އަނިޔާވެރި ގޮތަކަށް މަރާލާފައިވާ ބްލޮގާރ ޔާމިން ރަޝީދުގެ މަރުގެ މައްސަލައިގެ ޙުކުމް އިއްވުން ޢާއިލާއިން އެދިގެން ފަސްކޮށްފައިވާ ކަމަށް ކްރިމިނަލް ކޯޓުން ބުނެފިއެވެ.

ސ. ފޭދޫ ޗަނބޭލީގޭ އުމުރުން 29 އަހަރުގެ ޔާމީން ރަޝީދު މަރާލާފައިވަނީ 23 އޭޕްރީލް 2017 ވަނަ ދުވަހުގެރޭ 2:46 ގައި އޭނާ ދިރިއުޅެމުންދިޔަ މ. ސްޕެޓިއުލާގޭގެ ސިޑިގޮޅި ތެރޭގައި ތޫނު އެއްޗެހިން ހަމަލާ ދީގެންނެވެ. ޔާމީންރަޝީދުގެ މަރުގެ މައްސަލާގައި ދަޢުލަތުން 6 މީހެއްގެ މައްޗަށް ގަސްދުގައި މީހަކު މެރުމުގެ ކުށުގެ ދައުވާ އުފުލާފައިވާއިރު އެ ހަމީހުންނަށްވެސް މަރުގެ އަދަބު ދިނުމަށް ދަޢުލަތުން ވަނީ އެދިފައެވެ.

ކްރިމިނަލް ކޯޓުން ބުނީ މި މައްސަލާގައި ޔާމީން މަރާލިކަމަށް ތުހުމަތުކުރެވޭ މީހުންގެ މައްޗަށް ކުށްސާބިތުވެއްޖެނަމަ އިސްލާމީ ޝަރީޢަތުގައިވާ ގޮތަށް ވާރިސުންގެ ބަޔާން ނަގަންޖެހޭ ކަމަށެވެ. ނަމަވެސް އާއިލާގެ މެންބަރަކު ބަލިވެ އުޅޭތީ ހުކުމް ކުރަން ބާއްވާ އަޑުއެހުން ފަސްކޮށްދިނުމަށް ޢާއިލާއިން އެދިފައިވާ ކަމަށް ކޯޓުން ބުނެއެވެ.

މި މައްސަލާގައި މިދިޔަ މަހުގެ 18 ވަނަ ދުވަހު އަޑުއެހުންތައް ނިންމާލާފައިވާއިރު ޖިނާޢީ އިޖުރާއަތުގެ ޤާނޫނުގައިވާ ގޮތުން 30 ދުވަހުގެ ތެރޭގައި ޙުކުމް ކުރަން ޖެހޭނެއެވެ. ނަމަވެސް އެ މުއްދަތު މިހާރުވަނީ ފާއިތުވެފައެވެ.

ޔާމީން ރަޝީދު މަރައިލި މައްސަލައިގައި ދައުލަތުން ދައުވާ ކުރަނީ މ. ތާއިފް އިސްމާއިލް ރަޝީދާއި ހ. އަންނާރުމާގޭ އިސްމާއިލް ހައިޝަމް ރަޝީދާއި މ. އިރަސްމިކުގޭ އަހުމަދު ޒިހާން އިސްމާއިލާއި ގދ. ގައްދޫ ސިންދުބާދުގޭ މުހައްމަދު ދިފްރާނާއި މ. ކުދެހިގޭ ހަސަން ޝިފާޒްގެ އިތުރުން މ. ކޮޅުފުށީ އީސްޓް، ހުސައިން ޒިޔާދުގެ މައްޗަށެވެ.