ހުޅުމާލޭ ފޭސް2ގެ ހިޔާ ފްލެޓް ސަރަޙައްދުގައި ޕްރީ ސްކޫލް އިމާރާތްކުރުމުގެ ޢަމަލީ މަސައްކަތްތައް ފަށައިފިއެވެ.

ހައުސިންގ ޑިވެލޮޕްމެންޓް ކޯޕަރޭޝަން އެޗްޑީސީން ބުނެފައިވަނީ މި ޕްރީ ސްކޫލް އަޅަނީ ހިޔާ ފްލެޓްގެ ޓަވަރު 3 އަދި 4 ކުރިމަތިން އޮންނަ ބިމުގައި ކަމަށެވެ. މި ޕްރީ ސްކޫލްގައި 24 ކްލާސްރޫމް ހިމެނޭއިރު، އެއީ އެއްފަހަރާ 400 އެއްހާ ކުދިންނަށް ކިޔަވައިދެވޭނެ ޖާގައެވެ.

އެސްޖޭ ކޮންސްޓްރަކްޝަނުން ޢިމާރާތްކުރާ މި ޕްރީ ސްކޫލްގެ ބިންގާ އަޅުއްވައިދެއްވީ ހައުސިން ޑެވެލޮޕަމަންޓް ކޯޕަރޭޝަންގެ ޑެޕިއުޓީ މެނޭޖިންގ ޑިރެކްޓަރ އަޙުމަދު އާތިފާއި ރައްޔިތުންގެ މަޖިލީހުގެ ހުޅުމާލެ ދާއިރާގެ މެންބަރު އަލީ ނިޔާޒެވެ.

ހިޔާ މަޝްރޫޢުގެ 25 ބުރީގެ 16 ޓަވަރުގައި ދިރިއުޅޭ ފަރާތްތަކުގެ ޢަދަދު އިންތިހާއަށް އިތުރުވެފައިވާތީ އެ ސަރަޙައްދުގައި އަސާސީ ޚިދުމަތްތައް ފުރިހަމަ ކުރުމުގެ މަސައްކަތް އެޗްޑީސީން ދަނީ ކުރަމުންނެވެ.

ހުޅުމާލޭގައި މިހާރު ތިން ސްކޫލު ހުރެއެވެ. އެެއީ ޣާޒީ ސްކޫލާއި، ރެހެންދި ސްކޫލް އަދި ހުރަވީ ސްކޫލް އެވެ. ހުޅުމާލޭ ފޭސް 2 ގައި ޢިމާރާތް ކުރާ ފުރަތަމަ ސްކޫލު ކަމަށްވާ ޞަލާޙުއްދީން ސްކޫލް އިމާރާތް ކުރުމަށް މިދިޔަ އަހަރުގެ ފެބްރުއަރީ 7 ވަނަ ދުވަހު ވަނީ އަމީން ކޮންސްޓްރަކްޝަނާ ހަވާލުކޮށްފައެވެ.

ހުޅުމާލޭ ދެވަނަ ފިޔަވަހީގައި 4 ސްކޫލު އެޅުމަށް މިހާތަނަށް ނިންމާފައިވާއިރު، އެޗްޑީސީން ބުނެފައިވަނީ ހުޅުމާޅޭ ދެވަނަ ފިޔަވަހީގައި ބޭރު ފަރާތަކުން ތަރައްޤީކުރާ އިންޓަރނޭޝަނަލް ސްކޫލެއްވެސް ހުންނާނެކަމަށެވެ.