ދެހާސް ފަނަރަ ވަނަ އަހަރު ތޫނުއެއްޗަކުން ހަމަލާދީ މަރާލި ހ. ހަންޑްރެންޑް ފްލާވާސް ޖައިލަމް އަހުމަދު ޝާކިރުގެ މަރުގެ މައްސަލައިގައި ދަޢުލަތުން ދަޢުވާ އުފުލާފައިވާ މީހުންގެ މައްޗަށް ކުށްސާބިތުވާވަރަށް ހެކިނެތުމުން ކުށްސާބިތުނުވެ އެންމެން ސަލާމާތްވެއްޖެއެވެ.

މިއަދު ކުރިއަށްދިޔަ މިމައްސަލައިގެ އަޑުއެހުމުގައި ހުކުމް އިއްވަވަމުން އެ މައްސަލަ ބެއްލެވި ޤާޟީ އިސްމާއިލް ޝަފީއު ވިދާޅުވީ ދައުވާލިބޭ އެއްވެސް މީހެއްގެ މައްޗަށް ކުށް ސާބިތުވާ މިންވަރަށް ދަޢުލަތުން ހެކި ހުށަހަޅާފައިނުވާ ކަމަށެވެ. އެހެންކަމުން ބަންދުގައިތިބި އެންމެން ވެސް ވަނީ 7 އަހަރަށްފަހު ކުށް ސާބިތުނުވެ ސަލާމަތްވެފައެވެ.

މި މައްސަލަ ސާބިތުކުރުމަށް ދަޢުލަތުން 16 ހެކިވެރިން ހުށައެޅިނަމަވެސް ކޯޓަށް ޙާޟިރުވެފައިވަނީ 5 ހެކިވެރިއަކުކަން ޤާޟީ ފާހަގަ ކުރެއްވިއެވެ. އޭގެ އިތުރުން ދަޢުލަތުން ހުށައެޅި އެހެނިހެން ހެކިތަކުގެވެސް ޗެއިން އޮފް ކަސްޓަޑީ ރިޕޯޓް ހުށައަޅާފައިނުވާކަން ޤާޟީ ފާހަގަ ކުރެއްވިއެވެ.

ޖައިލަމް މަރާލީ 2015 އަހަރުގެ ފެބްރުއަރީ މަހުގެ 21 ވަނަ ދުވަހުގެ ރޭ 10:00 އެހާކަންހާއިރު އެވެ. ޖައިލަމް މަރުވެފައި ވަނީ އޭނާގެ ގެ ކައިރީގައި ހުއްޓައި ދެ ސައިކަލްގައި ދިޔަ ތިން މީހުންގެ ތެރެއިން އެކަކު ޖައިލަމަށް ވަޅިން ދިން ހަމަލާގެ ސަބަބުންނެވެ. ޖައިލަމްގެ ހަށިގަނޑުގެ 12 ތަަނަކަށް ވަޅިން ހަމަލާދީފައިވާ ކަމަށް ޕޯސްޓްމޯޓަމް ރިޕޯޓުން ދައްކައެވެ.

މިމައްސަލައިގައި ދައުލަތުން ވަނީ ހަތަރު މީހެއްގެ މައްޗަށް ދައުވާ އުފުލުފާ އެވެ. އެއީ ޏ. ފުވައްމުލައް، ޖަމްނާ އަލީ އިރުފާން، ގއ. ވިލިނގިލީ ފިޔަޖަހާގޭ މުހައްމަދު ހުމައިދު، ސ. ފޭދޫ، ވީނަސް ވިލާ ނަސީބު ސައީދު އަދި ވ. ސިނަމާލެ އިސްމާއިލް އަނީގުގެ މައްޗަށެވެ. އެމީހުން މި މައްސަލާގައި ބަންދުގައި ތިބޭތާ 7 އަހަރު ވަނީ ވެފައެވެ.

ޖައިލަމް މަރުގެ މައްސަލައިގައި ދައުވާ ލިބުނު ހަތަރު މީހުންގެ މައްޗަށްވެސް ދަޢުލަތުން ކޮށްފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ދައުވާއެވެ. ދައުވާ ލިބުނު އެންމެން ވަނީ އެ ދައުވާއަށް އިންކާރުކޮށްފަ އެވެ.