ޝަރުޢީ ދާއިރާ ދަނީ ހަރުދަނާ ވަމުން ކަމަށާއި، އެ ދާއިރާއަށް ނުފޫޒު ފޯރުވަން އެއްވެސް ފަރާތަކުން މަސައްކަތް ނުކުރުމަށް ރައީސް މައުމޫންގެ ލީޑަރޝިޕްގައި ހިންގާ މޯލްޑިވްސް ރިފޯމް މޫވްމަންޓް، އެމްއާރުއެމުން މިއަދު ގޮވާލައިފިއެވެ.

މި ސަރުކާރުގެ ކޯލިޝަންގެ ބައިވެރިއެއް ކަމަށްވާ އެމްއާރުއެމުން މިގޮތަށް ގޮވާލާފައިވަނީ، ކުރީގެ ބައެއް ފަނޑިޔާރުންނާއި ވަކީލުން ބޭއްވި ނޫސްވެރިންގެ ބައްދަލުވުމުގައި ޝަރުއީ ދާއިރާއާއި ގުޅޭގޮތުން ދެެއްކި ވާހަކަތައް ކުށްވެރިކޮށް ނެރުނު ނޫސްބަޔާނެއްގައެވެ.

އެމްއާރުއެމްގެ ބަޔާނުގައި ބުނެފައިވަނީ، އަދުލުއިންސާފުގެ ނިޒާމު ހަރުދަނާކުރުމާއި، ހަމަހަމަކަން ގާއިމުކޮށް، ގާނޫނުގެ ހުދޫދުގެ ތެރެއިން މަސައްކަތްކުރާ ޒަމާނީ ޑިމޮކްރަސީއަކަށް ވެށި ފަހި ކުރުމަކީ އެ ޕާޓީގެ މައިގަނޑު އަސާސްތަކުގެ ތެރޭގައި ހިމެނޭ ކަމަށެވެ. އަދި ޝަރުޢީ ނިޒާމުގެ މިނިވަންކަމާއި އެނިޒާމަކީ ރައްޔިތުން އިތުބާރުކުރާ ނިޒާމެއް ކަމުގައިވުމަކީ އެ އަސާސްތައް ދެމެހެއްޓުމުގެ މުހިއްމު އުންސުރުތަކެއް ކަމަށް ދެކޭ ކަމަށް އެމްއާރްއެމްއިން ވަނީ ބުނެފައެވެ.

ދިވެހިރާއްޖޭގައި އަދުލު އިންސާފު ގާއިމުކުރުމަށްޓަކައި ޝަރުޢީ ދާއިރާއިން ކުރަމުންދާ މަސައްކަތްތަކާއި މެދު 4 ސެޕްޓެމްބަރ 2021 ވީދުވަހު ކުރީގެ ބައެއް ފަނޑިޔާރުންނާއި ގާނޫނީ ވަކީލުން ނޫސްވެރިންނާއި ބައްދަލުކޮށް ދައްކާފައިވާ ވާހަކަތަކަކީ އިންސާފު ގާއިމުކުރުމަށާއި ޝަރުޢީ ދާއިރާ ހަރުދަނާކުރުމަށް ކުރެވެމުންދާ މަސައްކަތްތަކާއިމެދު ރައްޔިތުންގެ ހިތްތަކުގައި ވަހުމާއި ނަފުރަތު އުފެދި އެމަސައްކަތަށް ހުރަސްއެޅިދާނެ ފަދަ ވާހަކަތަކެއް ކަމަށް އެމްއާރްއެމްގެ ބަޔާނުގައިވެއެވެ.

އަދި އެއީ "ފަނޑިޔާރުންނަށާއި، ހަރުދަނާވަމުންދާ މުޅި ޝަރުޢީ ނިޒާމުގެ ތެރެއަށް ނުފޫޒު ފޯރުވުމަށްޓަކައި ކުރެވޭ ސިޔާސީ މަސައްކަތެއް ކަމަށް" ދެކޭ ކަމަށްވެސް އެމްއާރުއެމުން ވަނީ ބުނެފައެވެ.

މުޖުތަމަޢުގެ އަމާންކަމާއި ބާރުތައް ވަކިވެފައިވާ ހަރުދަނާ ޝަރުޢީ ނިޒާމެއް ގާއިމްކުރުމަށް އެ ދާއިރާގެ ތެރެއިން ކުރެވެމުންދާ މަސައްކަތްތަކަށާއި، އެކަމަށް މަގުފަހިކޮށްދިނުމަށް ސަރުކާރުން ކުރަމުންދާ މަސައްކަތަކަށް ހުރަސްއެޅޭގޮތަށް މިފަދަ ވާހަކަތައް ފެތުރުން އެ ޕާޓީން ވަނީ ކުށްވެރިކޮށްފައެވެ.

އެމްއާރްއެމްއިން ނެރުނު ބަޔާނުގައި ވަނީ، ޝަރީއަތާށާއި ފަނޑިޔާރުންނަށް ނުފޫޒު ފޯރުވުމުގެ އަމަލުތައް ހުއްޓުވޭނީ އެ ނިޒާމަށް ނުފޫޒު ފޯރުވުމަށް މިފަދަ ސިޔާސީ އެކިއެކި އަމަލުތައް ހިންގާ ފަރާތްތަކާމެދު ގާނޫނީ ހަމަތަކުގެ ތެރެއިން އެކަށޭނަ ފިޔަވަޅުތައް އަޅައިގެން ކަމަށް ބުނެފައެވެ.