އައިޖީއެމްއެޗްގައި ހީމޯޑަޔަލެސިސް ނަރުހެއްގެ ގޮތުގައި މަސައްކަތް ކުރަމުންދިޔަ ފިލިޕިންސްގެ މޭރީ ގްރޭސް ޕިނޭޑާގެ މަރުގެ މައްސަލާގައި ދަޢުވާ އުފުލާފައިވާ އޭނާގެ ފިރިމީހާ މާވިން އެސްވައި ވާގަސްއަށް ވަކީލަކު ޢައްޔަނު ކުރުމަށް 10 ދުވަސް ދީފިއެވެ.

މޭރީގެ މަރުގެ މައްސަލާގައި މާވިންގެ ލޯބިވެރިޔާ ޙަލީމަތު ލަމްހާ އާއި މާވިންގެ މައްޗަށް ދައުވާ އުފުލައި ޕްރޮސެކިއުޓާ ޖެނެރަލް އޮފީހުން ކުރިމިނަލް ކޯޓަށް މައްސަލަ ފޮނުވީ މިމަހުގެ ހަތަރު ވަނަ ދުވަހުއެވެ. ކުރިމިނަލް ކޯޓުން އެ މައްސަލައިގެ ޝަރީއަތް ބާއްވާފައި ވަނީ މިއަދު ހެނދުނު 10:00 އަށެވެ.

މައްސަލަ ހުށައަޅަމުން ދަޢުލަތުން ބުނީ ފިލިޕީންސްގެ ނަރުސް، މޭރީ މަރާލީ މިދިޔަ އޮކްޓޫބަރު މަހުގެ 19 ދުވަހުގެ މެންދުރު 12:00 އާއި 12:49 އާ ދެމެދުގެ ވަގުތެއްގައި، ފިލިޕީންސަށް ނިސްބަތްވާ އެ ދެމަފިރިން ދިރިއުޅެމުން ދިޔަ މއ. އުދުހޭކޮކާގޭގެ ފުރަތަމަ ފަންގިފިލާގެ ތެރޭގައި ކަމަށެވެ. އަދި ނޭވާ ހާސްކޮށްގެން މީހުން މަރާލާނެ ގޮތުގެ ފޮޓޯތަކެއް މޭރީގެ ފިރިމީހާ އަދި ގާތިލު ކަމަށް ތުހުމަތުވާ މާވިން ގޫގުލް ސާޗް ކުރި ކަމަށް ދަޢުލަތުން ވަނީ ބުނެފައެވެ.

ޝަރީއަތުގެ ކުރިން ހުށަހަޅާ ކަމެއްގެ ގޮތުގައި ދައުލަތުން މިއަދު އެދުނީ މާވިންގެ ބަންދުގެ މުއްދަތު މިއަދު މެންދުރަށް ހަމަވާތީ، އޭނާގެ ބަންދުގެ މުއްދަތު އިތުރުކޮށްދިނުމަށެވެ. މާވިން އެދުނީ ފުލުހުންގެ ކަސްޓޯޑިއަލް ޖަލަށް އޭނާ ބަދަލުކޮށްދިނުމަށެވެ. އެކަމުގައި ދެން އޮންނަ އަޑުއެހުމުގައި ގޮތެއް ނިންމަވަން ކަނޑައަޅައި، މާވިންގެ ބަންދަށް އިތުރު 30 ދުވަސް ގާޒީ ހުސައިން ފާއިޒް ރަޝާދު އިތުރުކޮށްދެއްވި އެވެ. އަދި ވަކީލަކު އައްޔަން ކުރުމަށް 10 ދުވަހުގެ މުއްދަތެއް އޭނާއަށް ދިނެވެ.

މި މައްސަލާގައި ނަރުހުގެ ފިރިމީހާ 29 އަހަރުގެ މާވިން ހައްޔަރުކުރީ މިދިޔަ އަހަރުގެ އޮކްޓޯބަރު މަހުގެ 27 ވަނަ ދުވަހުއެވެ. ޕީޖީ އޮފީހުން ވަނީ މާވިންގެ މައްޗަށް މީހަކު މެރުމުގެ ދައުވާކޮށްފައެވެ. މާވިން ލޯބީގެ ގޮތުން ގުޅިގެން އުޅުނީ 24 އަހަރުގެ ލަމްހާ އާއެވެ.

މާވިންގެ މައްޗަށް ކޮށްފައިވަނީ އެނގިހުރެ މީހަކު މެރުމުގެ ދައުވާއެވެ. އެ ދަޢުވާ މާވިންގެ މައްޗަށް ކުރަނީ އޮކްޓޫބަރު 19، 2021 ދުވަހުގެ 12:00 އާއި 12:49 އާ ދެމެދުގެ ވަގުތެއްގައި، އޭނާ ދިރިއުޅޭ މއ. އުދުހޭކޮކާގޭގެ ފުރަތަމަ ފަންގިފިލާގެ ތެރޭގައި މޭރީގެ ބޮލާއި ކަރަށް ހަމަލާދީގެންނާއި ނޭވާ ހާސްކޮށްގެން މަރާލާފައިވާތީ އެވެ. މި ކުށުގެ އަސާސީ އަދަބަކީ 10 އަހަރަށް ޖަލަށް ލުމެވެ.

މި މައްސަލާގައި ހިމެނޭ ޅ. ހިންނަވަރު، މާފިނި ހަލީމަތު ލަމްހާ އަބްދުއްރަހްމާންގެ ޝަރީޢަތްވެސް މިއަދު ވަނީ ކުރިއަށް ގެންގޮސްފައެވެ. ދެމީހުންގެ ޝަރީޢަތް ކުރިއަށް ގެންދަނީ ވަކިންނެވެ.

ލަމްހާގެ ޝަރީޢަތުގެ އަޑުއެހުމުގައި ދަޢުލަތުން ބުނެފައިވަނީ މިދިޔަ އޮކްޓޯބަރު މަހުގެ 10 ވަނަ ދުވަހު އިންޖެކްޝަން ޖަހާނެ ގޮތުގެ އިރުޝާދު ދިނުމަށް ލަމްހާ، މާވިންއަށް މެސެޖެއް ފޮނުވި ކަމަށެވެ. އެ މެސެޖުގައި، އެކަން ކުރާއިރު ސަމާލުވުމަށް އެދިފައި ވާކަމަށައި މޭރީ މަރައިލުމަށް ރާވާއި އެކަން މާވިންއަށް މަގުފަހިކޮށްދިނީ ލަމްހާ ކަމަށް ދައުލަތުން ވަނީ ބުނެފަ އެވެ.

ލަމްހާގެ ދިފާޢީ ވަކީލް ޢަބްދުالله ޝާއިރު ވިދާޅުވީ މޭރީ މަރުވީ ދަންޖެހިގެން ނޫންކަން ސާބިތުކުރުމަށް ދަޢުލަތުން ގިނަ ހެކިތަކެއް ހުށައަޅާފައިވާއިރު އެކަން ލަމްހާ އާ ގުޅުވައި ނުލެވޭނެ ކަމަށާއި، ދައުލަތުން ސާބިތުކޮށްދޭން ޖެހޭނީ ލަމްހާ މޭރީއަށް އިންޒާރު ދިން ކަމާއި އަދި މޭރީ މަރައިލަން މާވިންއަށް މަގުފަހިކޮށްދިން ކަން ކަމަށެވެ. އެކަންކަން ސާބިތުވާނެ އެއްވެސް ހެއްކެއް ނެތް ކަމަށް ވަކީލް ވިދާޅުވި އެވެ.

މިއަދުގެ އަޑުއެހުމުގައި މައްސަލަ ބައްލަވާ ގާޒީ ހުސެން ފާއިޒް ރަޝާދް ވަނީ މިހާރު ހުރި ހެކިތަކަށް ބަލައި، އިތުރު 30 ދުވަހު ލަމްހާ ބަންދުގައި ބަހައްޓަން އަމުރުކުރައްވާފައެވެ.

މޭރީގެ މަރުގެ މައްސަލައިގައި 24 އަހަރުގެ ލަމްހާ ހައްޔަރުކުރީ ޑިސެމްބަރު 16 ވަނަ ދުވަހުއެވެ. ޕްރޮސިކިއުޓަރ ޖެނެރަލްގެ އޮފީހުން ހަލީމަތު ލަމްހާގެ މައްޗަށް ތިން ދައުވާއެއް އުފުލާފައިވެއެވެ. އެއީ އެނގިހުރެ މީހަކު މެރުމުގައި ބައިވެރިވުމާއި އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރުހިންގުމާއި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ދަޢުވާ އެވެ.

މީގެ ތެރެއިން އެނގިހުރެ މީހަކު މެރުމުގައި ބައިވެރިވުމުގެ ކުށުގެ އަސާސީ އަދަބަކީ ހަ އަހަރަށް ޖަލަށް ލުމެވެ. މި ދައުވާކުރަނީ މޭރީ މަރާލުމުގައި އެހީތެރިވެދީފައިވާތީ އާއި މޭރީ މަރާލުމަށް ރޭވި ރޭވުމުގައި ބައިވެރިވެ، މޭރީ މަރާލުމުގެ އަމަލު ހިންގުމަށް މާވިންއަށް މަގުފަހިކޮށްދީފައިވާތީ އެވެ.

ލަމްހާއަށް ކުރާ އެހެން މީހެއްގެ މުދަލެއްގެ މައްޗަށް ހުއްދަ ނޫންގޮތެއްގައި ބާރުހިންގުމުގެ ކުށުގެ ދައުވާގެ އަސާސީ އަދަބަކީ ދެ މަހާއި ބާރަ ދުވަހަށް ޖަލަށް ލުމެވެ. މި ދައުވާ ކުރަނީ ލަމްހާ އުޅުނު ގެ ފާސްކުރިއިރު، އެ ގޭގައި އޭނާ ދިރިއުޅޭ ކޮޓަރީ ތެރެއިން ފެނުނު ސިޓީ އުރައެއްގެ ތެރެއިން، އައިޖީއެމްއެޗްގެ ހުއްދައަކާ ނުލައި، އެ ހޮސްޕިޓަލުން އޭނާ ނަގާފައިވާ، ހޮސްޕިޓަލުން ބޭރަށް ގެންދިއުން މަނާ، އަދި ހޮސްޕިޓަލުގެ ބޭނުމަށް އެކަނި ދޫކުރެވޭ އިންޖެކްޝަންތަކެއް ފެނިފައިވާތީ އެވެ.

ލަމްހާއަށް ކުރާ ތިން ވަނަ ދައުވާ ކަމަށްވާ ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ކުށުގެ އަސާސީ އަދަބަކީ ވެސް ދެ މަހާއި ބާރަ ދުވަހަށް ޖަލަށް ލުމެވެ. މި ދައުވާކުރަނީ ހޮސްޕިޓަލް އަދި ފަރުވާދޭ މަރުކަޒުތަކުގެ ބޭނުމަށް އެކަނި ދޫކުރެވޭ ބާވަތުގެ ބޭސްތަކެއް ލަމްހާ އުޅޭ ތަނުން ފެނިފައިވާތީ އެވެ.

މި މައްސަލާގައި މީގެކުރިން ފުލުހުން ބުނެފައިވަނީ ފިލިޕީންސް އަންހެން މީހާ އުޅޭ ގޭގައި އޭނާ ދަންޖެހިފައި ހުއްޓާ ފެނިގެން ކަމަށް ބުނެ، ރިޕޯޓް ކުރުމުން ފުލުހުން އެތަނަށް ދިއުމުގެ ކުރިން އަންހެން މީހާ ވަނީ ހޮސްޕިޓަލަށް ގެންގޮސްފައި ކަމަށެވެ.

އަދި އެ މަރަކީ ދަންޖެހިގެން އަމިއްލައަށް މަރުވެފައިވާ މަރެއްނޫންކަމާއި އޭނާ މަރާލާފައި އޮތް ކަމަށް އެންމެ ބޮޑަށް ޝައްކުވީ ދަންޖެހިފައި ހުރި ކަމުގެ ނިޝާނެއް ހަށިގަނޑުން ފެންނަން ނެތުމުން ކަމަށް ބައެއް ރިޕޯޓްތައް ބުނެއެވެ. މީގެއިތުރުންވެސް ޝައްކުވާ ގިނަ ކަންތައްތަކެއް ހުރި ކަމަށްވެއެވެ. އަދި މޭރީ ގްރޭސްގެ ޕޯސްޓްމޯޓަމް ރިޕޯޓުން ދައްކާފައިވަނީ އޭނާ މަރުވެފައިވަނީ "ބްލަންޓް އިންޖަރީ" ނުވަތަ އެއްޗެއް ބޭނުން ކޮށްގެން މީހަކު ދިން އަނިޔާއެއްގެ ސަބަބުން ކަމަށެވެ.

މޭރީގެ މަރުގެ މައްސަލައިގައި ފިރިމީހާ މާވިން ހައްޔަރުކޮށް މައްސަލައިގެ ތަހުގީގު އިތުރަށް ފުޅާ ކުރުމަށްޓަކައި އޭނާގެ ދިވެހި ލޯބިވެރިޔާ ލަމްހާގެ ފޯނު ފުލުހުން ހިފެހެއްޓިއެވެ. އައިޖީއެމްއެޗްގައި ނަރުހެއްގެ ވަޒީފާ އަދާކުރާ ލަމްހާ މިހާރު ހުރީ އައިޖީއެމްއެޗްގެ ވަޒީފާއިންވެސް ސަސްޕެންޑް ކޮށްފައެެވެ.