ކޯވިޑް-19 ވެކްސިން ނުޖަހާ ފަނޑިޔާރުންވެސް ވަޒީފާއަށް ނުކުތުމަށް ކޮންމެ 14 ދުވަހަކުން ޕީސީއާރު ޓެސްޓް ހެދުމަށް އަންގައިފި އެވެ.

ޖޭއެސްސީން ނެރެފައިވާ ސަރކިއުލަރ އެއްގައި ބުނެފައިވަނީ، ހެލްތް ޕްރޮޓެކްޝަން އެޖެންސީން މިހާރު ކަނޑައަޅާފައިވާ އުސޫލުގައި، ރާއްޖޭގައި ވަޒީފާ އަދާކުރާ ފަރާތްތަކުގެ ތެރެއިން ވެކެސިޖެހުމަށް ޝަރުޠު ހަމަވާ ފަރާތްތަކުން ވެކެސިންގެ ޑޯޒްތައް ޖަހާފައިނުވާނަމަ، 1 ސެޕްޓެމްބަރ 2021 ފެށިގެން ވަޒީފާއަށް ނުކުމެވޭނީ ކޮންމެ 14 ދުވަހަކުން ޕީ.ސީ.އާރު. ޓެސްޓް ހަދައިގެން ކަމަށް، ޑިރެކްޓަރ ޖެނެރަލް އޮފް ޕަބްލިކް ހެލްތު ވަނީ ކަނޑައަޅުއްވާފައި ކަމަށެވެ.

އެހެންކަމުން، ޝަރުޢީ ކޯޓުތަކުގެ ފަނޑިޔާރުންގެ ތެރެއިން ވެކްސިން ޖެހުމަށް ޝަރުޠު ހަމަވާ ފަނޑިޔާރުން ވެކްސިން ޖެހުމަށާއި، އަދި ވެކްސިން ޖެހުމަށް ޝަރުޠު ފުރިހަމަވާ ފަނޑިޔާރުންގެ ތެރެއިން ވެކްސިންގެ އެއްވެސް ޑޯޒެއް ފުރިހަމަކޮށްފައި ނުވާ ފަނޑިޔާރުން 1 ސެޕްޓެމްބަރ 2021 ން ފެށިގެން ކޮންމެ 14 ދުވަހަކުން ޕީ.ސީ.އާރު. ޓެސްޓް ހައްދަވައިގެން ވަޒީފާއަށް ނުކުތުމަށް ޖޭއެސްސީން ވަނީ ދަންނަވާފައެވެ. އަދި އެގޮތުގެ މަތީން ފަނޑިޔާރުން ޢަމަލުކުރައްވާކަން ޖޭއެސްސީން ކަށަވަރުކުރަމުން ގެންދާނެ ކަމަށްވެސް ޖޭއެސްސީގެ ބަޔާނުގައިވެއެވެ،

ސަރުކާރުން ވަނީ ރާއްޖޭގެ މުޅި އާބާދީއަށް ވެކްސިން ޖެހުމުގެ ޤައުމީ ބޮޑު ކެމްޕެއިނެއް ފަށާފައެވެ. އަދި މި ކެމްޕޭންގެ އަމާޒަކީ މިފެށޭ އޮގަސްޓު މަހުގެ ނިޔަލަށް ވެކްސިން ޖެހޭ އާބާދީގެ 90 އިންސައްތަ މީހުންނަށް ވެކްސިން ޖެހުން ކަމަށް ސަރުކާރުން ވަނީ ހާމަކޮށްފައެވެ. ސަރުކާރުން ބުނެފައިވަނީ، ރާއްޖޭގައި ވެކްސިން ޖެހޭ އާބާދީގެ 27 ޕަސެންޓް މީހުން ވެކްސިންގެ އެއްވެސް ޑޯޒެއް ނުޖަހާ އެބަތިބި ކަމަށެވެ.