ހއ. ދިއްދޫ ބަނދަރު ބޮޑުކުރުމާއި ޖެޓީ ހެދުމުގެ މަޝްރޫއުގެ ދަށުން، އެއްގަމުތޮށި ލުމަށް ބޭނުންވާ ކޮންކްރީޓް ގަލުގެ ފުރަތަމަ ޝިޕްމަންޓް އެ ރަށަށް ގެންގޮސްފި ކަމަށް ސަރުކާރުން ބުނެފިއެވެ.

އެ މަޝްރޫއުގެ ކޮންޓްރެކްޓަރ އެމްޓީސީސީން މިއަދު ބުނީ، ބަނދަރަށް ބޭނުންވާ ކޮންކްރީޓް ގަލުގެ ޝިޕްމަންޓް ގެންދިޔައީ އިއްޔެ ކަމަށެވެ. އަދި މިހާރު އެ މަޝްރޫއުގެ ދަށުން ހާބަރ ބޭސިން ފުންކުރުމުގެ މަސައްކަތް ކުރިޔަށް ދާ ކަމަށް ވެސް ވަނީ ބުނެފައެވެ.

ސަރުކާރުން ކުރިން ހާމަ ކޮށްފައިވާ ގޮތުން، މި މަޝްރޫއުގެ ދަށުން، 78،000 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމަށް ހަމަޖެހިފައިވެއެވެ. އަދި 616 މީޓަރުގެ ސަރަހައްދެއްގައި ބޭރުތޮށި ލުމާއި، 185 މީޓަރުގެ ސަރަހައްދެއްގައި ރިވެޓްމެންޓް ޖެހުން ހިމެނެއެވެ.

މީގެ އިތުރުން 326 މީޓަރުގެ ސަރަހައްދެއްގައި އެއްގަމުތޮށި ލުމާއި، 4320 އަަކަ މީޓަރުގެ ސަރަަހައްދެއްގައި ހާބަރ ޕޭވްމަންޓް ހަދާނެއެވެ. އަދި މަސައްކަތް ނިމޭއިރު ބަނދަރު ބައްތި ހަރުކުރުމުގެ މަސައްކަތްވެސް ކުރާނެ ކަމަށް އެމްޓީސީސީން މައުލޫމާތުދެއެވެ.

މިއީ 69.8 މިލިއަން ރުފިޔާގެ މަޝްރޫއެކެވެ.