެވެ.

އޭގެ އިތުރުން މޯލްޑިވްސް އިސްލާމިކް ބޭންކުގެ އޮންލައިން ބޭންކިން، "ފައިސާ ނެޓް" އަދި މޯބައިލް ބޭންކިން، "ފައިސާމޮބައިލް" މެދުވެރިކޮށްނާއި ބޭންކް އޮފް މޯލްޑިވްސްގެ ވެބްސައިޓް މެދުވެރިކޮށް ވެސް ފިތުރު ޒަކާތް ދެއްކޭނެ ކަމަށް އިސްލާމިކް މިނިސްޓްރީން ބުނެއެވެ.

އިސްލާމިކް މިނިސްޓްރީން ބުނީ މިހާތަނަށް 690،172 ރުފިޔާ ޒަކާތުގެ ގޮތުގައި ދައްކާފައިވާ ކަމަށެވެ.

މާލެ ސަރަހައްދުގައި ފިތުރު ޒަކާތް ދެއްކުން އޮންލައިންކޮށް ހަމަޖެއްސި ނަމަވެސް ރަށްރަށުގައި ފިތުރު ޒަކާތް ބަލައިގަތުމުގެ އިންތިޒާމް ހަމަޖައްސާނީ އެރަށެއްގެ ރަށު އަދި ސިޓީ ކައުންސިލްތަކުންނެވެ.

އިސްލާމިކް މިނިސްޓްރީން ބުނީ، މިހާރު ކުރިމަތިވެފައިވާ ހާލަތު ރޯދަމަހުގެ ތެރޭގައި ރަނގަޅުވެ އާންމު ހާލަތަކަށް އަތުވެއްޖެނަމަ އެހެން އަހަރުތަކެކޭ އެއްގޮތަށް މިނިސްޓްރީގެ ހޯލުން ފިތުރު ޒަކާތް ބަލައިގަތުމުގެ އިންތިޒާމް ހަމަޖައްސާނެ ކަމަށެވެ.