ދެހާސް ފަނަރަ ވަނަ އަހަރު ތޫނުއެއްޗަކުން ހަމަލާދީ މަރާލި ހ. ހަންޑްރެންޑް ފްލާވާސް ޖައިލަމް އަހުމަދު ޝާކިރުގެ މަރުގެ މައްސަލައިގައި މިއަދު ބޭއްވި އަޑުއެހުން ދިފާޢަށް ލިޔުންތަކެއް ނުލިބޭތީ ކުރިއަށް ނުގެންގޮސް ނިންމާލައިފިއެވެ.

މިއަދު ކުރިއަށްދިޔަ އަޑުއެހުމުގައި އޮތީ ޚުލާސާ ބަޔާން އިއްވުމެވެ. އެހެންނަަމަވެސް، ދިފާއީ ވަކީލުން ވަނީ ޚުލާސާ ބަޔާން ތައްޔާރު ކުރުމުގައި ކޮންމެހެން ބޭނުންވާ ލިއެކިއުންތައް ލިބިފައިނުވާކަމަށް ބުނެފައެވެ. އެކަމާ ގުޅިގެން މައްސަލަ ބައްލަވާ ގާޒީ އިސްމާއިލް ޝަފީއު ވަނީ ނުލިބޭ ލިޔުންތައް ފާހަގަކޮށް އެކަން ކޯޓަށް އެންގުމަށް ދިފާޢީ ވަކީލަށް އަންގަވާފައެވެ. އެއަށްފަހު މިއަދުގެ އަޑުއެހުން ވަނީ ނިންމަވާލައްވާފައެވެ.

ޖައިލަމް މަރާލީ 2015 އަހަރުގެ ފެބްރުއަރީ މަހުގެ 21 ވަނަ ދުވަހުގެ ރޭ 10:00 އެހާކަންހާއިރު އެވެ. ޖައިލަމް މަރުވެފައި ވަނީ އޭނާގެ ގެ ކައިރީގައި ހުއްޓައި ދެ ސައިކަލްގައި ދިޔަ ތިން މީހުންގެ ތެރެއިން އެކަކު ޖައިލަމަށް ވަޅިން ދިން ހަމަލާގެ ސަބަބުންނެވެ. ޖައިލަމްގެ ހަށިގަނޑުގެ 12 ތަަނަކަށް ވަޅިން ހަމަލާދީފައިވާ ކަމަށް ޕޯސްޓްމޯޓަމް ރިޕޯޓުން ދައްކައެވެ.

މިމައްސަލައިގައި ދައުލަތުން ވަނީ ހަތަރު މީހެއްގެ މައްޗަށް ދައުވާ އުފުލުފާ އެވެ. އެއީ ޏ. ފުވައްމުލައް، ޖަމްނާ އަލީ އިރުފާން، ގއ. ވިލިނގިލީ ފިޔަޖަހާގޭ މުހައްމަދު ހުމައިދު، ސ. ފޭދޫ، ވީނަސް ވިލާ ނަސީބު ސައީދު އަދި ވ. ސިނަމާލެ އިސްމާއިލް އަނީގުގެ މައްޗަށެވެ.

ޖައިލަމް މަރުގެ މައްސަލައިގައި ދައުވާ ލިބޭ ހަތަރު މީހުންގެ މައްޗަށްވެސް ދަޢުލަތުން ކުރަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ދައުވާއެވެ. ދައުވާ ލިބޭ އެންމެން ވަނީ އެ ދައުވާއަށް އިންކާރުކޮށްފަ އެވެ.