މާލެ ސަރަހައްދުގެ ލޮކްޑައުން އުވައިލާ ވަގުތު ޕޮޒިޓިވް ކޭސްތައް އިތުރުވެ ނުރައްކާ ބޮޑުވެގެން ހިގައިދާނެތީ އެވަގުތަށް ތައްޔާރުވުމަކީ އެންމެ މުހިންމު އެއް މަސައްކަތް ކަމުގައި ވިދާޅުވެ ލޮކްޑައުން އުވާލަން ތައްޔަރުވަމުން ދާކަމުގެ އިޝާރާތެއް ހެލްތް މިނިސްޓަރ އަބުދު ﷲ އަމީން މިއަދު ކުރައްވައިފިއެވެ.

ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން ހެލްތް މިނިސްޓަރ އަމީން ވިދާޅުވީމާލެ ސަރަހައްދުގެ ލޮކްޑައުން އުވައިލުމުން، ކޮވިޑް-19 ހަލުވިކަމާ އެކު ފެތުރި ހާލަތު ގޯސްވުމުގެ ބިރު އެބައޮތް ކަމަށާއި އޮތް ހައްލަކީ ރައްކާތެރިކަމުގެ ފިޔަވަޅުތަކަށް އިސްކަންދީގެން އެ ހާލަތާ ދުރަށް ދާން ގުޅިގެން މަސައްކަތް ކުރުން ކަމަށެވެ.

ލޮކްޑައުން އުވައިލުމަކީ ވެސް ބިރުވެރި ހާލަތަކަށް ހިނގައިދާނެ ކަމެއް ކަން ގަބޫލުކުރަން ޖެހޭ ކަމަށް އަމީން ވިދާޅުވިއެވެ.

"ލޮކްޑައުން ހުޅުވާލާ ވަގުތަކީ ނާޒުކު ވަގުތެއް. ޕޮޒިޓިވްވާ މީހުންނާއި ކްރިޓިކަލް ފަރުވާދޭ މީހުން އިތުރުވާނެ. މި ހާލަތަށް ތައްޔާރުވުމަކީ މި ވަގުތަށް ކުރަން ޖެހޭނެ އެންމެ މުހިއްމު ކަންތައް." ހެލްތް މިނިސްޓަރ ވިދާޅުވިއެވެ.

ކުރީގެ ލަފާ ކުރުންތަކާ އެއްވަރަށް ބަލި ނުފެތުރި ސަލާމަތްވީ، ސަރުކާރުން އެޅި ފިޔަވަޅުތަކަށް އާއްމުން ތަބާވެ، އަމަލުކުރުމުން ކަން މިނިސްޓަރ ވަނީ ފާހަގަކުރައްވާފައެވެ. މިނިސްޓަރު ވިދާޅުވީ އަތޮޅުތަކުގައި ވެސް ބަލި ނުފެތުރުނީ ކަމާބެހޭ ފަރާތްތަކުގެ އެންގުންތަކަށް، ރައްޔިތުން އަމަލުކުރިލެއް ފުރިހަމަ ކަމުން ކަމަށެވެ.

ރައްޔިތުން އަމަލުކުރަން ކަމާބެހޭ އިދާރާތަކުން އަންގާ ކަންކަމަށް ސަމާލުވެ އެ ގޮތުގައި ކުރިއަށް ދިއުމަށް ހެލްތް މިނިސްޓަރ ވަނީ އިލްތިމާސް ކުރައްވާފައެވެ.

ކޮވިޑް-19 ގައި ރާއްޖެ އަށް ކުރިއެރުންތަކެއް ހޯދުނީ ދުރާލައި ތައްޔާރުވެ، ލަފާކުރުންތަކެއްގެ މަތީގައި މަސައްކަތްތަކެއް ކޮށްގެން ކަމުގައި މިނިސްޓަރ ވިދާޅުވިއެވެ.