ހުޅުމާލޭގައި 10 އެޕާޓްމަންޓް އިމާރާތް އަޅާނެ ބަޔަކު ހޯދަން ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން އިއުލާންކޮށްފިއެވެ.

އެޗްޑީސީން ކޮށްފައިވާ އިއުލާނެއްގައި ބުނީ، ހުޅުމާލޭ ފުރަތަމަ ފިޔަވަހީގެ ދެ ސަރަހައްދަކުންނާއި ދެވަނަ ފިޔަވަހީގެ އަށް ސަރަހައްދަކުން ޖުމްލަ ދިހަ ބިމެއްގައި އެޕާޓްމަންޓް އަޅައި ހިންގައިދޭނެ ބަޔަކު ހޯދަން ބޭނުންވާ ކަމަށެވެ. އެގޮތުން ދެ ކޮޓަރިއާއި ތިން ކޮޓަރީގެ އެޕާޓްމަންޓުތަކެއް އަޅަން ދޫކުރަން ނިންމާފައިވަނީ 1،657 އަކަފޫޓާއި 3،411 އަކަފޫޓާ ދެމެދުގެ ބިންތަކެކެވެ.

ހުޅުމާލޭގައި އެޕާޓްމަންޓް އަޅައި ހިންގުމަށް ޝައުގުވެރިވާ ފަރާތްތަކަށް މައުލޫމާތު ދިނުމަށް ހަމަޖެހިފައިވަނީ އަންނަ މަހުގެ 12 ވަނަ ދުވަހުގެ މެންދުރު 1:00 ގައެވެ. އަދި އެޕާޓްމަންޓް އަޅައި ހިންގުމަށް ޝައުގުވެރިވާ ފަރާތްތަކުން އެކަމަށް ޕްރޮޕޯސަލް ހުށަހަޅަންވާނީ ޖޫން މަހުގެ ނުވަވަނަ ދުވަހުގެ ނިޔަލަށް ކަމަށް އެޗްޑީސީގެ އިޢުލާނުގައިވެއެވެ.

އެޗްޑީސީގެ އިއުލާންގައިވަނީ ހުޅުމާލޭގައި ޢިމާރާތްކުރާ ދެ ކޮޓަރީގެ ބައެއް އެޕާޓްމަންޓްތައް 1.5 މިލިއަން ރުފިޔާއަށް އަދި ތިން ކޮޓަރީގެ ބައެއް އެޕާޓްމަންޓްތައް 2.5 މިލިއަން ރުފިޔާ އަށް ވުރެ ބޮޑުކޮށް ނުވިއްކޭނެ ކަމަށެވެ. އޭގެ އިތުރުން އެޕާޓްމެންޓްތަކުގައި ފިނިޝިން މަސައްކަތްތަކާއި އެހެނިހެން މަސައްކަތްތައް ކުރަންޖެހޭނީ އެޗްޑީސީގެ ގައިޑްލައިންތަކާއި އެއްގޮތަށް ކަމަށް އިޢުލާނުގައިވެއެވެ.

އެޗްޑީސީން ބުނީ އެޕާޓްމަންޓްއަޅާ ބިންތަކުގައި ހަދާ އެޕާޓްމަންޓްތަކުގައި ދިރިއުޅޭ މީހުންނަށް ޕާކިން ޖާގަތަކެއް ތަރައްގީ ކުރަންޖެހޭނެ ކަމަށެވެ. އެގޮތުން ކާރު ޕާކްކުރަން ޖާގަ ވިއްކުމަށް އޮންނަ އަގަކީ ފޫޓަކަށް 1،000 ރުފިޔާ އެވެ.

އެޗްޑީސީން ބުނީ ޕްރޮޕޯސަލް ކާމިޔާބުކުރާ ފަރާތްތަކުން އެޕާޓްމަންޓްތައް އިޝްތިހާރުކުރަން ވާނީ އެއްބަސްވުމުގައި ސޮއިކުރުމަށް ފަހުގައި ކަމަށެވެ. އަދި ބުކިން ފީ ފަދަ އެއްވެސް ފައިސާއެއް ކަސްޓަމަރުންގެ އަތުން ނަގަން ވާނީ، އެޕާޓްމަންޓް ވިއްކުމުގެ ކުރިން އެޗްޑީސީން ހޯދަން ޖެހޭ ހުއްދަ ހޯދުމަށް ފަހުގައި ކަމަށެވެ.

އަދި އެޕާޓްމެންޓް ތަރައްގީކުރާ ފަރާތްތަކުން އެއް އެޕާޓްމެންޓަށްވުރެ ގިނަ އެޕާޓްމެންޓް އެއްފަރާތަށް ވިއްކައިގެން ނުވާނެ ކަމަށް ވެސް އެޗްޑީސީން ބުނެ އެވެ.