އަނިޔާވެރިކަމާއެކު ހަށިގަނޑުގެ 8 ތަނަކަށް ތޫނު އެއްޗަކުން ހަމަލާދީ މަރާލާފައިވާ ގއ. ދާންދޫ، ގޯލްޑް ލީފް، ހާރިސް ޢަބްދުލްޣަފޫރުގެ މަރުގެ މައްސައިގައި ދަޢުލަތުން ހުށައަޅާފައިވާ ބައެއް ސިއްރު ހެކިވެރިން ކޯޓުގައި ހެކިބަސްދިނުމަށް އިޢުތިރާޒް ކޮށްފިއެވެ.

ހުޅުމާލޭ ހާފްވޭ ހައުސްގައި މަސްތުވާތަކެތީގެ ވަބާއަށް ފަރުވާ ހޯދަމުންދިޔަ ހާރިސްއަށް ވަޅިން ހަމަލާ ދިފައިވަނީ، 2017 ސެޕްޓެމްބަރު މަހުގެ 29 ވަނަ ދުވަހުގެ ރޭ އާއިލީ ދުވަހަށް ބޭރަށް ދިއުމަށްފަހު އެނބުރި ހާފްވޭ ހައުސްއަށް ދަނިކޮށް، ހާފްވޭ ހައުސް ކައިރިން، ސައިކަލެއްގައި ދިޔަ ދެމީހަކެވެ.

ހާރިސް މަރާލިކަމުގެ ތުހުމަތުގައި ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާ އުފުލާފައިވާ ޏ. ފުވައްމުލައް، ހިލްޓަން ޔާމިން ރަޝީދުގެ ޝަރީޢަތުގެ އަޑުއެހުމެއް ކްރިމިނަލް ކޯޓުގައި މިއަދުވަނީ ކުރިއަށް ގެންގޮސްފައެވެ. މީގެ ކުރިން ދައުލަތުން ވަނީ ޔާމީންއާ ދެކޮޅަށް ހެކިބަސް ދިނުމަށް ސިއްރު 17 ހެކިވެރިންނާއި 13 ކިތާބީ ހެއްކެއް ހުށައަޅާފައެވެ. ނަމަވެސް ޔާމީން ވަނީ އޭނާގެ މައްޗަށް އުފުލާފައިވާ ދަޢުވާއަށް އިންކާރުކޮށްފައެވެ.

މި މައްސަލައިގައި މިދިޔަ މަހުގެ 17 ވަނަ ދުވަހު ބޭއްވި އަޑުއެހުމުގައި ޤާޟީ އާދަމް މުހައްމަދު ވަނީ ދައުލަތަށް ސިއްރު ހެކިވެރިން ހާޒިރުކުރަން ފަހު ފުރުސަތު ދެއްވައިފަ އެވެ. ނަމަވެސް މިއަދު ބޭއްވި މި މައްސަލައިގެ އަޑުއެހުމަށްވެސް އެޙާދިސާގެ މަންޒަރު ދުށްކަމަށް ދަޢުލަތުން ބުނާ ސިއްރު ހެކިވެރިން ޙާޟިރުކުރެވިފައެއް ނުވެއެވެ.

އެކަމާ ގުޅިގެން މައްސަލަ ބައްލަވާ ޤާޟީ އާދަމް މުހައްމަދު ވިދާޅުވީ ކްރިމިނަލް ކޯޓުން ތިން ފަހަރަށް ގުޅުމުންވެސް ހެކިވެރިން ހެކިބަސް ދިނުމަށް އުޒުރުވެރިވެފައިވާ ކަމަށެވެ. އެހެންކަމުން ޝަރީޢަތުން މިއަދު ނިންމަވާފައިވަނީ ސިއްރު ހެކިވެރިން ޙާޟިރުކުރުމަށް ދަޢުލަތަށް އެކަށީގެންވާ ވަގުތު ދެވިފައިވާތީ އިތުރު ވަގުތު ނުދެއްވުމަށެވެ.

މި މައްސަލާގައި މާޗު މަހު ހުލާސާ ބަޔާން ހުށައަޅައި އޭޕްރިލް މަހު ހުކުމް ކުރެއްވޭތޯ މަސައްކަތް ކުރައްވާނެ ކަމަށް ޤާޟީ މިއަދު ވިދާޅުވިއެވެ.