ހުޅުމާލޭގެ ދެވަނަ ފިޔަވަހީގައި ތަރައްގީ ކޮށްފައިވާ ހިޔާ ފުލެޓުތަކުގެ މަހު ކުލި ނުދެއްކުމަށް ގޮވާލަމުން ދާތީ ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ކުށްވެރިކޮށްފިއެވެ.

ކުލި ނުދައްކާން ގޮވާލާ މައްސަލަ ކުށްވެރިކޮށް އެޗްޑީސީން މިއަދު ނެރުނު ބަޔާނެއްގައި ބުނެފައިވަނީ، ހިޔާ މަޝްރޫއުގެ ދަށުން ދޫކޮށްފައިވާ ފުލެޓުތަކަށް ދައްކަންޖެހޭ ފައިސާ ނުދެއްކުމަށް ބާރުއަޅާ މީސްމީޑިއާގެ އެކި މަންސަރުތަކުގައި ދައްކަމުންދާ ވާހަކަތަކުގައި، މެއިންޓެނެންސް ފީ ނެގޭނީ އެގްރީމެންޓްގެ 13 ވަނަ މާއްދާގެ (ހ) ގައި ބުނެފައިވާ ފަދައިން ކޮންމެ 2 ޓަވަރެއްގެ މެދުގައި އުފައްދާ ކޯޕަރޭޓިވް ސޮސައިޓީގެ ބޯޑު މެދުވެރިކޮށްކަން ފާހަގަކޮށްފައިވާއިރު، އެގްރީމެންޓްގެ 13 ވަނަ މާއްދާގެ (ށ) ގައި ބަޔާން ކޮށްފައިވާ ފަދައިން އެއްބަސްވުމުގައި އެޗްޑީސީ އުފެދި އިމާރާތް ބެލެހެއްޓުމާއި މެނޭޖު ކުރުމުގެ ޒިންމާ ގާނޫނަކުން ނުވަތަ ގަވާއިދަކުން ނުވަތަ ކަމާބެހޭ އިދާރާއަކުން ކަނޑައަޅާ އުސޫލެއްގެ ދަށުން އެހެން ފަރާތްތަކަށް ނަގުލުވުމާއި ހަމައަށް އިމާރާތް އިންޝުއަރެންސް ކުރުމާއި، މަރާމާތު ކުރުމާއި ބެލެހެއްޓުމުގެ މަސްއޫލިއްޔަތު އުފުލުމަށް ފުލެޓު ވިއްކާ ފަރާތާއި ފުލެޓު ގަންނަ ފަރާތް ވަނީ އެއްބަސްވެފައި ކަމަށް އެޗްޑީސީން ވަނީ ބުނެފައެވެ.

އެ ކުންފުނިން ބުނީ، 31 ޖަނަވަރީ 2022 ވަނަ ދުވަހު އެ ކުންފުނިން އާންމުކޮށްފައިވާ ފަދައިން 20 ސެޕްޓެމްބަރ 2021 ގައި އެއްމެދު އިމާރާތުގެ ގާނޫނު ރައީސުލްޖުމްހޫރިއްޔާ ވަނީ ތަސްދީގު ކުރައްވައި، އެއްމެދު އިމާރާތްތައް ބެލެހެއްޓުމާއި ބެހޭގޮތުން އަމަލު ކުރަންވީ ގޮތްތަކެއް ކަނޑައަޅާފައި ކަމަށާއި އަދި ހިޔާ މަޝްރޫއުގެ ދަށުން ތަރައްގީ ކޮށްފައިވާ 16 ޓަވަރު ބެލެހެއްޓުމާއި މެނޭޖު ކުރުމަށް މެނޭޖުމަންޓް ކޯޕަރޭޝަން ހަމަޖެއްސުމަށްޓަކައި ކުރިޔަށް ގެންދަންވީ ގޮތެއް ކަމާބެހޭ މުއައްސަސާތަކުގެ މެދުގައި ދަނީ މަޝްވަރާ ކުރެވެމުން ކަމަށް ވެސް އެ ކުންފުނިން ވަނީ ބުނެފައެވެ.

މި ކަންކަމުގެ އިތުރުން ވެސް އެޗްޑީސީގެ ބަޔާނުގައި، ގާނޫނީ ގޮތުން ހެދިފައިވާ އެއްބަސްވުމެއްގައި ބަޔާން ކޮށްފައިވާ ކަންކަމަށް ހިލާފުވުމަށް ގޮވާލާ މިކަމަށް ހިތްވަރުދީ ބާރު އެޅުމަކީ ބޮޑު ކުށެއްކަމަށާއި އެކަން އެކޯޕަރޭޝަނުން ވަނީ ހަރުކަށި އިބާރާތުން ކުށްވެރިކޮށްފައެވެ. އަދި މި މައްސަލަ ބަލައިދިނުމަށާއި މިކަމުން ލިބޭނެ ގެއްލުމުގެ ބަދަލު ހޯދަން އެދި ކަމާބެހޭ މުއައްސަސާތަކަށް ހުށަހަޅާނެކަމަށް ވެސް އެޗްޑީސީން ވަނީ ބުނެފައެވެ.

ފާހަގަކޮށްލެވޭ ގޮތުގައި، ހިޔާ ފުލެޓުގެ ކުއްޔާ ބެހޭގޮތުން އެޗްޑީސީން ބަޔާނެއް ނެރެފައި މިވަނީ، ފުލެޓުތަކަށް ދައްކަންޖެހޭ ފީ ނުދެއްކުމަށް ހިޔާ ފުލެޓުތަކުގައި ދިރިއުޅޭ އާއިލާތަކަށް އެކިކަންކަމުގައި އެހީތެރިވުމަށް އުފައްދާފައިވާ ހިޔާ ޔޫނިއަނުން ގޮވާލާފައިވަނިކޮށެވެ.