ކޯވިޑް-19ގެ ބަޖެޓުގެ ތެރެއިން 72 ޕަސެންޓު ހަރަދުކޮށްފައި ވަނީ އެސްޓީއޯ މެދުވެރިކޮށް ކަމަށް ސަރުކާރުން ބުނެފިއެވެ.

ނޭޝަނަލް އިމަރޖެންސީ އޮޕަރޭޝަން ސެންޓަރ ގައި ބޭއްވި ނޫސްވެރިންގެ ބައްދަލުވުމުގައި މާލީ ވަޒީރު އިބްރާހިމް އަމީރު ވިދާޅުވީ ކޯވިޑް-19 ކޮންޓްރޯލް ކުރުމަށް ކުރާ މަސައްކަތަށް މިހާތަނަށް 814 މިލިއަން ރުފިޔާ ހަރަދު ކުރެވިފައިވާ ކަމަށާއި އޭގެ 72 ޕަސެންޓު ހަރަދުކޮށްފައި ވަނީ އެސްޓީއޯ މެދުވެރިކޮށް ކަމަށެވެ.

މިނިސްޓަރު ވިދާޅުވީ އޭގެ ތެރެއިން އެންމެ ބޮޑު ހަރަދެއް ކުރަމުން އަންނަނީ ބޭހާއި މެޑިކަލް އިކުއިޕްމަންޓާއި ގަންނަން ޖެހޭ ކާޑާއި އެފަދަ އެހެނިހެން ބާވަތްތައް ހޯދަން ކަމަށެވެ.

"އަޅުގަނޑުމެން މި ބަލަނީ ވީހާ ކުޑަ އަގެއްގައި ކަންކަން ކުރެވޭތޯ. އަދި އަޅުގަނޑުމެން ސޮވެރިން ގެރެންޓީ ދީގެން އެސްޓީއޯ އަށް އައިޓީއެފްސީގެ ކްރެޑިޓް ފެސިލިޓީއެއް ލިބޭތޯ އެބަ ބަލަން." މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ކޯވިޑާ ގުޅިގެން މެޑިކަލް ކޮންސިއުމަބަލްސްގެ 86 ޕަސެންޓް ޚަރަދުކޮށްފައިވަނީ އެސްޓީއޯ މެދުވެރިކޮށެވެ.

އެގޮތުން އެސްޓީއޯއާއެކު ޑިޒާސްޓަރ މެނޭޖްމަންޓް ޓްރަސްޓް ފަންޑެއްގައި ސޮއިކޮށް، ކާޑުގެ ސްޓޮކް މަދުނުވާނެވަރަށް ރައްކާކުރުމަށްޓަކައި އެސްޓީއޯ އަށް 84 މިލިއަން ރުފިޔާ ހަވާލުކޮށްގެން އެ މަސައްކަތް ކުރަމުން ގެންދާ ކަމަށް މިނިސްޓަރ އަމީރު ވިދާޅުވިއެވެ.