ގުޅީފަޅުގައި ވޯކާސް ވިލެޖެއް ތަރައްޤީކޮށް 40،000 ބިދޭސީ މަސައްކަތްތެރިންނަށް، އެމީހުން ވަޒީފާއަށް ގެންނަ ފަރާތުގެ ޚަރަދުގައި ބޯހިޔާވަހިކަން ހަމަޖައްސައި ދިނުމަށް ސަރުކާރުން ނިންމައިފިއެވެ.

ރަސްމީ ލިޔެކިޔުންނެތް ބިދޭސީ މަސައްކަތްތެރިންގެ މައްސަލަ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީން ދިރާސާކޮށް ނިންމި ގޮތުގެ ރިޕޯޓުގައި ވަނީ އެކަމުގައި އިކޮނޮމިކް މިނިސްޓްރީން ދީފައިވާ މައުލޫމާތުތައް ހިމަނާފައެވެ.

މިނިސްޓްރީން ދީފައިވާ މައުލޫމާތުތަކުގައިވާ ގޮތުން މާލެ ސަރަޙައްދާ ކައިރިން ގުޅިފަޅުގައި 30 ހެކްޓަރުގެ ބިމެއްގައި "ވޯކާސް ވިލެޖެއް" ގާއިމްކޮށް ގާތްގަނޑަކަށް 40،000 ބިދޭސީ މަސައްކަތްތެރިންނަށް އެފަރާތްތަކުގެ ވެރިފަރާތުގެ ހަރަދުގައި ކެއިން ބުއިން ލިބޭފަދަ ގޮތަކަށް އެކޮމޮޑޭޝަން ހަމަޖެއްސުމަށް ކަނޑައަޅާފައި ވެއެވެ.

މީގެ އިތުރުން ކޯވިޑް-19 އާ ގުޅިގެން ރާއްޖޭގެ އިގްތިޞާދު ހީނަރުވަމުން ދިއުމުގެ ސަބަބުން އަމިއްލަ މަސައްކަތްތެރިންގެ ވަޒީފާ ގެއްލެމުންދިއުމުގެ ތެރެއިން ދިވެހިރާއްޖޭގައި މަސައްކަތްކުރާ ބިދޭސީ މަސައްކަތްތެރިންގެ ވެސް ވަޒީފާ ގެއްލިފައިވާތީ ލޭބާ ރިލޭޝަންސް އޮތޯރިޓީއަށް އެކަން އަންގައި މަޝްވަރާތަކެއް ކުރެވެމުންދާ ކަމަށް އިކޮނޮމިކް މިނިސްޓްރީން ހާމަކޮށްފައިވެއެވެ.

ގައުމީ ސަލާމަތާއި ހާރިޖީ ގުޅުންތަކުގެ ކޮމެޓީގައި ވާހަކަދައްކަވަމުން މިނިސްޓަރ ފައްޔާޒު ވިދާޅުވެފައިވަނީ ބިދޭސީންނަކީ ރާއްޖެއަށް ބޭނުންވާ ބައެއް ކަމަށެވެ. ނަމަވެސް އެއީ މިހާރު އެކަން މިއޮތް ގޮތަށް ބޮއްސުން ލައިގެން ދާ ވަރަށް ނޫން ކަމަށާއި އެކަން ކުރަންޖެހޭނީ ރެގިއުލޭޓް ފްރޭމްވޯކެއްގެ ދަށުން ކަމަށް މިނިސްޓަރ ފައްޔާޒު ވިދާޅުވިއެވެ.

މިނިސްޓަރ ފައްޔާޒު ވަނީ ބިދޭސީންގެ އެކޮމޮޑޭޝަންތައް ހުންނަން ޖެހޭނެ ގޮތުގެ ގަވާއިދެއް އެކުލަވާލާފައި ވާނެކަމަށް ވިދާޅުވެފައެވެ. އަދި އެ ގަވާއިދު އެކުލަވާލާފައި ވާނީ އާއްމު ސިއްހަތަށާއި އިންސާނީ ޙައްޤުތަކުގެ ދާއިރާތަކަށް ވެސް ވިސްނައިގެން ކަމަށްވެސް ވިދާޅުވެފައި ވެއެވެ.