ދައުލަތް ހިންގުމުގެ ޚަރަދު ބެލެހެއްޓުމުގެ ގޮތުން ސަރުކާރަށް ބޭނުންވާ ފައިސާގެ ގޮތުގައި މިހާތަނަށް 290 މިލިއަން ޑޮލަރު ލިބޭނެކަން ޔަގީންވެފައިވާ ކަމަށް މާލީ ވަޒީރު އިބްރާހިމް އަމީރު ވިދާޅުވެއްޖެ އެވެ.

ނޭޝަނަލް އިމަރޖެންސީ އޮޕަރޭޝަންސް ސެންޓަރު (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު އިބްރާހިމް އަމީރު ވިދާޅުވީ،ކޮވިޑް-19 އާ ގުޅިގެން ބޭރުގެ މާލީ އިދާރާތަކުގެ އެހީ ހޯދަން ކުރަމުންދާ މަސައްކަތުން މިހާތަނަށް، 290 މިލިއަން ޑޮލަރު ޔަގީން ކުރެވިފައިވާ ކަމަށެވެ. މި އަދަދަށް އެހީ ލިބުނު ނަމަވެސް، އިތުރަށް 13 ބިލިއަން ރުފިޔާ ހޯދަން ޖެހޭ ކަމަށް މާލީ ވަޒީރު ވިދާޅުވިއެވެ. އަދި އެކަމަށް މަސައްކަތް ތަކެއް ކުރަމުންދާ ކަމަށް މިނިސްޓަރ ވަނީ ވިދާޅުވެފައެވެ.

ދައުލަތުން މިހާރުން މިހާރުން ކުރަންޖެހޭ ޚަރަދުތަކަށް ދުއިސައްތަ މިލިއަން ޑޮލަރު ބޭނުންވާ ކަމަށާއި، ދައުލަތުން މިހާރު ގިނަ ފައިސާ ހޭދަކުރަނީ މިހާރުން މިހާރަށް ބޭނުންވާ މުހިންމު ޚަރަދުތަކަށް ކަމަށް މިނިސްޓަރ ވިދާޅުވިއެވެ. ކޮވިޑް-19 އަށް މިހާރު 814 މިލިއަން ރުފިޔާ ހަރަދު ކޮށްފައިވާއިރު އޭގެ ތެރެއިން ބޮޑު ބައެއް ހޭދަކޮށްފައިވަނީ އެސްޓީއޯ މެދުވެރިކޮށް ކަން މިނިސްޓަރ ފާހަގަކުރެއްވިއެވެ. ޢެގޮތުން ކޮވިޑާ ގުޅިގެން ސަރުކާރުން މިހާތަނަށް ކޮށްފައިވާ ހޭދައިގެ 72 ޕަސެންޓް ހޭދަކޮށްފައިވަނީ އެސްޓީއޯ ކަމަށް އަމީރު ވިދާޅުވިއެވެ.

މިނިސްޓަރ ވިދާޅުވިގޮތުގައި އޭގެތެރެއިން ބޮޑު ބައެއް އެސްޓީއޯ އިން ޚަރަދުކޮށްފައިވަނީ މެޑިކަލް ކޮންސިއުމަބަލްސް ކެޕިޓަލް އިކްއިޕްމަންޓް އަށެވެ. ފިނޭންސް މިނިސްޓަރު އަމީރު އިތުރަށް ވިދާޅުވީ މިއަހަރު އާމްދަނީ ގެ ގޮތުގައި ދައުލަތަށް ލިބޭނެ ކަމަށް ލަފާކުރެވެނީ 15 ބިލިއަނާއި 17 ބިލިއަން ރުފިޔާއާއި ދެމެދުގެ އަދަދެއް ކަމަށެވެ.

ކޮވިޑް-19 ގެ ސަބަބުން ރާއްޖެ އަށް ލިބޭ ގެއްލުމަށް އެހީތެރިވުމުގެ ގޮތުން، އައިއެމްއެފުން ރާއްޖެއަަށް ދޭން ނިންމި 28.9 މިލިއަން އެމެރިކާ ޑޮލަރު މިހާރު އެމްއެމްއޭ އަށް ލިބިފައިވާ ކަމަށް ފިނޭސްމިނިސްޓްރީ އިން ހާމަކުރެއެވެ. މީގެ އިތުރުން އެމްއެމްއޭ އާއި ރިޒާވް ބޭންކް އޮފް އިންޑިއާ އާ ދެމެދު ވެފައިވާ 400 ޔޫއެސް ޑޮލަރު ކަރަންސީ ސްވޮޕް އެއްބަސްވުމުގެ ތެރޭގައި ހިމެނޭ 150 މިލިއަން ޔޫއެސް ޑޮލަރު ވެސް މަރުކަޒީ ބޭންކަށް ލިބިފައިވާ ކަމަށް ސަރުކާރުން ވަނީ ބުނެފައެވެ.

މީގެއިތުރުންވެސް އިތުރު އެހީ ތަކެއް ހޯދަން މަސައްކަތް ކުރަމުންދާ ކަމަށާއި،"ސިނާރިއޯ 3" ގެ ހާލަތު ކުރިމަތިވެއްޖެ ނަމަ 13 ބިލިއަނާއި 15 ބިލިއަނާ ދެމެދުގެ އަދަދެއް ބޭނުންވާ ކަމަށްވެސް މިނިސްޓަރ ވިދާޅުވިއެވެ.