ސަރުކާރުން މުލަކަތޮޅު މުލީގައި ތަރައްގީކުރާ އެއާޕޯޓް މަޝްރޫއުގެ ދަށުން، ބިން ހިއްކުމުގެ މަސައްކަތް ފެށުމުގެ ކުރިން އަޅަންޖެހޭ ބަންޑް ވޯލް އެޅުމުގެ މަސައްކަތް ކުރިއަށްދާ ކަމަށް، އެ މަސައްކަތް ހަވާލު ކޮށްފައިވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓިސީސީ) އިން ބުނެފިއެވެ.

މި މަޝްރޫއުގެ އެންމެ ފަހުގެ ތަފުސީލު ދެމުން އެމްޓީސީސީން ބުނީ، ބަންޑް ވޯލް އެޅުމުގެ މަސައްކަތުގެ އިތުރުން އެ މަޝްރޫއުގެ ދަށުން ޓާމިނަލް ބިލްޑިންގެ ފައުންޑޭޝަންގެ މަސައްކަތްތައް ވެސް ކުރަމުންދާ ކަމަށެވެ.

ޕްލޭނިންގ މިނިސްޓްރީން ޖުމުލަ 221.7 މިލިއަން ރުފިޔާއަށް އެމްޓީސީސީއާއި ހަވާލުކުރި މި މަޝްރޫއުގައި ސޮއިކުރީ 28 ފެބްރުއަރީ 2021 ގައެވެ. އަދި 6 އޭޕްރީލް 2021 ގައިވަނީ އެ މަސައްކަތުގެ އަމަލީ މަސައްކަތް ފަށާފައެވެ.

މުލީ އެއާޕޯޓް މަޝްރޫއުގެ ދަށުން 14 ހެކްޓަރުގެ ބިން ހިއްކުމާއި 1812 މީޓަރުގެ ސަރަހައްދެއްގެ ގޮނޑުދޮށް ހިމާޔަތް ކުރާނެއެވެ. އަދި 1200 މީޓަރު ދިގު 30 މީޓަރު ފުޅާ ރަންވޭއެއް ގާއިމުކޮށް، ޓެކްސީވޭ އަކާއި އޭޕްރަންއެއް އެޅުމުގެ މަސައްކަތް ވެސް އެ މަޝްރޫއުގައި ހިމެނެއެވެ.