އދ. ދަނގެތީގައި އަނިޔާވެރި ގޮތަކަށް މަރާލާފައި އޮއްވާ ފެނުނު މަހުމޫދު އަބޫބަކުރުގެ މަހާނަ
އދ. ދަނގެތީގައި އަނިޔާވެރި ގޮތަކަށް މަރާލާފައި އޮއްވާ ފެނުނު މަހުމޫދު އަބޫބަކުރުގެ މަހާނަ
އަނިޔާވެރި ގޮތަކަށް ޤަތުލުކޮށް މަރާލި އދ. ދަނގެތީ މަޝްހޫރު ވިޔަފާރިވެރިޔާ ޢުމުރުން 57 އަހަރުގެ މަހުމޫދު އަބޫބަކުރުގެ މަރުގެ މައްސަލައިގައި ދަޢުވާ އުފުލާފައިވާ ބަންގްލަދޭޝްގެ ޝާ އަލޮމް މިއާ އެ ޢަމަލު ހިންގިކަމަށް ކޯޓުގައި އިޢުތިރާފްވެއްޖެއެވެ.

މަޙްމޫދު މަރާލާފައިވަނީ މިއަހަރުގެ އޮކްޓޯބަރ މަހުގެ 13 ވަނަ ދުވަހުއެވެ. މި މައްސަލާގައި ޝާ އަލޮމް މިއާ އެދިފައިވަނީ އިއުތިރާފުގެ އެއްބަސްވުމެއް ހަދައި އަދަބު ލުއިކޮށްދިނުމަށެވެ. ނަމަވެސް މަހްމޫދުގެ ހުރިހާ ވާރިސުން ވެސް މަރަށް މަރު ހިފަން ބޭނުންވާތީ ޕްރޮސެކިއުޓަރ ޖެނެރަލްގެ އޮފީހުން ނިންމާފައި ވަނީ ޝާ އަލޮމް މިއާއަށް އިއުތިރާފުގެ އެއްބަސްވުމެއް ނުދިނުމަށެވެ.

ޕްރޮސެކިއުޓަރ ޖެނެރަލްގެ އޮފީހުން ޝާ އަލޮމްގެ މައްޗަށް އުފުލީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނާއި ޙަވާލާދީ ގަސްދުގައި މީހަކު މެރުމުގެ ދައުވާ އާއި، ޤާނޫނުލްޢުޤޫބާތާއި ޙަވާލާދީ މައްޔިތާގެ ބޭނުން ނަހަމަ ގޮތުގައި ކުރުމުގެ ދައުވާއެވެ.

މިއަދުގެ ޝަރީޢަތުގައި ޝާ އަލޮމް ބުނެފައި ވަނީ ދަޢުލަތުން އުފުލާފައިވާ ހުރިހާ ދަޢުވާއަކަށްވެސް އިޢުތިރާފްވާ ކަމަށެވެ. އަދި މިއީ ޝައިޠާނާ ބޮލަށް އެރިގެން ކުރެވުނު އަމަލެއް ކަމަށާއި އެކަމަށް މާފަށް އެދޭ ކަމަށެވެ. އަދި އިތުރަށް ދައްކާނެ ވާހަކައެއް ނެތްކަމަށާއި ލުއި އަދަބެއް ކަނޑައަޅައިދިނުން އެދޭކަމަށް ވެސް ޝާ އަލޮމް ވަނީ މިއަދު ކޯޓުގައި ބުނެފައެވެ.

މި މައްސަލަ ބައްލަވާ ގާޒީ ޝަކީލް މިއަދު ވިދާޅުވީ މިމައްސަލަ ދެން ކުރިއަށްދާނީ އަވަސް ނިޔާގެ މައްސަލައެއްގެ ގޮތުގައި ކަމަށެވެ. އަދި މިމައްސަލައިގެ އިތުރު އަޑުއެހުމެއް މި މަހުގެ 26 ވަނަ ދުވަހުގެ ހެނދުނު 9:30 ގައި ބާއްވާނެކަމަށް ގާޒީ ވިދާޅުވިއެވެ.

ފުލުހުން ޝާ އަލޮމް ހައްޔަރުކޮށްފައިވަނީ މަހުމޫދު މަރާލާފައި އޮއްވާ ފެނުނު ގޯއްޗާއި 150 ވަރަކަށް ފޫޓް ދުރުގައި ހުރި އެރަށު ނެދުންގެއިންނެވެ. އޭނާއަކީ އެގޭގައި އުޅޭ އުމުރުން ދުވަސްވީ މީހަކު ބަލަހައްޓަން ގެނެސްފައި ހުރި ބިދޭސީއެކެވެ.

މި މައްސަލާގައި ފުލުހުން ބުނެފައިވަނީ މަޙުމޫދު މަރާލީ ފައިސާގެ ދަހިވެތި ކަމުގައި ކަމަށެވެ. އޭގެއިތުރުން މަހްމޫދު މަރާލީ ވަޅިންނާއި ކޮޅު ތޫނުކޮށްފައިވާ ދެ ދަގަނޑުބުރިން މަހްމޫދުގެ މެޔާއި ކަރަށް ހަމަލާދީގެން ކަމަށެވެ. އަދި މަރާލުމަށްފަހު ބޮލާއި ފައި ގޯންޏަކުން ބަނދެ ފަޅުގޭތެރޭގައި ހުރި ވަޅަށް އެއްލާލީވެސް ޝާ އަލޮމް މިއާ އެކަންޏެވެ. އަދި މިކަމުގައި އިތުރު އެއްވެސް މީހެެއްގެ ބައިވެރިވުން އޮތްކަން ތަހުޤީޤަށް ފާހަގަވެފައި ނުވާކަމަށް ފުލުހުން ވަނީ ބުނެފައެވެ.

މިދިޔަ ޑިސެންބަރު މަހުގެ ދެވަނަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ، މަހުމޫދުގެ ބޮލަށް ބޮޑު ތިން އަނިޔާއެއް ދީފައި ހުރިކަން ފާހަގަވާ ކަމަށެވެ. އަދި ހަށިގަނޑު އެކި ތަންތަނުން 30 އަށްވުރެ ގިނަ ޒަހަމްތައް ފާހަގަ ކުރެވޭ ކަމަށާއި، ފަސް ގަޑިއިރުގެ ތެރޭގައި ތިން ފަހަރެއްގެ މަތިން ހަމަލާ ދީފައި ހުރި ކަމަށެވެ. ފުލުހުން ބުނީ ހަމަލާ ދިނުމަށް ފަހު މަރުނުވާހެން ހީވި ކޮންމެ ފަހަރަކު އަނެއްކާވެސް ހަމަލާ ދީފައި ހުރި ކަމަށެވެ.

މަޙްމޫދުގެ މަރާ ގުޅިގެން ފުލުހުން ވަނީ ބިދޭސީ މީހާ އުޅެމުންދިޔަ ގެ ބަލާ ފާސްކޮށް ގިނަ ހެކިތަކެއް ހޯދާފައެވެ. އެގޮތުން މަޙްމޫދުގެ ފޯނާއި އައިޑީ ކާޑުގެ އިތުރުން މައްސަލައާ ގުޅުންހުރި އިތުރު ހެކިތަކެއް ހޯދިފައިވާ ކަމަށް ފުލުހުން ބުނެއެވެ.

ދަނގެތީގައި ހޮޓަލެއް ހިންގުމުގެ އިތުރުން ކާޑުގެ ބާވަތްތައް ވިއްކައި އަދި އޮޑިދޯނިފަހަރު ވެސް ދުއްވާ މަޝްހޫރު ވިޔަފާރިވެރިޔާ މަހުމޫދުގެ މަރުގެ މައްސަލާގައި އިތުރު މީހަކު ބައިވެރިވެފައި ނުވާކަމަށްވެސް ފުލުހުން ވަނީ ބުނެފައެވެ.



ކިޔުންތެރިންގެ ހިޔާލު



ޓްރެންޑިން