ހުޅުމާލެ ފޭސް ދޭއްގައި ގާއިމްކޮށްފައިވާ ހިޔާ ފްލެޓްތަކަށް މި މަހުން ފެށިގެން ދައްކަން ޖެހޭ ކުލި ޓަވަރު 11 އިންވެސް ބަލައިގަންނަ ގޮތަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހަމަޖައްސައިފިއެވެ.

ހިޔާ ފްލެޓްތަކަށް ކުލި ދެއްކުމަށް އިތުރު ލުއިތަކެއް ހޯދައިދިނުމަށް ހިޔާ ޓަވަރު 11 ގައި ގާއިމްކޮށްފައިވާ މެނޭޖްމެންޓް އޮފީހުން ކުލި ބަލައިގަތުމުގެ އިންތިޒާމް މިހާރު ހަމަޖެހިފައިވާ ކަމަށް އެޗްޑީސީން މިއަދު ބުންޏެވެ.

އެގޮތުން ކޮންމެ އާދީއްތައަކުން ބުރާސްފައްޗަށް 9:30 އިން 13:00 އަށް އެ އޮފީހަށް ކުލި ދެއްކޭނެ ކަމަށް އެ ކުންފުނިން ބުނެފައިވެއެވެ. އެގޮތުން އެއޮފީހަށް ފައިސާ ދެއްކޭނީ ކޭޝް ކާޑާއި ޗެކުން ކަމަށް ވެސް އެ ކޯޕަރޭޝަނުން ބުނެފައި ވެއެވެ.

އެޗްޑީސީން ވަނީ މި މަހުގެ ކުލި ޖޫރިމަނާއާއި ނުލައި، މި މަހުގެ 30 ވަނަ ދުވަހުގެ ނިޔަލަށް ދެއްކޭނެ ގޮތަށް ހަމަޖައްސާފައެވެ.

އެޗްޑީސީން މިއަދު ބުނީ، ހިޔާ ސަރަހައްދުގައި ކުރިއަށް ގެންދަން ރާވާފައިވާ އިންފޮމޭޝަން ސެޝަންތަކަށް ހުރަސްއަޅަމުންދާތީ އާންމުންނަށް ދިމާވާ ދަތިތަކަށް ހައްލެއް ހޯދައިދިނުމަށް އިންފޮމޭޝަން ސެޝަންތައް ވެސް ހިޔާ މެނޭޖްމަންޓް އޮފީހަށް ބަދަލުކުރެވިފައި ވާކަމަށެވެ.

ހިޔާ ފްލެޓް ތަކަށް މިމަހުން ފެށިގެން ކުލި ނަގަން ފަށާފައިވަނީ ދެ ފަހަރެއްގެ މަތީން ކުލި ނެގުން ފަސްކޮށް އެތައް ލުއިތަކެއް ދިނުމަށް ފަހުގައެވެ.