ރައީސް އަބްދުﷲ ޔާމީން ގެއަށް ބަދަލުކުރުމަށް ބާރުއަޅައި ދިނުމަށް އިދިކޮޅު ޕްރޮގްރެސިވް ކޯލިޝަނުން ހިއުމަން ރައިޓްސް ކޮމިޝަން ގައި އެދިއްޖެއެވެ.

ޕްރޮގްރެސިވް ކޯލިޝަނުން ހިއުމަން ރައިޓްސް ކޮމިޝަނުގެ ރައީސާ އާމިނަތު އީނާސް އަށް ފޮނުވި ސިޓީގައި، ރައީސް ޔާމީންގެ ސިއްހީ ހާލުކޮޅަށް ރިއާޔަތްކޮށް އެމަނިކްފާނުގެ މައްޗަށް އިހްސާންތެރިވުމަށް އެދިފައިވެއެވެ. އެގޮތުން މި ރަމަޟާން މަހު އެމަނިކުފާނު ގެއަށް ބަދަލުކޮށްދެއްވުމަށް ހިއުމަން ރައިޓްސް ކޮމިޝަނުން ބާރުއަޅައި ދިނުމަށް އެދުނު އެދުން އިދިކޮޅު ކޯލިޝަނުން ވަނީ ތަކުރާރު ކޮށްފައެވެ.

އިދިކޮޅު ކޯލިޝަނުން މިފަހަރު ފޮނުވި ސިޓީގައި، މީގެ ކުރިން އެކޯލިޝަނުން ހިއުމަން ރައިޓްސް ކޮމިޝަނަށް ފޮނުވި ތިން ސިޓީގެ ޖަވާބުވެސް ލިބިފައި ނުވާތީ އެތިން ސިޓީގެ ޖަވާބު އަވަސްކޮށްދެއްވުމަށް އެދިފައިވެއެވެ.

ކުރީގެ ރައީސް އަބްދުއްﷲ ޔާމީން އަބްދުލްގައްޔޫމް ބަންދުކޮށްފައި ވަނީ ގާނޫނީ ގޮތުން ލިބިވަޑައިގެންފައިވާ ގާނޫނީ އެއްވެސް ހައްގެއް ނުލިބި ކަމަށާއި، އެމަނިކުފާނު ހުންނެވީ އަޝްވާއީ (އާރބިޓްރަރީ) ބަންދެއްގައި ކަމަށް އެ ކޯލިޝަނުން ވަނީ ބުނެފައެވެ. އަދި އެމަނިކުފާނަށް ލިބިވަޑައިގަންނަވާ ކަފާލާތުގެ ފުރުސަތު ދެއްވާފައި ނުވާއިރު، އެމަނިކުފާނުގެ ފަރާތުން ހުށަހެޅި އިސްތިއުނާފުގެ މައްސަލަ ވެސް ކުރިއަށް ނުގޮސް މަހެއް ވެފައިވާ ކަމަށް އެ ކޯލިޝަންގެ ސިޓީގައި ފާހަގަކޮށްފައިވެއެވެ.

މަނީ ލޯންޑަރިންގެ ދަޢުވާ ސާބިތުވެ ކުރީގެ ރައީސް ޔާމީން ވަނީ 5 އަހަރަށް ޖަލަށްލާފައެވެ. އަދި އެމަނިކުފާނުގެ މައްޗަށް ތުހުމަތު ކުރެވޭ އެހެނިހެން މައްސަލަތަކެއްގެ ތަހުޤީޤު ވެސް ދަނީ ހިނގަމުންނެވެ.