ރެސްޓޯރެންޓެއްގެ ތެރޭގައި ވަޅިން ހަމަލާދީ މަރާލި ބަންގްލްދޭޝް މީހާގެ ހަށިގަނޑު ޤައުމަށް ފޮނުވައި ދިނުމަށް އޭނާގެ ޢާއިލާއިން އެދިފައިވާ ކަމަށް ބަންގްލަދޭޝްގެ މީޑިއާ ރިޕޯޓްތައް ބުނެފިއެވެ.

ބަންގްލަދޭޝްގެ "ޑެއިލީ ސްޓާ" ނޫހުން ރިޕޯޓްކޮށްފައިވަނީ ޕާކިސްތާނު ކައްކާ އާބިދުގެ ހަމަލާއަކުން މަރުވެފައިވާ ބަންގްލަދޭޝްގެ ބްރަހްމަންބާރިއާ ސިޓީގެ ޗަމްޕޫރް ވިލެޖަށް ނިސްބަތްވާ އެމްޑީ ޝާހިން، 29ގެ އާއިލާއިން އޭނާގެ ހަށިގަނޑު ގައުމަށް ފޮނުވައިދޭން ކަމާބެހޭ ފަރާތްތަކުގެ ކިބައިން އެދިފައިވާ ކަމަށެވެ. އަދި އޭނާއަށް އިންސާފު ހޯދައިދިނުމަށްވެސް އެ ޢާއިލާއިން ގޮވާލާފައިވާކަމަށްވެސް އެ ނޫހުގައި ވަނީ ބުނެފައެވެ.

ހުޅުމާލޭގެ ޚާންޖީ ރެސްޓޯރެންޓްގައި މިމަހުގެ 16 ވަނަދުވަހު ހަވީރު ވަޅިން ހަމަލާދީ އެތަނުގެ ވެއިޓަރެއްގެ ގޮތުގައި މަސައްކަތް ކުރާ ބަނގުލަދޭޝް މީހާ މަރާލި މައްސަލައިގައި އެރޭ ދަންވަރު ހައްޔަރުކޮށްފައިވަނީ އެ ރެސްޓޯރެންޓްގައި ޝެފެއްގެ ގޮތުގައި މަސައްކަތްކުރާ ޕާކިސްތާނުގެ ރައްޔިތެއް ކަމަށްވާ އުމުރުން 26 އަހަރުގެ މުހައްމަދު އާބިދެވެ. އޭނާގެ ބަންދަށް ހުޅުމާލޭ މެޖިސްޓްރޭޓް ކޯޓުން ރޭ ވަނީ 15 ދުވަސް ޖަހައިދީފައެވެ.

ޝާހިން މަރާލުމަށްފަހު ފިލައިގެން އުޅެނިކޮށް އާބިދު ހައްޔަރުކޮށްފައިވަނީ ހުޅުމާލޭ ފޭސް-2 ގެ ބީޗް ސަރަޙައްދުންނެވެ. އެ މައްސަލައާ ގުޅިގެން އިތުރުމީހަކު ހައްޔަރުކޮށްފައިނުވާކަމަށް ފުލުހުންވަނީ ބުނެފައެވެ.

ޕާކިސްތާނުގެ މުހައްމަދު އާބިދު، ބަންގްލަދޭޝްގެ މީހާއަށް ވަޅިން ހަމަލާދީފައިވަނީ އެ ރެސްޓޯރެންޓް ބަދިގެ ތެރޭގައި ހިނގި ޒުވާބެއްގެ ތެރެއިންނެެވެ. މަރުވިމީހާއަށް ލިބިފައިވާ އަނިޔާގެ ތަފްސީލް ފުލުހުން އަދި ހާމަކޮށްފައެއް ނުވެއެވެ.

މި މައްސަލަ ފުލުހުންގެ ސީރިއަސް އެންޑް އޯގަނިޒޭޝަން ޑިޕާޓްމެންޓުން މިހާރު ދަނީ ތަހުގީގު ކުރަމުންނެެވެ.