މާފުށި ޖަލުން ކޮވިޑް-19ގެ ޕޮޒިޓިވް ކޭހެއް ފެނި، މާފުށީ ޖަލު ކުއްލި ހާލަތަށް ގެނެސްފިއެވެ.

ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު މިކަން ހާމަކުރައްވަމުން ވިދާޅުވީ ކޮވިޑް-19ގެ އަލާމާތްތަކެއް ފެނިގެން ޓެސްޓުކުރި މާފުށީ ޖަލުގެ އޮފިސަރެއް ބުރާސްފަތި ދުވަހު ވަނީ ކޮވިޑް-19 އަށް ޕޮޒިޓިވްވެފައި ކަމަށެވެ.

މާފުށީ ޖަލުގެ އޮފިސަރެއްގެ ފަރާތުން ކޯވިޑް-19 ގެ އަލާމާތްތައް ފެނިގެން ޓެސްޓުކުރުމުން މިއަދު ވަނީ ފައްސިވެފައެވެ. ވީމާ، ޖަލުގެ ސަލާމަތާއި ރައްކަލައްޓަކައި މިރޭ 12 ން ފެށިގެން މާފުށީ ޖަލު ކުއްލި ހާލަތައް ގެނެވޭނެ. އަދި ވަޤުތީގޮތުން ޤައިދީންގެ ހުރިހާ މޫވްމަންޓްތައް މެދުކަނޑާލެވޭނެ.

— Ahmed Mohamed (@ahumadhumohamed) September 2, 2021

އެހެންކަމުން ޖަލުގެ ސަލާމަތީ ކަންކަން ކަށަވަރުކުރުމަށް ބުރާސްފަތި ދުވަހުގެރޭ 12:00 އިން ފެށިގެން މާފުށީ ޖަލު ކުއްލި ހާލަތަށް ގެނެސްފައިވާކަމަށް އަހުމަދު މުހައްމަދުފުޅު ވިދާޅުވިއެވެ. މިއާއެކު ގައިދީންގެ ހުރިހާ މޫވްމެންޓެއް މެދުކަނޑާލެވޭނެ ކަމަށާއި، ގައިދީން އެއްތަނުން އަނެއް ތަނަށް ގެންދިއުން މުޅިން މެދުކަނޑާލެވޭނެ ކަމަށްވެސް ކޮމިޝަނަރ ވިދާޅުވެފައިވެއެވެ.

މީގެ ކުރިންވެސް ޖަލުތަކުގައި ކޮވިޑް-19 ފެތުރިގެން ވަނީ ކުއްލި ހާލަތަށް ގެނެސްފައެވެ. އޭގެތެރޭގައި މާލެ ޖަލާއި ހުޅުމާލެ ޖަލު ހިމެނެއެވެ. މިފަދަ ކޭސްތަކެއް ފެނިގެން ޖަލުތައް ކުއްލި ހާލަތަށް ގެނެސްފައިވާއިރު، ހައިރިސްކު ކެޓަގަރީގައި ހިމެނޭ ބައެއް ކުށްވެރިން ވަނީ ގެއަށް ބަދަލުކޮށްފައެވެ.