އައިޖީއެމްއެޗްގައި ހީމޯޑަޔަލެސިސް ނަރުހެއްގެ ގޮތުގައި މަސައްކަތް ކުރަމުންދިޔަ ފިލިޕިންސްގެ މޭރީ ގްރޭސް ޕިނޭޑާގެ މަރުގެ މައްސަލާގައި ދަޢުވާ އުފުލާފައިވާ ޅ. ހިންނަވަރު، މާފިނި ހަލީމަތު ލަމްހާ އަބްދުއްރަހްމާންގެ ބަންދާމެދު ގޮތެއް ނިންމުމަށް ހޯމަ ދުވަހު އިތުރު އަޑުއެހުމެއް ބޭއްވުމަށް ނިންމައިފިއެވެ.

މޭރީގެ މަރުގެ މައްސަލާގައި ޙަލީމަތު ލަމްހާ އާއި މާވިންގެ މައްޗަށް ދައުވާ އުފުލައި ޕްރޮސެކިއުޓާ ޖެނެރަލް އޮފީހުން ކުރިމިނަލް ކޯޓަށް މައްސަލަ ފޮނުވީ މިދިޔަމަހުގެ ހަތަރު ވަނަ ދުވަހުއެވެ. ކުރިމިނަލް ކޯޓުން އެ މައްސަލައިގެ ޝަރީއަތް ބާއްވާފައި ވަނީ އިއްޔެއެވެ.

މި މައްސަލާގައި ހިމެނޭ ދެމީހުންގެ ޝަރީޢަތް ވަކިވަކިން ކުރިއަށް ގެންގޮސްފައިވާއިރު ޅ. ހިންނަވަރު، މާފިނި ހަލީމަތު ލަމްހާ އަބްދުއްރަހްމާންގެ އަޑުއެހުމުގައި ދިފާއީ ވަކީލު ވިދާޅުވީ، ބަންދު މުރާޖައާ ފޯމު ލިބިފައިވަނީ ލަހުންކަމަށާއި އެހެންކަމުން ދައުލަތުން ހުށައަޅާފައިވާ ފޯމާ ގުޅިގެން އިތުރު ވަގުތު ބޭނުންވާ ކަމަށެވެ. އަދި ދައުލަތުންވެސް ވަނީ ދިފާއަށް އެ ފުރުސަތު ދެއްވުމުގައި އިއުތިރާޒެއް ނެތްކަން ފާހަގަ ކުރައްވާފައެވެ.

އެހެންކަމުން އެމައްސަލައިގެ އަޑުއެހުމެއް 21 ފެބްރުއަރީގައި ބާއްވައި ލަމްހާގެ ބަންދާމެދު ތަފްސީލީ ގޮތެއްގައި ވާހަކަ ދެއްކުމަށް ގާޒީ ވަނީ ނިންމަވާފައެވެ. ހަމައެއާއެކު ލަމްހާގެ ބަންދު އިތުރު 4 ދުވަހުގެ މުއްދަތަށް ގާޒީ އިތުރުކުރެއްވިއެވެ.

އެންމެ ފަހުންއޮތް ލަމްހާގެ ޝަރީޢަތުގެ އަޑުއެހުމުގައި ދަޢުލަތުން ބުނެފައިވަނީ މިދިޔަ އަހަރުގެ އޮކްޓޯބަރު މަހުގެ 10 ވަނަ ދުވަހު އިންޖެކްޝަން ޖަހާނެ ގޮތުގެ އިރުޝާދު ދިނުމަށް ލަމްހާ، މާވިންއަށް މެސެޖެއް ފޮނުވި ކަމަށެވެ. އެ މެސެޖުގައި، އެކަން ކުރާއިރު ސަމާލުވުމަށް އެދިފައި ވާކަމަށައި މޭރީ މަރައިލުމަށް ރާވާއި އެކަން މާވިންއަށް މަގުފަހިކޮށްދިނީ ލަމްހާ ކަމަށް ދައުލަތުން ވަނީ ބުނެފަ އެވެ.

ލަމްހާގެ ދިފާޢީ ވަކީލް ޢަބްދުالله ޝާއިރު ވިދާޅުވީ މޭރީ މަރުވީ ދަންޖެހިގެން ނޫންކަން ސާބިތުކުރުމަށް ދަޢުލަތުން ގިނަ ހެކިތަކެއް ހުށައަޅާފައިވާއިރު އެކަން ލަމްހާ އާ ގުޅުވައި ނުލެވޭނެ ކަމަށާއި، ދައުލަތުން ސާބިތުކޮށްދޭން ޖެހޭނީ ލަމްހާ މޭރީއަށް އިންޒާރު ދިން ކަމާއި އަދި މޭރީ މަރައިލަން މާވިންއަށް މަގުފަހިކޮށްދިން ކަން ކަމަށެވެ. އެކަންކަން ސާބިތުވާނެ އެއްވެސް ހެއްކެއް ނެތް ކަމަށް ވަކީލް ވިދާޅުވި އެވެ.

މޭރީގެ މަރުގެ މައްސަލައިގައި 24 އަހަރުގެ ލަމްހާ ހައްޔަރުކުރީ ޑިސެމްބަރު 16 ވަނަ ދުވަހުއެވެ. ޕްރޮސިކިއުޓަރ ޖެނެރަލްގެ އޮފީހުން ހަލީމަތު ލަމްހާގެ މައްޗަށް ތިން ދައުވާއެއް އުފުލާފައިވެއެވެ. އެއީ އެނގިހުރެ މީހަކު މެރުމުގައި ބައިވެރިވުމާއި އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރުހިންގުމާއި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ދަޢުވާ އެވެ.

މީގެ ތެރެއިން އެނގިހުރެ މީހަކު މެރުމުގައި ބައިވެރިވުމުގެ ކުށުގެ އަސާސީ އަދަބަކީ ހަ އަހަރަށް ޖަލަށް ލުމެވެ. މި ދައުވާކުރަނީ މޭރީ މަރާލުމުގައި އެހީތެރިވެދީފައިވާތީ އާއި މޭރީ މަރާލުމަށް ރޭވި ރޭވުމުގައި ބައިވެރިވެ، މޭރީ މަރާލުމުގެ އަމަލު ހިންގުމަށް މާވިންއަށް މަގުފަހިކޮށްދީފައިވާތީ އެވެ.

ލަމްހާއަށް ކުރާ އެހެން މީހެއްގެ މުދަލެއްގެ މައްޗަށް ހުއްދަ ނޫންގޮތެއްގައި ބާރުހިންގުމުގެ ކުށުގެ ދައުވާގެ އަސާސީ އަދަބަކީ ދެ މަހާއި ބާރަ ދުވަހަށް ޖަލަށް ލުމެވެ. މި ދައުވާ ކުރަނީ ލަމްހާ އުޅުނު ގެ ފާސްކުރިއިރު، އެ ގޭގައި އޭނާ ދިރިއުޅޭ ކޮޓަރީ ތެރެއިން ފެނުނު ސިޓީ އުރައެއްގެ ތެރެއިން، އައިޖީއެމްއެޗްގެ ހުއްދައަކާ ނުލައި، އެ ހޮސްޕިޓަލުން އޭނާ ނަގާފައިވާ، ހޮސްޕިޓަލުން ބޭރަށް ގެންދިއުން މަނާ، އަދި ހޮސްޕިޓަލުގެ ބޭނުމަށް އެކަނި ދޫކުރެވޭ އިންޖެކްޝަންތަކެއް ފެނިފައިވާތީ އެވެ.

ލަމްހާއަށް ކުރާ ތިން ވަނަ ދައުވާ ކަމަށްވާ ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ކުށުގެ އަސާސީ އަދަބަކީ ވެސް ދެ މަހާއި ބާރަ ދުވަހަށް ޖަލަށް ލުމެވެ. މި ދައުވާކުރަނީ ހޮސްޕިޓަލް އަދި ފަރުވާދޭ މަރުކަޒުތަކުގެ ބޭނުމަށް އެކަނި ދޫކުރެވޭ ބާވަތުގެ ބޭސްތަކެއް ލަމްހާ އުޅޭ ތަނުން ފެނިފައިވާތީ އެވެ.

މި މައްސަލާގައި ހިމެނޭ މާވިންގެ ޝަރީޢަތުގެ އަޑުއެހުމުގައި ދައުލަތުން އިއްޔެ އެދުނީ މޭރީގެ ފިރިމީހާ މާވިން އެސްވައި ވާގަސްގެ ބަންދުގެ މުއްދަތު އިތުރުކޮށްދިނުމަށެވެ. އެކަމާގުޅިގެން ގާޒީ ހުސައިން ފާއިޒް ރަޝާދު ވަނީ މިހާރު ހުރި ހެކިތަކުގެ މައްޗަށް ބިނާކޮށް ޝަރީއަތް ނިމެންދެން މާވިން ބަންދު ކުރުމަށް އަމުރު ކުރައްވާފައެވެ.

މި މައްސަލާގައި ނަރުހުގެ ފިރިމީހާ 29 އަހަރުގެ މާވިން ހައްޔަރުކުރީ މިދިޔަ އަހަރުގެ އޮކްޓޯބަރު މަހުގެ 27 ވަނަ ދުވަހުއެވެ. ޕީޖީ އޮފީހުން ވަނީ މާވިންގެ މައްޗަށް މީހަކު މެރުމުގެ ދައުވާކޮށްފައެވެ.

މާވިންގެ މައްޗަށް ކޮށްފައިވަނީ އެނގިހުރެ މީހަކު މެރުމުގެ ދައުވާއެވެ. އެ ދަޢުވާ މާވިންގެ މައްޗަށް ކުރަނީ އޮކްޓޫބަރު 19، 2021 ދުވަހުގެ 12:00 އާއި 12:49 އާ ދެމެދުގެ ވަގުތެއްގައި، އޭނާ ދިރިއުޅޭ މއ. އުދުހޭކޮކާގޭގެ ފުރަތަމަ ފަންގިފިލާގެ ތެރޭގައި މޭރީގެ ބޮލާއި ކަރަށް ހަމަލާދީގެންނާއި ނޭވާ ހާސްކޮށްގެން މަރާލާފައިވާތީ އެވެ. މި ކުށުގެ އަސާސީ އަދަބަކީ 10 އަހަރަށް ޖަލަށް ލުމެވެ.

މި މައްސަލާގައި މީގެކުރިން ފުލުހުން ބުނެފައިވަނީ ފިލިޕީންސް އަންހެން މީހާ އުޅޭ ގޭގައި އޭނާ ދަންޖެހިފައި ހުއްޓާ ފެނިގެން ކަމަށް ބުނެ، ރިޕޯޓް ކުރުމުން ފުލުހުން އެތަނަށް ދިއުމުގެ ކުރިން އަންހެން މީހާ ވަނީ ހޮސްޕިޓަލަށް ގެންގޮސްފައި ކަމަށެވެ.

އަދި އެ މަރަކީ ދަންޖެހިގެން އަމިއްލައަށް މަރުވެފައިވާ މަރެއްނޫންކަމާއި އޭނާ މަރާލާފައި އޮތް ކަމަށް އެންމެ ބޮޑަށް ޝައްކުވީ ދަންޖެހިފައި ހުރި ކަމުގެ ނިޝާނެއް ހަށިގަނޑުން ފެންނަން ނެތުމުން ކަމަށް ބައެއް ރިޕޯޓްތައް ބުނެއެވެ. މީގެއިތުރުންވެސް ޝައްކުވާ ގިނަ ކަންތައްތަކެއް ހުރި ކަމަށްވެއެވެ. އަދި މޭރީ ގްރޭސްގެ ޕޯސްޓްމޯޓަމް ރިޕޯޓުން ދައްކާފައިވަނީ އޭނާ މަރުވެފައިވަނީ "ބްލަންޓް އިންޖަރީ" ނުވަތަ އެއްޗެއް ބޭނުން ކޮށްގެން މީހަކު ދިން އަނިޔާއެއްގެ ސަބަބުން ކަމަށެވެ.