ރާއްޖޭގައި ހޯމް ކަރަންޓީނު ކުރާނީ އެކަމަށްޓަކައި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާފައިވާ ޝަރުތުތައް ފުރިހަމަވާ ތަންތަނުގައި ކަމަށް އެޗްޕީއޭގެ ޑޮކްޓަރ ޑރ. އިބްރާހީމް އަފްޒަލް ވިދާޅުވެއްޖެ އެވެ.

ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އަފްޒަލް ވިދާޅުވީ ހޯމް ކަރަންޓީނު ކުރާނީ އެޗްޕީއޭ އިން ގަބޫލުކުރާ ސެޓަޕް ފުރިހަމަ ވެފައި ހުންނަ ތަންތަނުގައި އެކަނި ކަމަށެވެ. އެގޮތުން ވަކިން އެމީހަކަށް ކޮޓަރިއަކާއި ފާހާނާއެއް ހުރުން ޝަރުތުތަކުގައި ހިމެނޭ ކަމަށް އަފްޒަލް ވިދާޅުވިއެވެ.

ހޯމް ކަރަންޓީނަށް ލާ މީހާއާއިމެދު އަމަލުތަށް ބަހައްޓަންވީގޮތުގެ ތަފާތު އިރުޝާދުތަކާއި އުޅެން ޖެހޭގޮތްތަށް ވަރަށް ތަފްސީލްކޮށް ކިޔައިދޭނެ ކަމަށް އަފްޒަލް ވިދާޅުވިއެވެ.

"ކަރަންޓީނުގައި ގޭގައި ހުރި މީހާއާއި ގޭގެ އެހެން މީހުން މުއާމަލާތް ކުރަން ޖެހޭނެ ގޮތާއި ގޭތެރޭގެ ކަންކަން ބަހައްޓަންވީ ގޮތުގެ އިރުޝާދު ދެމުންދާނެ. އަދި ހަމަ އެކަހެރިވުން އޮންނަންވާނެ ކަރަންޓީނު ފެސިލިޓީއަކާ އެއްވަރަށް ގޭގައިވެސް. އޭރުން ހޯމް ކަރަންޓީނަށް ދެވޭނީ." ޑރ.އަފްޒަލް ވިދާޅުވިއެވެ.

ޑރ. އަފްޒަލް ވިދާޅުވީ މިހާރުވެސް ގޭތެރޭގައި ސިއްހީ ރަނގަޅު އާދަތައް ހަރުލެއްވުމަށް އާދަކުރެވިދާނެ ކަމަށެވެ. ކޮވިޑް 19 ހަލުވި ކަމާއެކު މާލޭގައި ފެތުރެމުންދާއިރު ބަލިޖެހޭ މީހުންގެ އަދަދު އިތުރުވެ ހޯމް ކަރަންޓީން އަށް ދާންޖެހިދާނެތީ އެކަމަށް ތައްޔާރުވެ ތިބުމަށް ހެލްތް މިނިސްޓަރ އަމީން ވަނީ މީގެ ކުރިން އެދިވަޑައިގެންފައެވެ.