މުސްތަގުބަލުގައި ވަކި ކަމެއް ވަކި ގޮތަކަށް ވާނެއެކޭ އެއްވެސް މީހަކަށް ނުބުނެވޭނެ ކަމަށް ދީނީ ޢިލްމުވެރިޔާ ޝައިޚް އިލިޔާސް ހުސައިން ވިދާޅުވެއްޖެއެވެ.

އިލިޔާސްގެ މިވާހަކައިގައި ވަކި މީހަކަށް އިޝާރާތް ކުރައްވާފައި ނުވިނަމަވެސް ބެލެވޭ ގޮތުގައި އިލިޔާސް މިފަދައިން ވިދާޅުވެ ޓްވީޓެއް ކުރައްވާފައި މިވަނީ މިހާރު ހަލުއިކަމާއެކު ރާއްޖޭގައި ފެތުރެމުންދާ ކޯވިޑް-19 ހުރިހާ ދިވެހިންނަށް ވެސް ޖެހޭނެ ކަމަށް ރައީސް ނަޝީދު ވިދާޅުވިކަމަށް ބައެއް މީޑިއާތަކުގައި ރިޕޯޓް ކުރުމާއި ގުޅިގެން އެކަމަށް އިޝާރާތްކުރައްވައެވެ.

ކީރިތި ޤުރުއާނާއި ހަދީސްގެ އަލީގައި ހެކި ދައްކަވަމުން އިލިޔާސް ވިދާޅުވީ ﷲ ފިޔަވައި އެހެން އެއްވެސް ފަރާތަކަށް ނޭގޭނެ ފަސް ކަމެއްގެ ޢިލްމެއް ވާކަމަށް ކީރިތި ރަސޫލާ ހަދީސް ކުރައްވާފައިވާ ކަމަށެވެ. ދެން މިކަމުގެ ހެއްކެއްގެ ގޮތުގައި ކީރިތި ޤުރުއާންގެ ސޫރަތުލް ލުޤްމާންގެ 34 ވަނަ އާޔަތް މާނައާއެކު އިލިޔާސް ހިއްސާ ކުރައްވާފައި ވެއެވެ.

އެ އާޔަތުގެ މާނާގައި ވަނީ، "ހަމަކަށަވަރުން، قيامة ވުމުގެ ވަގުތު ދެނެވޮޑިގަތުން ވަނީ، اللَّه ގެ حضرة ގައެވެ. އަދި އެކަލާނގެ ވާރޭ ވެއްސަވަތެވެ. އަދި رحِم ތަކުގައިވާ ތަކެތި އެކަލާނގެ ދެނެވޮޑިގެންވެތެވެ. އަދި އެއްވެސް نفس އަކަށް، އެ نفس އެއް މާދަމާ ހޯދައިގަންނާނީ ކޮންކަމެއްކަމެއް ނޭނގޭނެތެވެ. އަދި އެއްވެސް نفس އަކަށް އެ نفس އެއް މަރުވާނީ ކޮންބިމެއްގައި ކަމެއް ނޭނގޭނެތެވެ. ހަމަކަށަވަރުން، اللَّه އީ، މޮޅަށް ދެނެވޮޑިގެންވާ، خبير ވަންތަ ރަސްކަލާނގެއެވެ."

އިއްޔެ ރައްޔިތުންގެ މަޖިލީހުގައި ވާހަކަ ދައްކަވަމުން މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވީ ކޯވިޑް-19 ރާއްޖޭގެ ހުރިހާ ރައްޔިތުންނަށްވެސް ޖެހޭނެ ކަމަށެވެ. ކުރަންވީ ކަމަކީ ހުރިހާ ރަށެއްގައިވެސް ސިއްހީ ޚިދުމަތް ދޭނެ ގޮތެއް ހަމަޖެއްސުން ކަމުގައި ރައީސް ނަޝީދު ވިދާޅުވިއެވެ.

ރާއްޖޭގެ ސިއްހީ މާހިރުންގެ ލަފައަކީވެސް މިބަލި ނުޖެހޭނެ ކަމަށް އެއްވެސް މީހަކު ނުބެލުމެވެ. ބަލި ޖެހޭނެކަމަށް ރައްކާތެރިވެ އުޅުމާއި ސިއްހީ ނިޒާމު ވަރުގަދަކޮށް ކަމާބެހޭ މާހިރުންގެ އިރުޝާދާއެކު ދިރިއުޅުމަށް ބަދަލުތައް ގެނަސްގެން ބައްޔާއެކު ދިރިއުޅެން ފަރިތަކުރުން ނޫން ގޮތެއް މިހާރަކު ނެތް ކަމަށް ސިއްހީ މާހިރުން ލަފާދެއެވެ. ބެލެވޭ ގޮތުގައި ރައީސް ނަޝީދު އެ އިޝާރާތް ކުރައްވަނީ ސިއްހީ މާހިރުންގެ މި ލަފައަށެވެ.