ވީހާވެސް އަވަހަށް ކިޔެވުން ފަށަން މަސައްކަތް ކުރަމުން އަންނަ ކަމަށް ތަޢުލީމާބެހޭ ވަޒީރު ޑރ. ޢާއިޝަތު ޢަލީ ވިދާޅުވެއްޖެއެވެ.

ގްލޯބަލް ޕާޓްނަޝިޕް ފޮރ އެޑިއުކޭޝަން (ޖީޕީއީ) އާއި ސިއެރަ ލިއޯންގެ ބޭސިކް އަދި ސީނިއަރ ސެކަންޑްރީ އެޑިއުކޭޝަން މިނިސްޓްރީއާއި ގުޅިގެން ބޭއްވި މިނިސްޓަރުންގެ ފޯރަމްގައި ބައިވެރިވެ ވަޑައިގެން ވާހަކަ ދައްކަވަމުން ތަޢުލީމާބެހޭ ވަޒީރު ޑރ. ޢާއިޝަތު ޢަލީ ވިދާޅުވީ، ކުރިމަތިވެފައިވާ މައްސަލަތައް ޙައްލުކޮށް، ވީހާވެސް އަވަހަށް ކިޔަވައިދިނުން ފަށަން މަސައްކަތް ކުރަމުން އަންނަ ކަމަށެވެ.

މިދިޔަ މާރިޗް މަހުގެ 12 ވަނަ ދުވަހުން ފެށިގެން ރާއްޖޭގައި ސްކޫލުތައް ބަންދުކޮށްފައިވާކަން ފާހަގަކުރައްވައި ޑރ. ޢާއިޝަތު ޢަލީ ވިދާޅުވީ ދަރިވަރުންނަށް ފިލާވަޅުތައް ހަވާލުނުކުރެވި، ސްކޫލުން ވަކިވާ ދަރިވަރުންގެ އަދަދު އިތުރުވުމުގެ ފުރުސަތު އޮތުމަކީވެސް ކަންބޮޑުވެވަޑައިގަންނަވާކަމެއް ކަމަށެވެ.

ކޯވިޑް-19ގެ މި ހާލަތުގައި، ކިޔަވައިދިނުމުގައި ޚާއްޞަ އެހީއަށް ބޭނުންވާ ކުދިންނަށް އަޅާނުލެވުމާއި، މި ހާލަތުގައި ކިޔެވުމުގައި އުޅޭ ކުދިންގެ ހާލަތު އިތުރަށް ގޯސްވެގެން ހިނގައިދާނެކަމުގެ ކަންބޮޑުވުން ވަޒީރު ފާޅުކުރެއްވިއެވެ.

ވަޒީރު އިތުރަށް ފާހަގަކުރެއްވީ ރާއްޖޭގެ ރަށްތައް ބެހިފައިވާގޮތުން ދަރިވަރުންނާ ހަމައަށް ވާސިލުވުމަކީ ދަތިކަމެއް ކަމަށާއި ނަމަވެސް ވާރޗުއަލްކޮށް ކިޔަވައިދިނުމުގެ ނިޒާމަކާއެކު އެ މައްސަލައަށް ހައްލެއް ލިބިގެންދާނެ ކަމަށެވެ. ހަމަ އެހެންމެ މި ހާލަތުގައި ރާއްޖޭގައި ތިބި ބިދޭސީ ޓީޗަރުން، އެ ޓީޗަރުން ނިސްބަތްވާ ގައުމުތަކަށް ދާން ބޭނުންވެދާނެ ކަމަށާއި، އެއީވެސް ގޮންޖެހުމެއް ކަމަށް އެކަމަނާ ފާހަގަކުރެއްވިއެވެ.

މީގެ އިތުރުން ކިޔެވުމަށް ލޮޅުންއަރާފަދަ ގޮތަކަށް ދެން ކުރިމަތިވާ ބަލިމަޑުކަމެއްގައި ނުވަތަ މިފަދަ ކާރިސާއެއްގައި މިހާރަށްވުރެ ބޮޑަށް ތައްޔާރުވެ ގާބިލުކަން އިތުރުކުރަންޖެހޭކަން ތަޢުލީމާބެހޭ ވަޒީރުގެ ވާހަކަފުޅުގައި ފާހަގަކުރެއްވިއެވެ.