މާލޭގެ ގެއެއްގެ ތެރޭގައި މަރުވެފައި އޮށްވާ މިދިޔަ އާދީއްތަ ދުވަހު ފެނުނު ހާޝިމްގެ މަރުގައި ޖިނާއީ އަމަލެއްގެ ނިޝާނެއް ނެތް ކަމަށް ފުލުހުން ހާމަކޮށްފިއެވެ.

މިމަހުގެ 2 ވަނަ ދުވަހުގެ ރޭ ނިޔާވެފައި އޮއްވާ ފެނިފައިވަނީ ޢުމުރުން 44 އަހަރުގެ ހއ. ހޯރަފުށި ޑީންސްވިލާ، ހާޝިމް މުހައްމަދު ކަމަށް މަޢުލޫމާތު ލިބިފައިވެއެވެ.

ހާޝިމް މަރުވެފައި އޮތީ އޭނާ ދިރިއުޅޭ އެޕާޓްމަންޓުގަ އެވެ. އެތަނުގައި އޭނާ މާލޭގައި ހިންގާ ބައެއް ފިހާރަތަކުގައި މަސައްކަތް ކުރާ ބިދޭސީންތަކެއް ވެސް އުޅެ އެވެ.

ފުލުހުން މިއަދު ބުނީ އެ މަރުގައި ޖިނާއީ އަމަލެއް އަދި އިހުމާލެއް ފާހަގަ ކުރެވިފައި ނުވާ ކަމަށެވެ. އަދި މި ހާދިސާ އާއި ގުޅިގެން ބަލަންޖެހޭ ކަންކަން ބަލަމުންދާ ކަމަށް ފުލުހުންގެ އިދާރާއިން ބުނެފައިވެއެެވެ.

ފުލުހުން ބުނީ މާފަންނު ގެއެއްގެ ތެރޭގައި މީހަކު ވެއްޓިފައި އޮތް ކަމުގެ މައުލޫމާތު ޖެނުއަރީ 2 ވަނަ ދުވަހުގެރޭ 21:03 ހާއިރު ލިބިފައިވާ ކަމަށެވެ. ފުލުހުން ސީނަށް ދިޔައިރު އޭނާ ނިޔާވެފައިވާ ކަމަށް ހާދިސާ ހިނގި ސަރަހަައްދަށް ދިޔަ ފުލުހުންގެ ޑޮކްޓަރާއި ހަވާލާދީ ފުލުހުން ބުނެ އެވެ.