ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން ހުޅުމާލޭ ހިޔާފްލެޓްތަކުގައި ދިރިއުޅޭ ޢާއްމުންނަށް އަމާޒުކޮށްގެން ހޭލުންތެރިކަން އިތުރުކުރުމުގެ ޕްރޮގްރާމެއް ކުރިޔަށް ގެންގޮސްފިއެވެ.

އެޗްޑީސީން ބުނީ ހިޔާ ސަރަހައްދުގައި ދިރިއުޅޭ ޢާއްމުން ހޭލުންތެރިކުރުވުމުގެ ގޮތުން އެޗްޑީސީން އިސްނަގައިގެން ފުލުހުންްނާއި، ރެޑްކްރެސެންޓާއި، ހުޅުމާލެ ހޮސްޕިޓަލާއި، އެމް.އެން.ޑީ.އެފް އަދި މާލެ ސިޓީގެ އ.ތ.މ. ކޮމިޓީ ގުޅިގެން ޕްރޮގްރާމެއް ކުރިއަށް ގެންގޮސްފައިވާ ކަމަށެވެ.

މި ޕްރޮގްރާމްގައި އެޗްޑީސީންވަނީ ހިޔާ ސަރަޙައްދުގައި ކުނީގެ ޚިދުމަތަށް ރަޖިސްޓްރީކުރުމާއި، ކުނި އުކާލުމުގައި ޢަމަލު ކުރާނެ ގޮތްތަކާއި ގުޅޭގޮތުން މަޢުލޫމާތު ދީފައެވެ.

އޭގެއިތުރުން އެމްއެންޑީއެފުން ވަނީ، އަލިފާނުގެ ޙާދިސާއެއް ހިނގައިފި ނަމަ ޢަމަލުކުރާނެ ގޮތުގެ މަޢުލޫމާތު އާންމުންނަށް ދީފައެވެ. އަދި މޯލްޑިވްސް ރެޑްކްރެސެންޓްގެ ފަރާތުންވަނީ ކުއްލި ހާލަތްތަކުގައި ޢަމަލު ކުރާނެ ގޮތުގެ އިރުޝާދު އެ ސަރަޙައްދުގެ ރައްޔިތުންނަށް ފޯރުކޮށްދީފައެވެ.

މި ޕްރޮގްރާމަކީ ވަރަށް ކާމިޔާބު ޕްރޮގްރާމެއް ކަމަށް އެޗްޑީސީން ވަނީ ބުނެފައެވެ.