ރާއްޖޭގެ މުވާސަލާތީ ކުންފުނިތަކުން، ރަނގަޅު ފެންވަރެއްގައި ޚިދުމަތްތައް ދެމުން އަންނަ ކަމަށް ކޮމިއުނިކޭޝަން މިނިސްޓަރު މުހައްމަދު މަލީހު ވިދާޅުވެއްޖެއެވެ. ރާއްޖޭގެ މުވާސާލާތީ ކުންފުނި ތަކުގެ ޚިދުމަތާއި އަގުތައް ރަނގަޅު ނޫން ކަމަށް ގިނަ ރައްޔިތުން ބުނި ނަމަވެސް އެ ކުންފުނި ތަކުގެ ޚިދުމަތް ރަނގަޅު ކަމަށް މިނިސްޓަރ މަލީހު ވިދާޅުވީ ދުނިޔޭގެ ޓެލެކޮމިއުނިކޭޝަން އަދި އިންފޮމޭޝަން ސޮސައިޓީ ދުވަހާއި ގުޅުވައިގެން ދެއްވި ހިތާބުގައެވެ.

މަލީހް ވިދާޅުވީ ރާއްޖެއަށްވެސް ކޮވިޑް-19ގެ ހާލަތު ކުރިމަތިވެފައިވާ މި ދަނޑިވަޅުގައި، ރާއްޖޭގެ މުވާސަލާތީ ނިޒާމު އެދެވޭ ފެންވަރެއްގައި ޤާއިމް ވެފައި އޮތުމަކީ ވަރަށްވެސް ބޮޑު ހިތްހަމަ ޖެހުމެއް ކަމަށެވެ. މި ދުވަސް މި ފާހަގަ ކުރެވެނީ މުޅި ދުނިޔެ އަދި ރާއްޖެވެސް، ނުރައްކާތެރި ޞިއްޙީ ބަލިމަޑުކަމަކާ ހަނގުރާމަ ކުރަމުންދާ ދަނޑިވަޅެއްގައި ކަމަށް ވެސް މިނިސްޓަރގެ ޚިތާބު ފާހަގަކުރައްވާފައިވެއެވެ.

ކޮވިޑް-19 އާ ހެދި އައިސީޓީ ހިދުމަތްތަކަށް ބޮޑަށް ބަރޯސާވާން ޖެހިފައިވާ ކަމަށާއި، އެ ހަނގުރާމައިގައި އެންމެ ބޮޑު ދިފާއީ ހަތިޔާރަކަށް ބޭނުން މިކުރެވެނީ އެކަކު އަނެކަކާ ބައްދަލު ނުވެ ގައިދުރުކޮށް ތިބުން ކަމަށް މަލީހް ވިދާޅުވިއެވެ. މުވާސަލާތީ ޚިދްމަތްތައް ބޭނުންކުރާ މިންވަރު އެތައްގުނައަކަށް އިތުރުވެފައިވާ މި ދަނޑިވަޅުގައި، ސަރުކާރުގެ އެދުމާއި އެއްގޮތަށް، ރާއްޖޭގެ މުވާސަލާތީ ކުންފުނިތަކުން، ރަނގަޅު ފެންވަރެއްގައި ޚިދުމަތްތައް ދީ، އަދި އެޚިދުމަތް ދަމަހަށްޓަން ކުރަމުން ގެންދާ ބުރަ މަސައްކަތްތައް ފާހަގަކުރައްވައި މިނިސްޓަރ ވަނީ ޝުކުރު އަދާކުރައްވާފައެވެ.

"ރާއްޖޭގެ އައި.ސީ.ޓީ މާޙައުލަށް ބަލާލާއިރު އެކަށީގެންވާ މިންވަރަކަށް ޚިދުމަތާއި އިންފްރާސްޓަރަކްޗަރ ތަރައްޤީ ކުރެވިފައިވާ ކަަމަށްވެސް މަލީހު ފޮނުއްވެވި ޚިތާބުގައި ވިދާޅުވެފައިވެއެވެ. ރާއްޖެއާއި ބޭރުދުނިޔެއާއި ސަބްމެރީން ފައިބަރ އޮޕްޓިކް ކޭބަލުން ގުޅާލުމުގެ އިރުތުން، ރާއްޖޭގެ އެތެރޭގައިވެސް މިވަނީ ފައިބަރ ނެޓްވަރކްތައް ޤާއިމްކުރެވިފައި. އަދި ދުވަހުން ދުވަހަށް ފައިބަރ ނެޓްވާރކާ ގުޅާލެވޭ ރަށްތައް އިތުރުވެ މިހާރު ރާއްޖޭގެ އާބާދީގެ ބޮޑު ބަޔަކަށް ފައިބަރ ނެޓްވާރކް މެދުވެރިކޮށް ބްރޯޑްބޭންޑް އިންޓަރނެޓް ޚިދްމަތް ލިބޭކަން އުފަލާއެކު ފާހަގަކުރަން. ރާއްޖޭގެ އެންމެހާ ކަންކޮޅުތަކަށް މޯބައިލް ފޯނާއި 4ޖީ ގެ ޚިދްމަތް ފޯރާފައި ވާއިރު، އެންމެ ފަހުގެ 5ޖީ ޓެކްނޮލޮޖީގެ ޚިދްމަތްވެސް ރާއްޖޭގެ ފޯރުކޮށްދޭން ވަނީ ފަށާފައި.". މުވާސާލާތީ ކުންފުނިތަކުން ހޯދާފައިވާ ކުރިއެރުންތަށް ފާހަގަކުރައްވަމުން މަލީހް ވިދާޅުވިއެވެ.

ރާއްޖޭގައި މުވާސަލާތީ ހިދުމަތް ދޭ ދިރާގާ އުރީދޫ އިން އެކަށީގެންވާ ޚިދުމަތްތަކެއް ނުދެވުމާއި، ޚިދުމަތްތަކުގެ އަގު ބޮޑުކަމުގެ ޝަކުވާ އާންމު ރައްޔިތުން އަންނަނީ ކުރަމުންނެވެ. ރާއްޖޭގެ މީޑިއާ ތަކުން މިވާހަކަ ނުދެއްކި ނަމަވެސް ރާއްޖެއަކީ މިސަރަހައްދުގައިވެސް މުވާސަލާތީ ޚިދުމަތް އެންމެ އަގުބޮޑު ގައުމު ކަމުގައި ތަފާސް ހިސާބު ތަކުން ދައްކައެވެ.

ރާއްޖޭގެ މުވާސަލާތީ ޚިދުމަތަކީ ވާދަވެރި ޕްލެޓްފޯމެއްގައި ދެވޭ ޚިދުމަތަކަށް ހަދައި ޚިދުމަތުގައި ވާދަވެރި ސިޔާސަތެއް ގެންގުޅުމާއި ޚިދުމަތުގެ އަގުތައް ހެޔޮކުރުމުގެ ނިޔަތުގައި ދިރާގުން ކޮންޓްރޯލް ކޮށްގެން ދެމުން ގެންދިޔަ އެ ޚިދުމަތް ވާދަވެރިކަމަށް ހުޅުވާލައިގެން އިތުރު ކުންފުންޏަކުން ޚިދުމަތް ފެށި ނަމަވެސް އެދެވޭ ގޮތެއްގައި ޚިދުމަތްވެސް ނުލިބޭ ކަމަށާއި އަދި އަގުތައްވެސް ދަށް ނުވާކަން ގިނަ ބަޔަކު ފާހަގަކުރެއެވެ.