ހުޅުމާލޭގެ ފޭސް 2 ގައި ތަރައްގީ ކޮށްފައިވާ ހިޔާ ފުލެޓުތައް ކައިރީގައި ހަދާ ޕާކުގެ 2 ވަނަ ފިޔަވަހި ފަރުމާ ކުރުމާ ގުޅޭގޮތުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ރައްޔިތުންގެ ހިޔާލު ހޯދުމަށް ބައްދަލުވުންތަކެއް ބާއްވަން ނިންމައިފިއެވެ.

ހިޔާ ފުލެޓްތައް ކައިރީގައި ހަދާ ޕާކުގެ ފުރަތަމަ ފިޔަވަހި ޑިޒައިން ކުރުމުގެ މަސައްކަތް މުޅިން ނިމި މިހާރުދަނީ ޕާކު ގާއިމު ކުރުމުގެ އަމަލީ މަސައްކަތް ފެށިގެން ކުރިޔަށެވެ. އެ މަސައްކަތާއިއެކު ޕާކު އިތުރަށް ފުރިހަމަ ކުރުމަށް ކުރިޔަށް ގެންދަން ހަމަޖެހިފައިވާ 2 ވަނަ ފިޔަވަހީގެ މަސައްކަތްތައް ފެށުމަށްޓަކައި އެޗްޑީސީން ދަނީ ތައްޔާރީތައް ވަމުންނެވެ.

އެޗްޑީސީން ބުނީ، ޕާކުގެ ދެވަނަ ފިޔަވަހީގެ މަސައްކަތްތައް ވެސް ކުރިޔަށް ގެންދަން ބޭނުންވަނީ އެ ސަރަހައްދުގައި ދިރިއުޅޭ ރައްޔިތުންގެ ހިޔާލާ އެއްގޮތަށް ކަމަށެވެ. އޭގެ ބޭނުމަކީ އެ ސަރަހައްދަކީ ވީހާވެސް ގިނަބަޔަކަށް ބޭނުން ކުރެވޭނެ ހިތްގައިމު މާހައުލަކަށް ހެދުން ކަމަށް އެޗްޑީސީން ބުނެއެވެ.

"ހިޔާ ޕާކު ސްޓޭޖު 2" ފަރުމާ ކުރުމަށް ރައްޔިތުންގެ ޙިޔާލު ހޯދުމަށް ބާއްވާ ޕުރޮގްރާމް 22 އޭޕްރިލް 2022 ވަނަ ދުވަހުގެ ހަވީރު 4-6 އަށް ހިޔާ ސަރަހައްދުގައި

ހިޔާ ޕާކު ސަރވޭ ފޯމް ލިންކް: https://t.co/2FfnNZwR1v pic.twitter.com/HdOp1d4asi

— HDC (@hdcmaldives) April 18, 2022

ހިޔާ ޕާކުގެ 2 ވަނަ ފިޔަވައްސާއި ގުޅޭގޮތުން ހިޔާލު ހޯދުމަށް ބާއްވާ ޕްރޮގްރާމް މި ހިނގާ އޭޕްރީލް މަހުގެ 22 ވަނަ ދުވަހުގެ ހަވީރު 4:00 ން 6:00 އަށް ހިޔާ ސަރަހައްދުގައި ކުރިޔަށް ގެންދަން އެ ކުންފުނިން ވަނީ ނިންމާފައެވެ. އެ ކުންފުނިން ބުނީ، މިކަމާއި ގުޅޭގޮތުން އެބޭފުޅަކު ދޭން ބޭނުންވާ ހިޔާލެއް ދިނުމަށް އެވަގުތު ހިޔާ ސަރަހައްދަށް ގޮސް ވީހާވެސް ގިނަބަޔަކު ހިޔާލު ދޭނެކަމަށް އުންމީދު ކުރާ ކަމަށެވެ.

މިކަމާއި ގުޅޭގޮތުން ރައްޔިތުންގެ ހިޔާލު ހޯދުމަށް އެޗްޑީސީން މިހާރުވަނީ ހިޔާ ޕާކާއި ގުޅޭ އޮންލައިން ސާވޭ ފޯމެއް ތައާރަފުކޮށް އެ ފޯމް މެދުވެރިކޮށް ހިޔާލު ހުށަހެޅުމުގެ ފުރުސަތު ވެސް ހުޅުވާލާފައެވެ.