2018 ވަނަ އަހަރުގެ ރިޔާސީ އިންތިހާބު ބާތިލްކުރަން ކޯޓަށް ހުށައެޅުމަށް އިދިކޮޅު ޕީޕީއެމުން ނިންމައިފި އެވެ.

އިދިކޮޅު ޕީޕީއެމުން މިއަދު ބޭއްވި ނޫސްވެރިންގެ ބައްދަލުވުމެއްގައި ބުނެފައިވަނީ 2018 ވަނަ އަހަރުގެ ސެޕްޓެމްބަރގައި ބޭއްވި ރިޔާސީ އިންތިހާބު އޮޅުވާލާފައިވާ ކަމަށާއި އެކަމާ ގުޅުންހުރި ގިނަ ހެކިތަކެއް މިހާރު ލިބިފައިވާ ކަމަށެވެ. އެހެންކަމުން އެ މައްސަލަތައް ކޯޓުތަކާއި ކަމާބެހޭ އެހެނިހެން މުއައްސަސާތަކަށް ހުށައަޅާނެކަމަށް ޕީޕީއެމުން ވަނީ ބުނެފައެވެ.

އަލަށް ލިބިފައިވާ ހެކިތަކުގެ ތެރޭގައި ވޯޓުލީ މީހުންގެ އަދަދާއި ފޮށީގައި ހުރި ކަރުދާހުގެ އަދަދު ދިމާ ނުވުން ހިމެނޭ ކަމަށް ޕީޕީއެމުން ބުންޏެވެ. އަދި ވޯޓު ކަރުދާސްތައް އަންދާނުލި ނަމަ ވޯޓު ކަރުދާހުގައި ހުރި އޮޅުވާލުންތައް އިތުރަށް ސާފުވާނެ ކަމަށް މިއަދު ބޭއްވި ނޫސްވެރިންގެ ބައްދަލުވުމުގައި ޕީޕީއެމުން ވަނީ ބުނެފައެވެ.

2018ވަނަ އަހަރުގައި އޮތް ރިޔާސީ އިންތިޚާބުގެ ރަސްމީ ނަތީޖާ ދައްކާގޮތުން ޕީޕީއެމްގެ ރިޔާސީ ކެންޑިޑޭޓް ރައީސް ޢަބްދުﷲ ޔާމީން ޢަބްދުލް ޤައްޔޫމަށް ލިބިވަޑައިގެންފައިވަނީ 96،052 ވޯޓެވެ. އަދި އެމްޑީޕީގެ ކެންޑިޑޭޓް އިބްރާހީމް މުހައްމަދު ސާލިހަށް ލިބިވަޑައިގެންފައިވަނީ 134،705 ވޯޓެވެ. ތަޖުރިބާކާރުން ގަބޫލުކުރާ ގޮތުގައި މި ތަފާތަކީ އިންތިހާބެއްގެ ނަތީޖާ އޮޅުވާލުމަށް މާ ތަފާތު ބޮޑު އަދަދެކެވެ.

އިންތިޚާބު އޮޅުވާލާފައިވާ ކަމަށްބުނެ ޕީޕީއެމުން އެ މައްސަލަ ސުޕްރީމް ކޯޓަށްވެސް ހުށައެޅިއެވެ. ނަމަވެސް ކޯޓުންވެސް ނިންމާފައިވަނީ އިންތިޚާބުގެ ނަތީޖާ ޞައްޙަ ކަމަށެވެ.